ਕਾਂਦਾ ਐਕਸਪ੍ਰੈਸ: ਪਿਆਜ਼ ਕਿਉਂ ਮਹਿੰਗਾ ਹੋ ਗਿਆ, ਨਾਸਿਕ ਤੋਂ ਵਿਸ਼ੇਸ਼ ਟਰੇਨ ਕਿਉਂ ਚਲਾਈ ਗਈ, ਜਾਣੋ ਕਿੱਥੋਂ ਮਿਲੇਗਾ ਸਸਤਾ ਪਿਆਜ਼?
ਤਸਵੀਰ ਸਰੋਤ, MINISTRY OF RAILWAYS, GOVERNMENT OF INDIA
ਖੰਡ ਤੋਂ ਬਾਅਦ ਹੁਣ ਦੇਸ਼ ਭਰ ਵਿੱਚ ਪਿਆਜ਼ ਦੀਆਂ ਕੀਮਤਾਂ ਵਿੱਚ ਅਚਾਨਕ ਵਾਧਾ ਦੇਖਿਆ ਗਿਆ ਹੈ।
ਖ਼ਬਰ ਏਜੰਸੀ ਪੀਟੀਆਈ ਨੇ ਉਪਭੋਗਤਾ ਮਾਮਲਿਆਂ ਦੇ ਵਿਭਾਗ ਦੇ ਹਵਾਲੇ ਨਾਲ ਦੱਸਿਆ ਹੈ ਕਿ 24 ਅਗਸਤ ਨੂੰ ਪੂਰੇ ਭਾਰਤ ਵਿੱਚ ਪਿਆਜ਼ ਦਾ ਔਸਤ ਖੁਦਰਾ ਮੁੱਲ ਸਾਲ ਦਰ ਸਾਲ 59 ਫ਼ੀਸਦੀ ਵਧ ਕੇ 43.53 ਰੁਪਏ ਪ੍ਰਤੀ ਕਿੱਲੋ ਹੋ ਗਿਆ ਜੋ ਇੱਕ ਸਾਲ ਪਹਿਲਾਂ 27.37 ਰੁਪਏ ਪ੍ਰਤੀ ਕਿੱਲੋ ਸੀ।
ਮੰਤਰਾਲੇ ਨੇ ਦੱਸਿਆ ਹੈ ਕਿ ਔਸਤ ਥੋਕ ਮੁੱਲ 68 ਫ਼ੀਸਦੀ ਵਧ ਕੇ 35.58 ਰੁਪਏ ਪ੍ਰਤੀ ਕਿੱਲੋ ਹੋ ਗਿਆ ਜੋ ਇੱਕ ਸਾਲ ਪਹਿਲਾਂ ਇਸੇ ਸਮੇਂ 21.23 ਰੁਪਏ ਪ੍ਰਤੀ ਕਿੱਲੋ ਸੀ।
ਪੀਟੀਆਈ ਮੁਤਾਬਕ, ਸੋਮਵਾਰ ਨੂੰ ਚੇਨੱਈ ਵਿੱਚ ਪਿਆਜ਼ ਦੀ ਖੁਦਰਾ ਕੀਮਤ 60 ਰੁਪਏ ਪ੍ਰਤੀ ਕਿੱਲੋ, ਦਿੱਲੀ ਵਿੱਚ 55 ਰੁਪਏ ਪ੍ਰਤੀ ਕਿੱਲੋ ਅਤੇ ਕੋਲਕਾਤਾ ਵਿੱਚ 53 ਰੁਪਏ ਪ੍ਰਤੀ ਕਿੱਲੋ ਸੀ।
ਹਾਲਾਂਕਿ ਦੇਸ਼ ਦੇ ਕਈ ਹਿੱਸਿਆਂ ਵਿੱਚ ਪਿਆਜ਼ ਦਾ ਖੁਦਰਾ ਮੁੱਲ 60 ਤੋਂ 70 ਰੁਪਏ ਪ੍ਰਤੀ ਕਿੱਲੋ ਤੱਕ ਪਹੁੰਚ ਚੁੱਕਿਆ ਹੈ।
ਪਿਆਜ਼ ਦੀਆਂ ਵਧਦੀਆਂ ਕੀਮਤਾਂ ਨੂੰ ਦੇਖਦਿਆਂ ਕੇਂਦਰ ਦੀ ਮੋਦੀ ਸਰਕਾਰ ਨੇ ਜਨਤਾ ਨੂੰ ਰਾਹਤ ਦਵਾਉਣ ਦਾ ਫ਼ੈਸਲਾ ਕੀਤਾ ਹੈ।
ਸਰਕਾਰ ਨੇ ਪਿਆਜ਼ ਦਾ ਕੇਂਦਰ ਕਹੇ ਜਾਣ ਵਾਲੇ ਨਾਸਿਕ ਦੇ ਲਾਸਲ ਪਿੰਡ ਤੋਂ ਦੇਸ਼ ਦੀਆਂ ਪ੍ਰਮੁਖ ਥਾਂਵਾਂ ਲਈ ਇੱਕ ਖਾਸ ਟਰੇਨ ਚਲਾਈ ਹੈ ਜੋ ਉੱਥੇ ਪਿਆਜ਼ ਲੈ ਕੇ ਪਹੁੰਚੇਗੀ।
ਇਸ ਖਾਸ ਟਰੇਨ ਨੂੰ ਕਾਂਦਾ ਐਕਸਪ੍ਰੈਸ ਨਾਮ ਦਿੱਤਾ ਗਿਆ ਹੈ। ਗੌਰਤਲਬ ਹੈ ਕਿ ਪਿਆਜ਼ ਨੂੰ ਕਾਂਦਾ ਵੀ ਕਿਹਾ ਜਾਂਦਾ ਹੈ।
ਕੀ ਹੈ ਕਾਂਦਾ ਐਕਸਪ੍ਰੈਸ ?
ਤਸਵੀਰ ਸਰੋਤ, Getty Images
ਭਾਰਤ ਸਰਕਾਰ ਦੇ ਉਪਭੋਗਤਾ ਮਾਮਲਿਆਂ ਦੇ ਵਿਭਾਗ ਦੇ ਅਧਿਕਾਰਤ ਐਕਸ ਹੈਂਡਲ ਤੋਂ ਜਾਣਕਾਰੀ ਦਿੱਤੀ ਗਈ ਹੈ ਕਿ ਕਾਂਦਾ ਐਕਸਪ੍ਰੈਸ ਜ਼ਰੀਏ ਪ੍ਰਮੁਖ ਬਜ਼ਾਰਾਂ ਤੱਕ ਪਿਆਜ਼ ਦੀ ਸਪਲਾਈ ਵਧਾਈ ਜਾ ਰਹੀ ਹੈ, ਜਿਸ ਨਾਲ ਉਪਲਬਧਤਾ ਮਜ਼ਬੂਤ ਹੋਏਗੀ, ਕੀਮਤਾਂ ਵਿੱਚ ਸਥਿਰਤਾ ਆਵੇਗੀ ਅਤੇ ਉਪਭੋਗਤਾਵਾਂ ਨੂੰ ਰਾਹਤ ਮਿਲੇਗੀ।
ਇਸ ਐਕਸ ਪੋਸਟ ਵਿੱਚ ਦੱਸਿਆ ਗਿਆ ਹੈ ਕਿ 800 ਮੀਟ੍ਰਿਕ ਟਨ ਪਿਆਜ਼ ਨੂੰ ਲੈ ਕੇ ਇਹ ਖਾਸ ਟਰੇਨਾਂ ਨਾਸਿਕ ਤੋਂ ਪੰਜ ਮੁੱਖ ਸ਼ਹਿਰਾਂ ਵਿੱਚ ਜਾ ਰਹੀਆਂ ਹਨ ਜਿਸ ਨੂੰ 35 ਰੁਪਏ ਪ੍ਰਤੀ ਕਿੱਲੋ ਦੇ ਰੇਟ 'ਤੇ ਵੇਚਿਆ ਜਾਵੇਗਾ।
ਸੈਂਟਰਲ ਰੇਲਵੇ ਦੇ ਮੁੱਖ ਜਨ ਸੰਪਰਕ ਅਧਿਕਾਰੀ ਸਵਪਨਿਲ ਨਿਲਾ ਨੇ ਬੀਬੀਸੀ ਹਿੰਦੀ ਦੇ ਪੱਤਰਕਾਰ ਚੰਦਨ ਕੁਮਾਰ ਜਜਵਾੜੇ ਨੂੰ ਦੱਸਿਆ ਹੈ ਕਿ ਨਾਸਿਕ ਦੇ ਲਾਸਲ ਪਿੰਡ ਤੋਂ ਪਿਆਜ਼ ਦੇ ਰੈਕ ਦੀ ਲੈਂਡਿੰਗ ਸ਼ੁਰੂ ਹੋ ਗਈ ਹੈ ਜੋ ਟਰੇਨ ਦਿੱਲੀ ਦੇ ਆਦਰਸ਼ ਨਗਰ ਜਾਵੇਗੀ।
ਉਪਭੋਗਤਾ ਮਾਮਲਿਆਂ ਦੇ ਵਿਭਾਗ ਨੇ ਐਕਸ 'ਤੇ ਦੱਸਿਆ ਕਿ ਵਿਸ਼ੇਸ਼ ਟਰੇਨ ਨੂੰ ਸ਼ੁਰੂਆਤ ਵਿੱਚ ਚੇਨਈ, ਮਦੁਰੈ, ਦਿੱਲੀ, ਏਨਾਕੁਲਮ ਅਤੇ ਗੁਹਾਟੀ ਲਈ ਸ਼ਾਮਲ ਕੀਤਾ ਗਿਆ ਹੈ। ਲੋੜ ਮੁਤਾਬਕ ਹੋਰ ਕੇਂਦਰਾਂ ਨੂੰ ਵੀ ਜੋੜਿਆ ਜਾਵੇਗਾ।
"ਸਰਕਾਰ ਉਪਭੋਗਤਾਵਾਂ ਅਤੇ ਕਿਸਾਨਾਂ, ਦੋਨਾਂ ਦੇ ਹਿਤਾਂ ਨੂੰ ਧਿਆਨ ਵਿਚ ਰੱਖਦਿਆਂ ਪਿਆਜ਼ ਦੀ ਉਪਲਬਧਤਾ ਅਤੇ ਕੀਮਤਾਂ ਨੂੰ ਸੰਤੁਲਿਤ ਰੱਖਣ ਲਈ ਸਮਾਂ ਬੱਧ ਕਦਮ ਚੁੱਕ ਰਹੀ ਹੈ।"
ਅਜਿਹਾ ਨਹੀਂ ਹੈ ਕਿ ਇਹ ਪਿਆਜ਼ ਬਜ਼ਾਰ ਵਿਚ ਸਿੱਧੇ ਤੌਰ 'ਤੇ ਉਪਲਬਧ ਹੋਵੇਗਾ ਬਲਕਿ ਇਸ ਪਿਆਜ਼ ਨੂੰ ਐਨਸੀਸੀਐਫ, ਨੇਫੇਡ ਅਤੇ ਕੇਂਦਰੀ ਭੰਡਾਰ ਦੇ ਸਟੋਰਾਂ ਜ਼ਰੀਏ 35 ਰੁਪਏ ਪ੍ਰਤੀ ਕਿੱਲੋ ਦੇ ਭਾਅ 'ਤੇ ਉਪਲਬਧ ਕਰਵਾਇਆ ਜਾਏਗਾ।
ਪਹਿਲਾਂ ਵੀ ਸਰਕਾਰ ਨੇ ਚੁੱਕੇ ਸੀ ਅਜਿਹੇ ਕਦਮ
ਤਸਵੀਰ ਸਰੋਤ, Getty Images
ਨਿਊਜ਼ ਏਜੰਸੀ ਪੀਟੀਆਈ ਮੁਤਾਬਕ, ਕਾਂਦਾ ਐਕਸਪ੍ਰੈਸ ਪਹਿਲ ਦਾ ਮਕਸਦ ਵੱਡੇ ਪੈਮਾਨੇ 'ਤੇ ਪਿਆਜ਼ ਦੀ ਢੁਆਈ ਲਈ ਰਸਦ ਦੀ ਸਮਰੱਥਾ ਨੂੰ ਵਧਾਉਣਾ ਹੈ। ਇਸੇ ਸਾਲ 2024-25 ਵਿੱਚ ਸ਼ੁਰੂ ਕੀਤਾ ਗਿਆ ਸੀ ਅਤੇ ਉਦੋਂ ਤੋਂ ਇਸ ਦਾ ਕਾਫ਼ੀ ਵਿਸਥਾਰ ਕੀਤਾ ਗਿਆ ਹੈ।
ਹਾਲੀਆ ਕਾਂਦਾ ਐਕਸਪ੍ਰੈਸ ਦੀ ਹਰ ਟਰੇਨ ਵਿੱਚ 40 ਟਰੱਕਾਂ ਤੱਕ ਦੇ ਬਰਾਬਰ ਪਿਆਜ਼ ਲਿਜਾਇਆ ਜਾ ਰਿਹਾ ਹੈ।
ਸਾਲ 2024-25 ਵਿੱਚ ਲਗਭਗ 12 ਹਜ਼ਾਰ ਟਨ ਪਿਆਜ਼ ਦਾ ਫ਼ਰ ਸਟੌਕ ਲੈ ਜਾਣ ਵਾਲੇ 14 ਰੇਲਵੇ ਰੈਕ ਪੰਜ ਸ਼ਹਿਰਾਂ ਵਿੱਚ ਭੇਜੇ ਗਏ ਸੀ। 2025-26 ਵਿੱਚ ਇਸ ਨੂੰ ਵਧਾ ਕੇ 86 ਰੈਕ ਕਰ ਦਿੱਤਾ ਗਿਆ ਹੈ, ਜੋ ਦੇਸ਼ ਭਰ ਵਿੱਚ 16 ਵੱਡੇ ਸ਼ਹਿਰਾਂ ਵਿੱਚ ਲਗਭਗ 88 ਹਜ਼ਾਰ ਟਨ ਪਿਆਜ਼ ਲਿਜਾ ਰਹੇ ਹਨ।
ਇੱਕ ਅਹਿਮ ਸਵਾਲ ਇਹ ਵੀ ਹੈ ਕਿ ਇਹ ਪਿਆਜ਼ ਆਖਿਰ ਕਿਸ ਤੋਂ ਲਿਆ ਜਾ ਰਿਹਾ ਹੈ ? ਪੀਟੀਆਈ ਮੁਤਾਬਕ, ਪਿਆਜ਼ ਦਾ ਬਫ਼ਰ ਸਟੌਕ ਕੇਂਦਰ ਦਾ ਸਟ੍ਰੈਟੇਜਿਕ ਰਿਜ਼ਰਵ ਹੈ ਜਿਸ ਨੂੰ ਖਾਸ ਤੌਰ 'ਤੇ ਸਪਲਾਈ ਘਟਣ 'ਤੇ ਕੀਮਤਾਂ ਵਿੱਚ ਤੇਜ਼ੀ ਤੋਂ ਮਾਰਕਿਟ ਨੂੰ ਬਚਾਉਣ ਲਈ ਬਣਾਇਆ ਗਿਆ ਹੈ। ਸਰਕਾਰ ਪ੍ਰਾਈਸ ਸਟੇਬਿਲਾਈਜ਼ੇਸ਼ਨ ਫੰਡ ਸਕੀਮ ਤਹਿਤ ਵੱਖ ਵੱਖ ਉਤਪਾਦਕ ਸੂਬਿਆਂ ਵਿੱਚ ਪਿਆਜ਼ ਦਾ ਸਟੌਕ ਰੱਖਦੀ ਹੈ।
ਸਾਲ 2026 ਲਈ ਲਗਭਗ 1.21 ਲੱਖ ਟਨ ਪਿਆਜ਼ ਦਾ ਬਫ਼ਰ ਸਟੌਕ ਰੱਖਿਆ ਗਿਆ ਹੈ।
ਪੀਟੀਆਈ ਨੇ ਸਰਕਾਰ ਮੁਤਾਬਕ ਦੱਸਿਆ, ਆਉਣ ਵਾਲੇ ਮਹੀਨਿਆਂ ਵਿੱਚ ਘਰੇਲੂ ਡਿਮਾਂਡ ਨੂੰ ਪੂਰਾ ਕਰਨ ਲਈ ਪਿਆਜ਼ ਦੀ ਉਪਲਬਧਤਾ ਠੀਕ ਠਾਕ ਬਣੀ ਹੋਈ ਹੈ ਜਿਸ ਨਾਲ 2025-26 ਵਿੱਚ ਅਨੁਮਾਨਿਤ 307.37 ਲੱਖ ਟਨ ਪ੍ਰੋਡਕਸ਼ਨ ਨਾਲ ਸਪੋਰਟ ਮਿਲੇਗਾ ਜੋ ਮੋਟੇ ਤੌਰ 'ਤੇ ਪਿਛਲੇ ਸਾਲ ਦੇ 307.67 ਲੱਖ ਟਨ ਦੇ ਬਰਾਬਰ ਹੈ।
ਆਮ ਤੌਰ 'ਤੇ ਅਗਸਤ-ਸਤੰਬਰ ਤੋਂ ਤਿਉਹਾਰਾਂ, ਮੌਸਮ ਸਬੰਧੀ ਪਰੇਸ਼ਾਨੀਆਂ, ਸਪਲਾਈ ਚੇਨ ਵਿੱਚ ਬਦਲਾਅ ਅਤੇ ਬਦਲਦੇ ਡਿਮਾਂਡ ਪੈਟਰਨ ਕਾਰਨ ਪਿਆਜ਼ ਦੀਆਂ ਕੀਮਤਾਂ ਵਿੱਚ ਮੌਸਮੀ ਤੇਜ਼ੀ ਦੇਖੀ ਜਾਂਦੀ ਹੈ।
ਸੋਸ਼ਲ ਮੀਡੀਆ 'ਤੇ ਕੀ ਕਹਿ ਰਹੇ ਹਨ ਲੋਕ ?
ਤਸਵੀਰ ਸਰੋਤ, Getty Images
ਇਸ ਖਾਸ ਟਰੇਨ ਦੀ ਸੋਸ਼ਲ ਮੀਡੀਆ 'ਤੇ ਵੀ ਚਰਚਾ ਹੋ ਰਹੀ ਹੈ। ਭਾਰਤ ਸਰਕਾਰ ਵਿੱਚ ਉਪਭੋਗਤਾ ਮਾਮਲੇ ਦੀ ਸਕੱਤਰ ਨਿਧੀ ਖਰੇ ਨੇ ਐਕਸ 'ਤੇ ਲਿਖਿਆ, "ਜਲਦੀ ਆ ਰਹੀ ਹੈ: ਕਾਂਦਾ ਐਕਸਪ੍ਰੈਸ ਦਿੱਲੀ ਵਿੱਚ ਲਗਭਗ 800 ਮੀਟ੍ਰਿਕ ਟਨ ਪਿਆਜ਼ ਲਿਆ ਰਹੀ ਹੈ। ਜਿਸ ਨੂੰ ਨੇਫੇਡ, ਏਨਸੀਸੀਐਫ ਅਤੇ ਕੇਂਦਰੀ ਭੰਡਾਰ ਸਟੋਰ 'ਤੇ 35 ਰੁਪਏ ਪ੍ਰਤੀ ਕਿੱਲੋ ਦੀ ਦਰ ਨਾਲ ਵੇਚਿਆ ਜਾਵੇਗਾ। ਕਾਂਦਾ ਐਕਸਪ੍ਰੈਸ ਸ਼ੁਰੂ ਵਿੱਚ ਚੇਨਈ, ਏਨਾਕੁਲਮ, ਮਦੁਰੈ ਅਤੇ ਗੁਹਾਟੀ ਪਹੁੰਚੇਗੀ।"
ਕਰਨ ਰਾਜਪਾਲ ਨਾਮ ਦੇ ਇੱਕ ਯੂਜ਼ਰ ਨੇ ਐਕਸ 'ਤੇ ਲਿਖਿਆ, "ਦੱਸੋ ਅੱਜ ਦੇਸ਼ ਨੇ ਤੁਹਾਡੇ ਲਈ ਕੀ ਕੀਤਾ? ਕਾਂਦਾ ਐਕਸਪ੍ਰੈਸ ਸ਼ੁਰੂ ਕੀਤੀ।"
ਵਰੁਣ ਭਸੀਨ ਨੇ ਐਕਸ 'ਤੇ ਲਿਖਿਆ, " ਕਾਂਦਾ ਐਕਸਪ੍ਰੈਸ ਦੀ ਲੈਂਡਿੰਗ ਸ਼ੁਰੂ ਹੋ ਗਈ ਹੈ। ਪ੍ਰਾਈਸ ਸਟੇਬਿਲਾਈਜ਼ੇਸ਼ਨ ਸਕੀਮ ਕਹਿਤ ਲਾਸਲ ਪਿੰਡ ਤੋਂ ਦਿੱਲੀ 840 ਟਨ ਪਿਆਜ਼ ਭੇਜਿਆ ਜਾਵੇਗਾ।"
"ਇਸ ਕਦਮ ਦਾ ਮਕਸਦ ਦਿੱਲੀ ਵਿੱਚ ਪਿਆਜ਼ ਦੀਆਂ ਕੀਮਤਾਂ ਘੱਟ ਕਰਨਾ ਹੈ, ਪਰ ਨਾਸਿਕ ਦੇ ਕਿਸਾਨਾਂ ਨੂੰ ਡਰ ਹੈ ਕਿ ਇਸ ਨਾਲ ਸਥਾਨਕ ਕੀਮਤਾਂ 'ਤੇ ਦਬਾਅ ਪੈ ਸਕਦਾ ਹੈ।"
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
