Russia ready to tok wit Ukraine and US to end war

Russia dey "ready for principle" to start tok again wit US and Ukraine make dem end di conflict, Vladimir Putin top tok-tok pesin tok.

Yuri Ushakov tok dis one afta Putin meet US President Donald Trump special envoy, Steve Witkoff for Russian city of St Petersburg.

Ukraine President Volodymyr Zelensky and im European allies don dey push Moscow make dem resume di tok wey dem bin suspend for February, and Ushakov tok say dem fit hold new round next month, for Abu Dhabi.

Russia don refuse to tok for months becos dem believe say dem dey win for battlefield as Ukraine dey face serious shortage of interceptors against di deadly Russian missile attacks.

Wetin happun for meeting between Putin and Trump envoy

Trump envoy Witkoff go St Petersburg afta e meet Ukraine President Volodymyr Zelensky and di leaders of Norway and Finland for Oslo on Monday. Ushakov tok say dia ideas no dey very "useful".

Top officials from Russia, Ukraine and di US don hold several rounds of tok wey dey aim at ending di war wey start for February 2022 wen Putin launch full invasion for Ukraine.

Di toks, don dey on hold, as Kremlin dey blame di "massive" strikes wey Ukraine carry out come on Russia during di general elections last month.

Afta di toks for St Petersburg on Wednesday, Ushakov suggest say dem fit hold new round for around 10 November for Abu Dhabi, di capital of di United Arab Emirates.

E stress say di talks gatz focus on "building one security system for Russia and Ukraine afta di conflict don end."

One US official later tell BBC say Witkoff and Trump son-in-law Jared Kushner, na anoda key negotiate, e bin propose for Tuesday tok for Norway capital "make dem meet for technical level between di US, Russia, and Ukraine".

"Dis one dey acceptable by di Ukrainians for Oslo yesterday and by di Russians for St Petersburg today," di official wey tok base on anonymity, tok.

Ushakov also tell reporters say President Putin don tell Witkoff say Russian soldiers dey advance everywia across di long front line and dem get "strategic initiative".

Ukraine and im European allies dey argue against Putin claim, pointing to stalemate for di front.

Di toks for Oslo and St Petersburg hold as di quarrel between Ukraine and di US dey grow.

Trump don tok say time don reach for Ukraine to get new president, and recently "make somebody else to negotiate on behalf of Ukraine".

Ahead of di US midterm elections wey go hold next month, Trump dey try blame Ukraine attacks on Russian oil refineries for di fuel prices wey don dey rise since di start of di US-led war on Iran.

European leaders don express dia concern about recent US statement about Russia.