Imvo n'Imvano: F1 ishobora guhindura iki mu bukungu bw'u Rwanda?

Ndabashuhuje mwese mukurikiye BBC, none ni ku wa gatandatu tariki 31 y'ukwezi kwa 10 umwaka wa 2026, tugeze mu mwanya w'ikiganiro Imvo n'Imvano.

Turi mu gace ka Bugesera, ahazubakwa imihanda izajya ikinirwamo irushanwa rya Formula 1, ni nyuma yuko u Rwanda rwemejwe nk'igihugu kizakira irushanwa rya African Grand Prix mu gihe cy'imyaka 10 guhera mu ntangiriro ya za 2030.

Twasuye abatuye mu karere ka Bugesera ahazubakwa iyo mihanda, biteze kuhabona amahirwe menshi y'akazi. Bugesera iri mu birometero 40 uturutse mu murwa mukuru Kigali.

Uretse abo baturiye Bugesera, turumva n'abasesenguzi mu by'ubukungu batubwire uburyo aya marushanwa ashobora guhindura ubukungu bw'igihugu muri rusange.

Ese abasanzwe bakina umukino wo gusiganwa mu modoka mu Rwanda bo bariyumva bate mu mukino wa Formula1?

Abawuzi cyane na bo twabahaye ijambo, aho bavuga ko Formula 1 ari nk'igikombe cy'isi mu mupira w'amaguru ariko yo ikagira amategeko akakaye abawukina bagenderaho.

Ikiganiro cyo kuri uyu wa gatandatu mwagiteguriwe na Yves Bucyana.