Fally Ipupa yihanganishije imiryango y'abapfiriye mu gitaramo cye

Umuhanzi Fally Ipupa wo muri Repubulika ya Demokarasi ya Congo yihanganishije imiryango y'abantu 11 bapfiriye mu gitaramo cye ku wa gatandatu muri stade nini yo mu murwa mukuru Kinshasa, izwi nka Stade des Martyrs de la Pentecôte.

Iyi stade yari yuzuye birenze ubushobozi bwayo bwo kwakira abantu 80,000 - ndetse n'ibirongozi (corridors) byayo byari byuzuye, nkuko uwabibonye yabivuze.

Amakuru avuga ko ingano y'abantu yarenze cyane umubare w'abo abashinzwe umutekano bashoboraga kugenzura.

Abapolisi babiri bari muri abo bapfuye.

Minisitiri w'ubutegetsi bw'igihugu wa DR Congo, Daniel Aselo Okito, yasabye ko abateguye icyo gitaramo bahanwa kubera kunanirwa kutarenza umubare w'abari kucyitabira.

Mu butumwa bwo kuri Facebook, Fally Ipupa yavuze ko "nubwo hafashwe ingamba zose zo gukurikiza bikomeye amabwiriza y'umutekano, ibintu bibabaje byabaye kidobya ku musozo w'igitaramo".

Ati: "Birambabaje cyane kandi nihanganishije cyane imiryango yose.

"Imana mu mpuhwe zayo nyinshi yihanganishe imitima yapfushije abayo".