Ubwato bwajyaga mu Burusiya buracyari gushya nyuma y'igitero bwagabweho mu kigobe cya Finland

    • Umwanditsi, Hafsa Khalil
  • Yatangajwe
  • Igihe co gusoma: iminota 3

Abategetsi bavuze ko ibikorwa by'ubutabazi no kuzimya umuriro bikomeje ku bwato butwara imizigo bw'Uburusiya bwarashwe mu gitero cy'indege nto y'intambara itajyamo umupilote (izwi nka 'drone') mu burasirazuba bw'ikigobe cya Finland.

Ubwo bwato – bwitwa Sparta II – bwari burimo kujya ku butaka bw'Uburusiya bwo hanze y'ubuso busanzwe bw'Uburusiya, mu gace ka Kaliningrad kari mu nyanja ya Baltic, ubwo bwaraswaga mu gitondo cyo ku wa gatandatu, ubundi bukayobera mu mazi ya Finland.

Ingabo za Finland zavuze ko Ukraine ishobora kuba ari yo iri inyuma y'icyo gitero. Nta cyo Ukraine iratangaza.

Ku cyumweru, urwego rwa Finland rurinda imipaka rwavuze ko akazi kari gakomeje ko gutuma ubwo bwato butarohama ariko rwavuze ko nta byago ruzi ibyabaye byaba biteje ku ngendo zo mu nyanja zinyura mu bice bikikije aho hantu.

Kugeza ku cyumweru amazi yari akirimo gukoreshwa mu kuzimya umuriro kuri ubwo bwato, ndetse Finland yavuze ko ibikoresho bya Estonia n'Uburusiya na byo byari birimo gukoreshwa mu bikorwa by'ubutabazi.

Ashingiye ku makuru y'ibanze, Guverineri wa Kaliningrad Alexei Besprozvannykh yavuze ko 'drones' ebyiri zakoreshejwe muri icyo gitero, ndetse yavuze ko ibyabaye "nta nkeke" biteje ku bicyenerwa by'ibanze n'abatuye kuri ubwo butaka.

Minisitiri w'intebe wa Finland Petteri Orpo yagize ati: "Intambara irimo kugera hafi yacu cyane." Yongeyeho ati: "Ukraine ifite uburenganzira bwo kwirwanaho ku mushotoranyi."

Ubwo bwato bwa Sparta II bwafatiwe ibihano n'Amerika mu mwaka wa 2022 ndetse na Ukraine yabufatiye ibihano muri uyu mwaka wa 2026, kandi ni ubwa kompanyi yo mu Burusiya, nkuko bitangazwa na leta ya Ukraine na leta y'Amerika.

Ku rubuga rwayo rwo kuri murandasi (internet), iyo kompanyi ivuga ko yashinzwe mu rwego rwa minisiteri y'ingabo y'Uburusiya mu mwaka wa 2011 ndetse ko kuva mu mwaka wa 2015 ikora mu rwego rw'ubwubatsi bwo mu gisirikare.

Kaliningrad ni ubutaka bw'Uburusiya buri hanze y'ubuso busanzwe bw'icyo gihugu. Iri hagati ya Pologne na Lithuania.

Minisitiri w'ingabo wa Finland Antti Häkkänen yavuze ko urwego rushinzwe gucunga umutekano wo ku mipaka y'icyo gihugu ari rwo rurimo gukora iperereza kuri icyo gitero, kandi ko rurimo gukorana n'abandi bategetsi bireba.

Minisiteri y'ingabo ya Finland yavuze ko n'umuryango wo gutabarana w'Uburayi n'Amerika (OTAN/NATO) wabimenyeshejwe.

Inyanja ya Baltic yahindutse ahantu habera ibitero bya hato na hato mu ntambara y'Uburusiya na Ukraine, yatangiye ubwo Uburusiya bwagabaga igitero gisesuye kuri Ukraine mu mwaka wa 2022. Vuba aha Ukraine yakajije umurego mu bitero bigera mu ntera ndende igaba ku Burusiya birenga ahari imirongo y'imbere yo ku rugamba.

Muri uku kwezi, 'drone' ya Ukraine yarashe ubwato bw'intambara bw'Uburusiya mu kigobe cya Finland.