RSSB Tigers ibaye ikipe ya mbere yo mu Rwanda itwaye igikombe cya BAL
Ahavuye isanamu, RBA
Kigali - Mu ijoro ryo kuri iki cyumweru RSSB Tigers yabaye ikipe ya mbere yo mu Rwanda no muri Afurika y'iburasirazuba yegukanye irushanwa ry'amakipe yabaye aya mbere muri Basketball muri Afurika itsinze amanota 90 kuri 88 ya Petro de Luanda yo muri Angola.
RSSB Tigers yatangiye nabi uyu mukino kuko byageze aho irushwa amanota 20 na Petro, ariko buhoro buhoro igenda yinjira mu mukino ibifashijwemo cyane cyane na Leonard Craig Randall II watsinze amanota 33 wenyine.
Tigers ni ubwa mbere ikinnye iri rushanwa nyuma yo kuryinjiramo ibyumweru bicye mbere y'uko ritangira isimbuye APR BBC yo mu Rwanda.
Naho Petro yo yakinnye buri rushanwa ngarukamwaka rya BAL kuva ryatangira mu 2021, uyu ni umukino wa nyuma wa kane yari ikinnye kandi yaritwaye mu 2024.
Umunyamerika Randall II wa RSSB Tigers niwe watowe nk'umukinnyi warushije abandi kwitwara neza (MVP) muri iri rushanwa, aho yatsinze ikigereranyo cy'amanota 26 kuri buri mukino w'iri rushanwa ryariho riba ku nshuro ya gatandatu.
Uyu mukino wa nyuma ubwawo kuva mu gace ka kabiri waranzwe no kwegerana cyane mu manota kugera mu minota ya nyuma aho RSSB Tigers yabashije kujya imbere gato ikarangiza irusha Petro amanota abiri gusa.
Abakinnyi n'umutoza ba Petro bagaragaje kutishimira ibyemezo bimwe na bimwe by'abasifuzi mu minota ya nyuma muri BK Arena yari yuzuye abafane benshi bashyigikiye Tigers.
Tigers - ikipe y'ikigo cy'igihugu cy'ubwiteganyirize bw'abakozi (RSSB), yashinzwe mu 2019 ariko iki kigo kiyifata mu myaka ibiri ishize ihita yongera RSSB ku izina ryayo inaba ikipe ibasha kuzana abakinnyi barimo n'abavuye muri Amerika.
Naho Petro de Luanda ni ikipe y'ikigo cya leta ya Angola cy'ubucukuzi n'ubucuruzi bw'ibitoro, Sonangol, ni imwe mu makipe ya Basketball akuze muri Afurika kuko yashinzwe mu myaka irenga 45 ishize.
Basketball Africa League ni irushanwa ry'amakipe yabaye aya mbere mu bihugu byayo muri Afurika riterwa inkunga na shampiyona ya NBA yo muri Amerika hamwe n'abandi bashoramari barimo na leta y'u Rwanda.
Rigamije kugaragaza impano umugabane wa Afurika ufite muri Basketball, gushaka abakinnyi bashobora kujya muri NBA, no kwagura kurushaho uyu mukino w'abanyamerika muri Afurika.
