Mali: Humvikanye ibiturika n'urufaya rw'amasasu mu gihe imitwe yitwaje intwaro yagabye ibitero bihuriweho

Ingabo za Mali zivuga ko imitwe yitwaje intwaro itaramenyekana yateye "ahantu hamwe na hamwe n'ibigo bimwe na bimwe bya gisirikare" mu murwa mukuru Bamako no mu bindi bice by'igihugu.

Mu itangazo ingabo za Mali (Forces Armées Maliennes, FAMA) zasohoye mu gitondo cyo ku wa gatandatu, zavuze ko "imirwano irakomeje", zongeraho ko zirimo gusubiza inyuma abateye.

Abategetsi bashishikarije abaturage gukomeza gutuza no kuba maso.

Ambasade y'Amerika muri Mali yaburiye Abanyamerika "kwikinga aho bari", nyuma y'amakuru y'ibiturika n'urusaku rw'amasasu.

Uko kuburira kuvuga ko ibyabaye byumvikanye hafi y'ikigo cya gisirikare cya Kati, kiri hanze y'i Bamako, n'ikibuga mpuzamahanga cy'indege cya Modibo Keïta kiri i Bamako. Ambasade y'Amerika yagiriye abantu inama yo "kwirinda gukorera ingendo aha hantu kugeza andi makuru abonetse".

Ulf Laessing, ukuriye akarere ka Sahel mu kigo cyitwa Konrad Adenauer Foundation gikorera muri Mali, yabwiye BBC ko ibyabaye, uko bigaragara, ari cyo "gitero cya mbere kinini cyane gihuriweho cy'abiyitirira Isilamu kigabwe kuri Mali mu myaka [myinshi] ishize".

FAMA yavuze ko irimo kurwana n'"imitwe y'iterabwoba" itaramenyekana, ariko amakuru y'uko bimeze ntarasobanuka.

Videwo zahererekanyijwe ku mbuga nkoranyambaga zigasesengurwa n'amatsinda y'iperereza agenzura ibitangazwa ku mbuga za internet, zumvikanisha ko hashobora kuba habayeho gufatanya hagati y'umutwe wiyitirira Isilamu wa JNIM n'inyeshyamba zo mu mutwe wa FLA w'Aba-Touareg.

Mohamed Elmaouloud Ramadane, umuvugizi w'umutwe wa FLA (Front de Libération de l'Azawad), yatangaje ku mbuga nkoranyambaga ko abarwanyi bawo bafashe ibirindiro byinshi mu mujyi wa Kidal no mu mujyi wa Gao.

Yanashishikarije Burkina Faso na Niger kudatabara. Ibyo bihugu bibiri bitegetswe n'igisirikare, bihuriye na Mali mu muryango wa AES wikuye ku muryango munini w'ibihugu byo muri ako karere wa CEDEAO. BBC ntiyashoboye kugenzura ibyo yavuze.

Abatuye i Bamako babwiye ibiro ntaramakuru Reuters ko abasirikare bagabwe mu bice binyuranye by'uwo mujyi, imihanda yerekeza mu bice by'ingenzi irafungwa.

Umugenzi umwe, wari urimo gusubira i Bamako, yabwiye BBC ko ingendo zose z'indege zaburijwemo mu gitondo cyo ku wa gatandatu. Ntibirasobanuka niba ikibuga cy'indege cyagizweho ingaruka mu buryo butaziguye.

Undi mugenzi yavuze ko yabyutse yumva ibyumvikanaga ko ari ibitero byagabwe bihuriweho, birimo bibiri byagabwe mu murwa mukuru.

Mali imaze imyaka ihanganye n'ibitero by'inyeshyamba zigendera ku mahame akaze yiyitirira idini ya Isilamu.

Leta ya gisirikare ya Mali, iyobowe na Assimi Goïta, yageze ku butegetsi mu 2021, isezeranya kongera umutekano no gutsinsura imitwe yitwaje intwaro.

Kuva icyo gihe, yahinduye umuvuno, izibukira abafatanyabikorwa bo mu burengerazuba bw'isi, ishimangira umubano n'abacanshuro b'Abarusiya.

Mu gihe cya vuba aha gishize, Mali yatangiye ubufatanye bwa gisirikare n'Amerika.