Ni ab''amazina akomeye' bagambirirwa kwicwa – Trump nyuma yuko amasasu yumvikanye muri hoteli yari arimo

Perezida Donald Trump yakuwe igitaraganya mu birori byo gusangira n'abanyamakuru batara amakuru mu biro bya Perezida w'Amerika (White House) nyuma yuko humvikanye amasasu mu ijoro ryo ku wa gatandatu.

Byaberaga muri Hoteli Hilton y'i Washington DC.

Perezida w'Amerika avuga ko umugabo witwaje imbunda nyinshi yashyizwe hasi "na zimwe mu ntwari zikomeye cyane" zo mu itsinda ry'Amerika ricunga umutekano wa perezida n'uw'abandi bategetsi bakuru n'abahoze ari abategetsi bakuru, rizwi nka 'US Secret Service'.

Ibitangazamakuru byo muri Amerika byatangaje ko ucyekwa ari Cole Tomas Allen, w'imyaka 31, ukomoka i Torrance muri leta ya California. Abategetsi bavuga ko yari wenyine nta wundi bakoranaga.

Mu kiganiro n'abanyamakuru, umukuru wa polisi ikorera mu mujyi wa Washington DC, Jeffery W Carroll, yavuze ko uwo ucyekwa yari umushyitsi muri iyo hoteli yaberagamo ibyo birori ndetse ko icyumba yari arimo cyafashwe mu rwego rw'iperereza.

Trump avuga ko umwe mu bagize itsinda rya 'US Secret Service' yarashwe yegerewe cyane ariko arokorwa n'ijaketi ye itamenwa n'amasasu. Ubu ari mu bitaro aho arimo kuvurirwa ibikomere. Trump yavuze ko "ameze neza".

Perezida yatangaje videwo y'ikigaragara ko ari intangiriro y'uko kurasa, muri ibyo birori byari byanitabiriwe n'umugore we Melania Trump.

Ubwo yari abajijwe mu kiganiro n'abanyamakuru nyuma yaho uko ibyabaye bizamugiraho ingaruka nka Perezida, Trump yagize ati: "Nkunda kutabitekerezaho."

"Mbaho ubuzima busanzwe cyane usuzumye, urabizi, ni ubuzima bw'akaga. Ntekereza ko mbwitwaramo neza nkuko bushobora kwitwarwamo."

Yavuze ko uwo ucyekwa ari "umuntu w'umurwayi cyane". Ati: "Ntidushaka ko ibintu nk'ibi bibaho."

Umuyobozi w'umujyi wa Washington DC yavuze ko uwo ucyekwa arimo kuvurirwa mu bitaro biri hafi aho kandi ko akiri mu maboko ya polisi. Biteganyijwe ko ashyirirwaho ibirego ku wa mbere.

Abari bitabiriye ibirori byo gusangira iryo funguro rya nimugoroba bikinze munsi y'ameza, mu gihe ibintu byari bihindutse akavuyo, mu rujijo rwinshi.

Perezida Trump yatangaje ku mbuga nkoranyambaga ifoto y'umugabo ucyekwa. Yavuze ko yayitangaje mu nyungu zo gukorera mu mucyo.

Trump yabajijwe n'umunyamakuru niba hari icyo atekereza ku magerageza amaze kubaho kugeza ubu yo kumwica.

Mu myaka ya vuba aha ishize, hamaze kubaho amagerageza abiri yo kwica Trump – polisi ntiravuga impamvu y'uwarashe mu ijoro ryo ku wa gatandatu.

Trump yavuze ko yize iby'abagiye bicwa, avuga ko yemera ko abantu bagambirira kwica abakoze "impinduka ikomeye cyane". Yatanze urugero rw'uwari Perezida w'Amerika Abraham Lincoln, wishwe.

Yagize ati: "Sinshobora kwiyumvisha [ko hari] imyuga myinshi iteje akaga cyane [kurusha kuba Perezida]."

Trump avuga ko ari "amazina akomeye" agambirirwa kwicwa.

Yagize ati: "Sinakabivuze gutya [ariko] ntewe icyubahiro na byo." Yongeyeho ko ubutegetsi bwe bwakoreye igihugu ibintu byinshi ariko ko abantu bamwe batabyishimiye.