US: Umugore n'umwana basimbutse ku gisenge bahunga wa mugabo wishe abana umunani abarashe

Umugore n'umwana basimbutse ku gisenge cy'inzu bahunga umugabo warimo arasa abagize umuryango we i Shreveport muri leta ya Louisiana muri Amerika aho uwo mugabo yishe abana umunani, barimo barindwi be.

Abategetsi bavuga ko polisi yatabajwe bwa mbere ihamagawe kuri telephone hafi saa kumi n'ebyiri z'igitondo ku isaha yaho ku cyumweru.

Uwahamagaye yavuze ko ari "hejuru y'inzu" mu gihe uwarimo arasa yari imbere mu nzu.

Polisi ntabwo yatangaje imyirondoro y'aba barokotse, cyangwa ngo ivuge icyo bapfana n'uwakoze iki gitero, ariko ivuga ko bombi ubu bameze neza.

Ukekwa yapfuye arashwe mu kurasana n'abapolisi, nubwo bitaramenyekana neza niba ari we wirashe cyangwa yararashwe na polisi.

Abagore babiri, barimo nyina wa bariya bana barindwi, barakomeretse muri uko kurasa kwakozwe n'uwo mugabo, kandi baracyari mu bitaro, nk'uko polisi ibivuga.

Umwana wa cyenda na we yajyanywe kwa muganga kubera kuvunika ubwo yasimbukaga hejuru y'inzu mu guhunga.

Mu bana umunani bishwe – abavandimwe barindwi na mubyara wabo umwe – ni abakobwa batanu n'abahungu batatu. Bari mu myaka kuva kuri 3 kugera kuri 11, nk'uko abategetsi baho babitangaza.

Nyina w'aba bana yavuze ko abo bana bishwe ari Jayla Elkins, w'imyaka 3; Shayla Elkins, 5; Kayla Pugh, 6; Layla Pugh, 7; Markaydon Pugh, 10; Sariahh Snow, 11; Khedarrion Snow, 6; na Braylon Snow, 5.

Agaruka ku byabaye, Wayne Smith ukuriye polisi ya Shreveport yavuze ko mu minota micye nyuma yo gutabaza, uwahamagaye ari ku gisenge cy'inzu yavuze ko "we n'abana be basimbutse ku gisenge bakajya inyuma mu gikari".

Nyuma y'iminota, uyu mugabo yateye no ku rundi rugo, aho undi watabaje polisi kuri telefone yavuze ko "umukunzi we yamurashe, agafata abane be batatu, agahunga".

Nyuma gato yo guhamagarwa, polisi yakiriye amakuru y'imodoka yibwe, n'amakuru ko abo bana bakuwe ku rugo rwa kabiri bashobora kuba bari muri iyo modoka.

Ahagana saa kumi n'ebyiri n'igice, abapolisi babashije kubona no kugera ku ukekwa barasana nawe.

Nyuma bamugezeho yapfiriye mu modoka, nta bana bari muri iyo modoka.

Polisi ntiramenya icyamuteye gukora ibi.

Smith avuga ko uyu mugabo yitwa Shamar Elkins, yari afite amateka y'ibyaha by'ubugizi bwa nabi gusa ntiyatanze amakuru arambuye.

Yagize ati: "Ibimenyetso byose birerekana ko ibi byahereye ku ntonganya zo mu rugo", gusa uko yabonye imbunda ntabwo bizwi kugeza ubu.

Ubu bwicanyi bwabaye nyuma y'iminsi 10 muri ako gace hatangijwe ikigo cyo kurwanya ihohoterwa n'urugomo bikorerwa mu ngo.

Henry Whitehorn uri mu bagishinze ati: "Sindimo kwemera ko nyuma y'iminsi gusa uyu muryango wacu washengurwa n'inkuru ibabaje cyane nk'iyi twabonye".

Polisi ivuga ko yari yamenye amakuru ko uriya mugabo ari mu rugendo rwa gatanya n'umugore we kandi yagombaga kujya mu rukiko ku wa mbere. Iperereza ku byabaye riracyakomeje.