Reform 'ddim yn yn diystyru' pleidlais o ddiffyg hyder yn Llywydd y Senedd

Daeth Huw Irranca-Davies yn Llywydd y Senedd yn dilyn etholiad mis Mai
- Cyhoeddwyd
Mae gwleidydd blaenllaw o blaid Reform wedi dweud nad yw pleidlais o ddiffyg hyder yn Llywydd y Senedd, Huw Irranca-Davies, wedi'i diystyru, yn dilyn penderfyniad i wahardd aelod o'r blaid rhag siarad yn y siambr.
Dywedodd prif chwip Reform yn y Senedd, Llŷr Powell, fod gan ei gyd-Aelod, Joe Martin, yr hawl i godi "pryderon dilys", a bod yr hawl honno'n cael ei thorri.
Dywedwyd wrth Martin na fyddai'n cael ei alw i siarad yn y Senedd nes iddo ymddiheuro am sylwadau a wnaeth ddydd Mawrth ynghylch honiadau bod pobl wyn yn cael eu "disodli" yn y DU.
Dywedodd y Llywydd, Huw Irranca-Davies, fod y sylwadau a wnaed gan Joe Martin, aelod dros Gaerdydd Penarth, yn amlwg yn "wahaniaethol" ac yn "sarhaus".
Mewn ymateb, penderfynodd Reform beidio cyfrannu i ran fwyaf o drafodaethau y Senedd ddydd Mercher, gan gynnal boicot o'r cyfarfod llawn.
Reform yn cynnal boicot o gyfarfod llawn y Senedd wedi gwaharddiad AS
- Cyhoeddwyd7 o ddyddiau yn ôl
Gwahardd Joe Martin AS rhag siarad yn y Senedd nes iddo ymddiheuro
- Cyhoeddwyd10 Tachwedd
ASau yn cerdded allan o'r Senedd wedi ail araith ddadleuol gan AS Reform
- Cyhoeddwyd17 Mehefin
Ar raglen Breakfast BBC Radio Wales, gofynnwyd i Llŷr Powell a oedd Reform yn ystyried cyflwyno pleidlais o ddiffyg hyder yn y Llywydd.
Dywedodd: "Dydw i ddim yn mynd i ddweud ein bod ni'n mynd i wneud hynny nawr, ond yr hyn y byddwn i'n ei ddweud yw nad yw hynny wedi'i ddiystyru ar hyn o bryd.
"Mae rhyddid i lefaru a hawl aelodau i godi pryderon dilys yn rhywbeth ddylai fod yn brif flaenoriaeth.
"Ac ar hyn o bryd, rydyn ni'n gweld bod hynny'n cael ei danseilio."
Gwadodd Powell fod Joe Martin wedi cyfeirio at ddamcaniaeth cynllwyn asgell dde eithafol sy'n honni bod y boblogaeth wyn yn cael ei disodli'n fwriadol drwy fewnfudo pobl o grwpiau ethnig eraill.
Dywedodd: "Roedd Joe yn gofyn cwestiwn dilys yn seiliedig ar newidiadau demograffig.
"Mae'r syniad ei fod yn cyflwyno rhyw ddamcaniaeth asgell dde eithafol yn anghywir.
"Roedd yn sôn am bryderon dilys, ac mae'r data ar gael i bawb ei weld."

Cyhoeddodd Joe Martin, arweinydd Reform yng Nghymru Helen Jenner a phrif chwip y blaid, Llŷr Powell, y boicot ar risiau'r Senedd ddydd Mercher
Yn ystod cwestiynau ar fusnes y llywodraeth ddydd Mawrth, gofynnodd Joe Martin i'r Gweinidog, Heledd Fychan, am ddatganiad ynghylch yr hyn a ddisgrifiodd fel "disodli pobl wyn o Brydain" yn y DU.
Dywedodd: "Oherwydd mewnfudo ar raddfa eang a chyfraddau geni gwahanol, byddwn yn y lleiafrif yn ein gwlad ein hunain ymhen dim ond 37 mlynedd, yn 2063."
Gofynnodd Heledd Fychan i'r Dirprwy Lywydd, a oedd yn cadeirio'r sesiwn ar y pryd, a oedd y cwestiwn yn torri rheolau'r Senedd.
Yn ddiweddarach, ar ôl adolygu'r cofnod, dywedodd Huw Irranca-Davies fod cyfraniad Joe Martin "wedi cythruddo'n ddiangen ac yn fwriadol dramgwyddus".
Dywedodd y Llywydd na fyddai'n galw ar Martin i siarad yn y Siambr nes iddo ymddiheuro.
Mae prif weithredwr yr elusen Race Equality First, Aliya Mohammed, hefyd wedi beirniadu sylwadau Martin.
Ddydd Mercher, dywedodd fod y syniad bod pobl wyn yn cael eu "disodli" yn gysylltiedig â damcaniaeth cynllwyn sy'n creu rhaniadau ac yn portreadu pobl o gefndiroedd ethnig lleiafrifol ar gam fel bygythiad.
Nid dyma'r tro cyntaf i Joe Martin wynebu beirniadaeth am ei sylwadau yn y Senedd.
Ym mis Mehefin, cafodd ei gyhuddo gan Blaid Cymru o ddefnyddio rhethreg beryglus ar ôl honni bod ymosodiadau gan geiswyr lloches o Swdan yn anochel.
Y diwrnod canlynol, gadawodd Aelodau'r Senedd y Siambr yn ystod araith ganddo ar ôl iddo wneud sylwadau cellweirus fod myfyrwyr o Gymru yn methu darllen a bod nyrsys o India yn cymryd swyddi pobl Cymru.
Yn ddiweddarach, cafodd ei feirniadu eto gan y Llywydd am sylwadau sarhaus yn ystod dadl am Wasanaeth Rhywedd Cymru, sydd wedi bod yn wynebu argyfwng.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.