'Mor falch mai'n stryd ni yw un o'r rhai mwya' cŵl yn y byd'

Oriel luniauNeidio heibio'r oriel luniauSleid1 o 10, Mae Heol Maengwyn wedi dod i sylw'r byd, Mae Heol Maengwyn wedi dod i sylw'r byd
GanSara Down-Roberts
BBC Cymru Fyw
  • Cyhoeddwyd

Heol Maengwyn ym Machynlleth yw un o'r strydoedd mwyaf cŵl yn y byd yn ôl y cylchgrawn Time Out.

Does yna yr un o stryd arall o Gymru ar y rhestr a dim ond dwy yn y DU - Golborne Road yn Llundain a York Road yn Birmingham - sydd wedi'u cynnwys.

Ruth Hughes, y cynghorydd tre a chynghorydd Glantwymyn ar Gyngor PowysFfynhonnell y llun, Llun cyfrannydd
Disgrifiad o’r llun,

Ruth Hughes, y cynghorydd tre a chynghorydd Glantwymyn ar Gyngor Powys

"Mae'n newyddion ffantastig a chwbl anhygoel i Fachynlleth," meddai Rwth Hughes sydd wedi byw yn yr ardal gydol ei hoes ac yn gynghorydd tre.

"Ni gyd mor falch ac yn neidio o lawenydd mai'n stryd ni yw'r un mwya' cŵl yn y byd.

"Dyw'r newyddion ddim yn synnu fi gan fod Heol Maengwyn yn llawn o siopau annibynnol amrywiol.

"Yr hyn sy'n bwysig, wrth gwrs, yw bod yr ardal yn denu twristiaid - 'dan ni mor ddibynnol ar hynny.

"Mae cynnyrch y siopau yn newid o hyd ac wrth i rai siopau ddiflannu mae 'na eraill yn dod yn eu lle.

"Ychydig iawn o siopau gwag sydd ar Heol Maengwyn. Mae'n stryd fywiog iawn - mae yma siopau a llefydd bwyta hynod o liwgar sy'n denu. Ni wrth ein bodd."

Mae'r newyddion yn un calonogol iawn, medd Rachel BurgessFfynhonnell y llun, Llun cyfrannydd
Disgrifiad o’r llun,

Mae'r newyddion yn un calonogol iawn, medd Rachel Burgess

Ryw flwyddyn a hanner yn ôl fe agorodd Rachel Burgess siop ddillad Gweni gwyllt ar Heol Maengwyn - mae'r siop yn gwerthu cynnyrch o Brydain yn unig.

Wrth ymateb i'r newyddion bod ganddi siop ar un o strydoedd mwyaf cŵl y byd dywedodd: "Dwi jyst yn gobeithio fod pawb yn dathlu ym Machynlleth. Mae'n rili sbesial a dwi'n hollol gytuno bod be' sy'n mynd ymlaen fan hyn yn arbennig iawn.

"Ni gyd yn fusnesau bach fan hyn ac mae nifer iawn ohonon ni sy'n berchen ar fusnes yn ferched - ac mae hwnna'n rhywbeth unigryw iawn.

"Mae'n hyfryd rhannu Machynlleth gyda'r byd - mae'n bwysig darparu ar gyfer pobl leol ond denu pobl o bant hefyd."

Elin Angharad - un o ferched busnes llwyddiannus Heol Maengwyn
Disgrifiad o’r llun,

Elin Angharad - un o ferched busnes llwyddiannus Heol Maengwyn

Dair blynedd yn ôl fe agorodd Elin Angharad siop cynnrych lledr ar Heol Maengwyn.

"Mae'n fraint cael ein rhestru fel rhif 22 yn y byd - fel un o'r siopau mwyaf cŵl. Dewch yma i 'neud eich siopa 'Dolig.

"Mae 'na deimlad gwirioneddol yma o bobl eisau cefnogi'n lleol, mae yma yn sicr rywbeth gwahanol a theimlad cartrefol.

"Be' ma'r newyddion yn ei olygu yw bod be' bynnag 'da ni'n neud yma yn gweithio. Ma'n hymdrechion ni yn llwyddiannus a da hynny."

Disgrifiad,

Busnesau Machynlleth yn ymateb i'r newyddion mai Heol Maengwyn yw un o'r strydoedd mwyaf cŵl yn y byd

Wrth i'r ddrama Owain a Henry gael ei pherfformio yng Nghaerdydd mae Owain Glyndŵr oedd â'i Senedd-dy ym Machynlleth wedi cael cryn sylw ac roedd yna groeso cynnes iawn i'r newyddion diweddaraf yng Nghaffi Glyndŵr ar Heol Maengwyn.

"Mae'n fendigedig clywed y newyddion ond roeddan ni'n gwybod beth bynnag bod Machynlleth yn lle cŵl," meddai'r perchennog Sarah Jones.

"Ar Heol Maengwyn ma' gynnon ni siopau bendigedig a ma' gen i gaffi cŵl ers tair blynedd.

"Mae lot o bobl yn dod yma jyst i fod ym Machynlleth - ma' gynnon ni'r hanes yn does? Dwi'n meddwl mai pobl sy'n 'neud y stryd yma'n cŵl a'r siopau.

"Mae'n bwysig iawn cael siopau annibynnol. Mae 'na lot o ddewis. Dyw hi ddim yn stryd fawr iawn ond mae'r siopau yn gwerthu pob math o grefftau - mae yma siop ledr, siop sgidie a siopau dillad - a dwi wedi 'neud hanner fy siopa Dolig ym Machynlleth."

Mach
Disgrifiad o’r llun,

Mae Heol Maengwyn yn hynod liwgar a chroesawgar

Ond be sy'n 'neud stryd yn cŵl? Bob blwyddyn mae cylchgrawn Time Out yn gofyn i olygyddion ac arbenigwyr i ymweld ag ardaloedd ar draws y byd ac yna mae yna gryn ddadlau pwy sydd ar frig y rhestr.

"O Lundain i Leipzig, ac o Muscat i Medellin mae'r strydoedd sydd wedi cyrraedd y rhestr fer eleni yn dangos yr amrywiaeth sy' 'na," meddai llefarydd ar ran Time Out.

"I gyrraedd y brig mae'r tîm yn asesu bwyd, diod, siopau, bywyd nos a busnesau gwbl unigryw."

Song Wat Road yn Bangkok oedd ar frig y rhestr, Golborne Road yn Llundain yn ail a Fernández de Enciso yn Buenos Aires yn drydydd.

Roedd y beirniaid eleni yn amlwg wedi dotio ar amrywiaeth unigryw Heol Maengwyn ac roedd yna sylw hefyd i'r farchnad sy'n cael ei chynnal ar y stryd bob dydd Mercher.

Gobeithio y bydd y newyddion yn denu mwy o ymwelwyr i'r ardal, medd Gina sy'n gweithio yn siop esgidiau RED
Disgrifiad o’r llun,

Gobeithio y bydd y newyddion yn denu mwy o ymwelwyr i'r ardal, medd Gina sy'n gweithio yn siop esgidiau RED

Mae pob esgid yn siop RED (wedi'i henwi ar ôl y perchennog Ruth Emily Davey) yn gwbl unigryw - pob esgid wedi'i gwneud â llaw a nifer yn cael eu gwneud yn arbennig ar gyfer cwsmer.

Dywed Gina Walker sy'n gweithio yn y siop ei bod yn "neis cael newyddion da ym Machynlleth".

"Mae'n newyddion da i bawb ar y stryd. Mae'n neis cael clod. Fel mae eraill wedi sôn ni mor greadigol 'ma - mae 'na siopau sy'n cael eu rhedeg gan ferched ond hefyd pob math o weithdai - er enghraifft gweithdai gemwaith."

Yn 2027 bydd Eisteddfod Genedlaethol Maldwyn Meirionnydd yn ymweld â'r ardal ond cyn hynny mae Gina yn gobeithio y bydd y newyddion diweddaraf yn dod â lot mwy o bobl i'r stryd ac i'r ardal yn ehangach.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol .

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig