Mei Gwynedd ac Oasis: 'It's not gobbledegook Liam it's Cymraeg!'

Llun o Mei Gwynedd a llun o Liam GallagherFfynhonnell y llun, Mei Gwynedd/Reuteurs
Disgrifiad o’r llun,

Mei Gwynedd a Liam Gallagher

GanBryn Jones
BBC Cymru Fyw
  • Cyhoeddwyd

Mae'r cerddor Mei Gwynedd wedi sôn sut wnaeth noson allan efo'r band Oasis droi'n sgwrs am gerddoriaeth Cymraeg, yr iaith a gwyliau plentyndod y brodyr Gallagher ar Ynys Môn.

Ac yng nghanol y partïo ar ôl un o gyngherddau olaf y band cyn iddyn nhw chwalu yn 2009 roedden nhw'n awyddus i ddysgu mwy.

Ym mis Mehefin 2009 roedd Mei Gwynedd yn chwarae gitâr gyda The Peth ac yn cefnogi Oasis yn Stadiwm y Mileniwm, Caerdydd, fel rhan o'u taith Dig Out Your Soul.

Rhys Ifans a Mei Gwynedd ar y llwyfanFfynhonnell y llun, Llun cyfrannydd
Disgrifiad o’r llun,

Rhys Ifans a Mei Gwynedd gyda The Peth

Yr actor Rhys Ifans oedd prif leisydd The Peth ac fel cyfaill i aelodau Oasis - ac wedi ymddangos yn eu fideo The Importance of Being Idle - roedd y cymdeithasu'n dod yn hawdd.

"Roedd (y gig) yn anhygoel - gallu gweld y grŵp o'n hamser ni - ac roedd o'n brilliant gallu siarad efo nhw hefyd, a siarad yn naturiol efo nhw," meddai Mei Gwynedd ar raglen Beti a'i Phobol ar BBC Radio Cymru.

"Roeddan ni gyd yn licio'r un fath o fiwsig a phethau - roeddan nhw'n grêt.

"Achos roeddan nhw'n ffrindiau da efo Rhys hefyd roedd pethau'n rili hawdd, doedd 'na ddim byd fformal – roeddan ni'n gallu jest yfad efo nhw a chael hwyl efo nhw."

Mei Gwynedd efo aelodau OasisFfynhonnell y llun, Llun cyfrannydd
Disgrifiad o’r llun,

Y brodyr Noel a Liam Gallagher o Oasis efo Mei Gwynedd (yn sbecian tu ôl i Noel) ac aelodau The Peth

Ar ôl y gig fe gafon nhw fynd yn y bws efo Oasis i'w gwesty er mwyn "cario ymlaen efo'r parti" - ac roedd digon i'w drafod.

Fe wnaeth Mei Gwynedd, oedd yn aelod o Beganifs pan yn 13 oed, symud i Fanceinion pan oedd o'n 16 er mwyn astudio technoleg cerddoriaeth.

A gan mai dyna'r ddinas ble magwyd Liam a Noel Gallagher a'r man lle cafodd Oasis ei ffurfio, roedd 'na rannu atgofion.

Rhannu llwyfan gyda Shakin' Stevens a Oasis

Mei Gwynedd ar Beti a'i Phobol

Ond roedd gan Liam Gallagher, prif ganwr y band, brofiad plentyndod o ymweld ag ardal oedd yn gyfarwydd iawn i Mei Gwynedd, a gafodd ei fagu ym mhentref Waunfawr, ger Caernarfon.

Meddai: "Roeddan nhw'n dod i Sir Fôn ar eu gwyliau weithiau a 'they were all talking gobbledygook', medda fo.

"'Well no that's not gobbledygook Liam, that's Welsh, Cymraeg mêt!'"

"Gesh i lifft yn y bws efo nhw nôl i'r hotel yn Bae Caerdydd wedyn a cario ymlaen efo'r parti. Roedden nhw'n rili rili da ac yn dangos lot o ddiddordeb mewn cerddoriaeth Gymraeg hefyd."

Mei Gwynedd gyda Beganifs/Big LeaveFfynhonnell y llun, Llun cyfrannydd
Disgrifiad o’r llun,

Roedd Mei Gwynedd (ail o'r chwith) yn y bandiau Beganifs a Big Leaves efo (chwith i'r dde) Kev Tame, Rhodri Sion ac Osian Gwynedd

O fewn ychydig wythnosau i'r cyngerdd yng Nghaerdydd fe wnaeth y band chwalu. Ddaethon nhw ddim yn ôl at ei gilydd am 16 mlynedd arall pan wnaethon nhw fynd ar daith - roedd y cyngerdd cyntaf yng Nghaerdydd yn 2025.

Roedd croeso mawr i'r newyddion a'r band mor boblogaidd ag erioed – ac ymysg eu ffans mae un o ferched Mei Gwynedd.

"Mae hi'n absolutely obsessed – ac allan o unlle," meddai. "Dwi'n meddwl bod yna rhywbeth ynddyn nhw sydd yn rhywbeth real mae pobl yn licio amdanyn nhw.

"Maen nhw'n 'go iawn' – y caneuon sydd gynnon nhw, yr agwedd sydd gynnon nhw, bob dim - felly dwi'n meddwl bod hwnna wedi taro nodyn hefo'r genhedlaeth ifanc rŵan."

Llun Mei Gwynedd a'i fand a clawr albwmFfynhonnell y llun, Llun cyfrannydd
Disgrifiad o’r llun,

Mei Gwynedd gyda'i fand diweddara, Band Tŷ Potas, yn Eisteddfod Genedlaethol 2026

Mae Mei Gwynedd wedi bod yn un o gerddorion amlycaf y sin roc Gymraeg ers diwedd yr 1980au. Fe wnaeth Beganifs ddatblygu i Big Leaves erbyn diwedd yr 1990au cyn iddo ffurfio Sibrydion.

Mae wedi sefydlu label recordio Jigcal ac mae'n arwain y Gerddorfa Ukelele, sy'n hyrwyddo cerddoriaeth a'r iaith Gymraeg.

Mae ei brosiect cerddorol diweddara, Mei Gwynedd a Band Tŷ Potas, yn chwarae fersiynau o hen glasuron Cymraeg ac yn grŵp byw poblogaidd.

Cafodd albwm o'u perfformiad yn Eisteddfod Genedlaethol y Garreg Las 2026 ei ryddhau ar 6 Tachwedd.

Gallwch wrando ar y cyfweliad llawn efo Mei Gwynedd ar Beti a'i Phobol ar BBC Radio Cymru am 18:00, 8 Tachwedd, ac ar BBC Sounds.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Straeon perthnasol