URC yn 'weithle mwy diogel' wedi canfyddiadau o ddiwylliant gwenwynig

Pêl rygbiGetty Images

Mae chwaraewyr rygbi, hyfforddwyr a staff bellach yn fwy diogel wrth weithio i Undeb Rygbi Cymru (URC) yn dilyn newidiadau sydd wedi'u gwneud yn sgil canfyddiadau o ddiwylliant "gwenwynig", yn ôl rheoleiddiwr cydraddoldeb.

Dywedodd y Comisiwn Cydraddoldeb a Hawliau Dynol (EHRC) fod yr undeb wedi "gwneud y gwaith caled" ac wedi gwneud "gwelliannau" i'r ffordd mae'n delio ag aflonyddu a gwahaniaethu.

Datgelodd rhaglen BBC Wales Investigates yn 2023 honiadau o rywiaeth a chasineb at fenywod yn URC, gan arwain at ymchwiliad annibynnol a gadarnhaodd yr honiadau.

Dywedodd URC eu bod wedi "cyflwyno cyfres o fesurau rhagweithiol" i wella eu diwylliant.

Gweithle 'gwenwynig'

Fe wnaeth adolygiad annibynnol yn 2023 ganfod fod agweddau o'r diwylliant yn URC yn rhywiaethol, yn wrth-fenywaidd, yn hiliol ac yn homoffobig – ac yn mynd heb gael ei herio.

Dywedodd rhai gweithwyr fod y gweithle yn un "gwenwynig" ac fe wnaeth yr undeb ymddiheuro ar y pryd i'r rhai a gafodd eu heffeithio.

Daeth yr adolygiad, a gafodd ei gomisiynu gan URC, yn sgil ymchwiliad gan BBC Cymru i'r undeb.

Ynddo, daeth honiadau o rywiaeth a chasineb at fenywod i'r amlwg, gyda chyn-reolwr rygbi merched Cymru, Charlotte Wathan, yn datgelu bod cydweithiwr arall wedi dweud ei fod eisiau ei "threisio".

Dywedodd Wathan a chydweithiwr benywaidd arall eu bod wedi ystyried lladd eu hunain oherwydd yr hyn y disgrifion nhw fel "diwylliant gwenwynig" o rywiaeth yn URC.

Wythnos ar ôl y rhaglen, ymddiswyddodd cyn-brif weithredwr URC, Steve Phillips, gan dderbyn taliad ymadael o £480,000, gyda Nigel Walker yn cymryd yr awenau dros dro.

URCHuw Evans Picture Agency

Dywedodd URC eu bod wedi "cyflwyno cyfres o fesurau rhagweithiol" i wella eu diwylliant

Dywedodd Mary-Ann Stephenson, cadeirydd y Comisiwn Cydraddoldeb a Hawliau Dynol: "Fe wnaethon ni lofnodi'r cytundeb hwn gydag Undeb Rygbi Cymru i fynd i'r afael â diwylliant yn y gweithle a oedd yn 'wenwynig' i nifer sylweddol o weithwyr, yn ôl adolygiad annibynnol.

"Ers hynny, mae URC wedi gweithio'n galed i wneud yn siŵr bod y sefydliad yn lle mwy diogel i weithio.

"Bellach mae gweithdrefnau gwell ar waith i amddiffyn staff rhag aflonyddu a gwahaniaethu, a ffyrdd llawer mwy effeithiol i staff godi pryderon yn y lle cyntaf."

Er mwyn cwblhau'r cynllun gweithredu, mae'r EHRC yn dweud bod URC wedi:

  • Gwneud hyfforddiant ar aflonyddu rhywiol yn orfodol i bob rheolwr;

  • Cofnodi cwynion am wahaniaethu ac aflonyddu mewn "system safonol";

  • Diweddaru ei asesiad risg o aflonyddu rhywiol;

  • Cael cyngor allanol ar wahaniaethu ac aflonyddu.

Mae'r EHRC bellach wedi dod â'u cytundeb gyda'r undeb i ben oherwydd y datblygiadau sydd wedi'u gwneud.

'Rhaid i ni nawr adeiladu'

Dywedodd prif swyddog pobl URC, Lydia Stirling: "Ers yr adolygiad annibynnol yn 2023, ac yn wir cyn iddo ddod i'w gasgliadau a gwneud ei argymhellion, rydym wedi cyflwyno cyfres o fesurau, protocolau a chanllawiau rhagweithiol i wella ein diwylliant a sicrhau bod ein gwerthoedd yn cael eu cynnal trwy'r busnes.

"Rydym wedi gweithio'n galed i weithredu pob un o argymhellion yr adolygiad annibynnol a'r cytundeb EHRC ac rydym yn hynod ddiolchgar i EHRC am eu canllawiau a'u cyngor yn ystod y cyfnod hwn.

"Mae'n rhaid i ni nawr adeiladu ar y gwaith gwych sydd eisoes wedi'i wneud a pharhau i fodloni ein disgwyliadau ein hunain ar gyfer diwylliant cadarnhaol yn y gweithle."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.