Cymru v Seland Newydd: Wainwright ac Adams allan a Basham yn wythwr

Fe fydd Taine Basham yn dechrau yn safle'r wythwr ddydd Sadwrn ar ôl i Aaron Wainwright ddioddef anaf
- Cyhoeddwyd
Fe fydd Taine Basham yn dechrau gêm ryngwladol am y tro cyntaf mewn pedair blynedd y penwythnos hwn wrth i Gymru groesawu Seland Newydd i Gaerdydd.
Mae Steve Tandy wedi gwneud pedwar newid i'r tîm drechodd Japan o 28-21 ym Mhencampwriaeth y Cenhedloedd brynhawn Sadwrn.
Fe fydd Basham yn dechrau yn safle'r wythwr ar ôl i Aaron Wainwright anafu ei goes yn ystod y fuddugoliaeth yn erbyn Japan.
Mae James Botham hefyd wedi ei gynnwys yn y rheng-ôl yn lle Alex Mann, tra bod Jac Morgan yn cadw ei le fel blaenasgellwr.
Mae Gabriel Hamer-Webb yn cymryd lle Josh Adams ar yr asgell tra bod Adam Beard yn cymryd lle Ben Carter yn yr ail-reng.

Dyma fydd ymddangosiad cyntaf Basham dros Gymru ers Pencampwriaeth y Chwe Gwlad yn 2024
Daeth cadarnhad y bydd y prop, Tomas Francis allan am weddill y bencampwriaeth ar ôl dioddef anaf yn ystod sesiwn hyfforddi yr wythnos hon.
Mae Keiron Assiratti wedi ei alw i'r garfan yn ei le.
Mae Taine Plumtree, Gareth Thomas a Dillon Lewis wedi eu cynnwys ar y fainc tra bod Rhys Carre yn disgyn allan o'r garfan o 23.
Mae'r Crysau Duon yn teithio i Gaerdydd yn dilyn buddugoliaeth gyfforddus o 43-21 yn erbyn Yr Alban y penwythnos diwethaf.
Huw Llywelyn Davies yn hel atgofion am fuddugoliaeth Cymru'n erbyn Seland Newydd yn 1953
Dywedodd Steve Tandy fod y garfan yn "edrych ymlaen at yr her sydd o'n blaenau".
"Roedd yn dda cael y fuddugoliaeth ddydd Sadwrn diwethaf, ond doedd rhai agweddau o'n perfformiad ddim cystal ag yr oedden ni wedi'i ddymuno'i gael.
"Mae'n rhaid i ni godi ein gêm i lefel arall y penwythnos yma a bod yn fwy digyfaddawd yn ein chwarae.
"Mae'r Crysau Duon – un o dimau gorau'r byd – yn dod aton ni i Gaerdydd ac mae pawb o fewn y garfan yn benderfynol o wella'n perfformiad a rhoi popeth dros yr 80 munud cyfan."
Tîm Cymru i wynebu Seland Newydd
Murray; Rees-Zammit, E James, Llewellyn, Hamer-Webb; Costelow, Tomos Williams; N Smith, Lake (capten), Griffin, D Jenkins, Beard, Botham, Morgan Basham.
Eilyddion: Elias, G Thomas, D Lewis, Carter, Plumtree, Morgan-Williams, Edwards, Hennessey.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.