မြဝတီမှာ ကရင်လက်နက်ကိုင်တွေ မလိုအပ်ဘဲ လက်နက်မကိုင်ဖို့ စစ်တပ်အမိန့်ထုတ်
ဓာတ်ပုံ ရင်းမြစ်, Getty Images
မြဝတီမြို့ပေါ်မှာ ကရင်လက်နက်ကိုင်တပ်ဖွဲ့ဝင်တွေ မလိုအပ်ဘဲ လက်နက် မကိုင်ဖို့နဲ့ လက်နက်တွေကို သက်ဆိုင်ရာတပ်ရင်း/ဌာန၊ စည်းကမ်းထိန်းသိမ်းရေးရုံးတွေကို အပ်နှံထားဖို့ စစ်တပ်က အမိန့်ထုတ်လိုက်ပါတယ်။
နောက်ပြီး မြို့တွင်း စားသောက်ဆိုင်တွေ/ KTV တွေမှာ ယူနီဖောင်းဝတ်ပြီး လက်နက်ကိုင်ဆောင်တာတွေ မလုပ်ဖို့ကိုလည်း စစ်တပ်က အမိန့်ထုတ်ပါတယ်။
မြဝတီမြို့စောင့်တပ်လို့ လူသိများတဲ့ အမှတ် ၂၇၅ ခြေလျင်တပ်ရင်း(ခလရ ၂၇၅)နဲ့ ကရင်လက်နက်ကိုင်အဖွဲ့အစည်းတွေ အစည်းအဝေးလုပ်ပြီး ဧပြီ ၂၃ ရက်မှာ အချက် ၈ ချက် ပါတဲ့ အမိန့်စာကို ထုတ်ခဲ့တာပါ။
ငြိမ်းချမ်းရေးလမ်းစဉ်အတွက် အနှောင့်အယှက်မဖြစ်စေဖို့ ရည်ရွယ်တယ်လို့ဆိုပြီး စာထဲမှာရေးသားထားပါတယ်။
ဒါနဲ့ပတ်သက်လို့ DKBA နဲ့ နီးစပ်သူက “တိုင်းမှူးရော၊ တပ်မမှူးရော အသစ်ဆိုတော့ … ဒီအမိန့်တွေ ထုတ်တာက ကရင်လက်နက်ကိုင်တွေကို သူထိန်းချုပ်နိုင်ပါတယ်ဆိုတဲ့ သဘောမျိုးပြတာ” လို့ ပြောပါတယ်။
ထိုင်း- မြန်မာကုန်သွယ်ရေးအတွက် အဓိက လမ်းကြောင်းဖြစ်တဲ့ အမှတ် ၂ ချစ်ကြည်ရေးတံတား ပြန်ဖွင့်တဲ့အခါမှာလည်း မြို့ပေါ် က တရားမဝင် ဂိတ်တွေကို ထိန်းချုပ်ထားဖို့အချက်ကိုလည်း အဲဒီထုတ်ပြန်စာမှာ ပါရှိပါတယ်။
“မြို့စွန်မှာတော့ ဘယ်သူမှ ယူနီဖောင်း မဝတ်ရဲကြဘူး။ NCA ထိုးထားတဲ့ စစ်တပ်မဟာမိတ်တွေက ဂိတ်မှာ စိုးမိုးထားရင် ဌာနဆိုင်ရာ လွှတ်ပြီး ဂိတ်ဖွင့်လို့ ရတယ်လေ။ အဲဒါကြောင့် စိုးမိုးထားဖို့ ပြောတာ။ နောက်ပြီး ထိုင်းပစ္စည်းတွေကို ကြပ်ဖို့လည်း ဖြစ်နိုင်တယ်” လို့ သူက ပြောပါတယ်။
လက်ရှိ မြဝတီမြို့ပေါ်မှာ ကရင်နယ်ခြားစောင့်တပ် (BGF) အဖြစ် ဆက်ပြီး ကျန်ရှိနေတဲ့ BGF တပ်နယ် ၄ စစ်ဒေသမှူး ဗိုလ်မှူးချုပ် စောမုတ်သုန်ရဲ့လက်အောက်ခံ တပ်ရင်းတစ်ရင်းသာ ကျန်ရှိပါတယ်။ ဗိုလ်ချုပ် စောချစ်သူနဲ့ စောတင်ဝင်းတို့ကတော့ ကရင်အမျိုးသားတပ်(KNA) အဖြစ်မပြောင်းလဲခင်မှာပဲ စစ်တပ်ထံမှာ BGF ကနေ နုတ်ထွက်စာတင်ခဲ့တယ်လို့ KNA နဲ့ နီးစပ်တဲ့သတင်းအရင်းအမြစ်တစ်ဦးက ပြောပါတယ်။
