'ဘုရားက ကျွန်မတို့ မြားနတ်မောင်' - သီလရှင်ကျောင်းမှာဆုံပြီး လက်ဆက်ကြသူတွေ

"တော်တော်ကဲတဲ့ သီလရှင်လေးပဲ'''

စမြင်မြင်ချင်းတုန်းကတော့ မေတ္တာသက်ဝင်ဖို့ ခက်ခဲခဲ့ပါတယ်။ လွီဇာ ဆေဗာရီယို တစ်ယောက် သူ့ရဲ့ကြင်ဖက်ဖြစ်လာမယ့်သူကို စတွေ့တုန်းက သူတို့ အသက် ၁၉ နှစ်အရွယ် သီလရှင်ငယ်လေးတွေပါ။ တစ်ယောက် မျက်နှာကို တစ်ယောက် ကြည့်မရခဲ့ပါဘူး။

အခုတော့ သူတို့နှစ်ဦး ပျော်ရွှင်စွာ လက်ထပ်ပြီးပြီဖို့ ဇနီးဖြစ်တဲ့ ဖရန်စီလာ ကိုစတာက ဘီဘီစီ သတင်း ဘရာဇီးဌာနကို သူတို့အကြောင်း ပြောပြလာတာပါ။ ''ကျွန်မ ခေါင်းထဲ သူ အကြောင်းတွေးမိတော့ ဘယ်လိုကောင်လေးက ဒီလိုကောင်မလေးကို မျက်စိကျပါ့မလဲပေါ့''

လွီဇာ တစ်ယောက် လွန်ခဲ့တဲ့ ၆ နှစ်တုန်းက သီလရှင်ကျောင်းကို ရောက်တော့ ဖရန်စီလာက သီလရှင်ကျောင်းကို ရောက်နေတာ ၅ နှစ်ရှိပါပြီ။ သူ့အတွက် သာသနာ့ဝန်ကို ကျိုးနွံစွာအမှုတော်ထမ်းဖို့ သူ ကတိသစ္စာပြုထားခဲ့ပြီးချိန်လည်းဖြစ်ပါတယ်။ ပြီးတော့ ဘာသာရေးအထူးပြုဘွဲ့ တစ်ခုအတွက်လည်း စာလိုက်နေချိန်ပါ။

ဘရာဇီး အရှေ့မြောက်ပိုင်းက ဘာသာရေးနက်ရှိုင်းတဲ့ အဖိုးအဖွားတွေလက်ထဲ ကြီးလာသူဖြစ်လို့ သီလရှင်ကျောင်းရောက်တဲ့အခါမှာ သူ့အတွက် အထူးအဆန်းသဖွယ် လိုက်နာကျင့်ကြံရတာမျိုးတော့ မရှိခဲ့ပါဘူး။

အဲဒီနောက် ကျောင်းကို လွီဇာ ရောက်လာပါတယ်။ သူက ဘရာဇီးနိုင်ငံအရှေ့တောင်ပိုင်းအရပ်ကနေ လာသူဖြစ်ပါတယ်။ ရတာမလို လိုတာမရတဲ့ ဆယ်ကျော်သက်ဘဝကို ဖြတ်ကျော်ခဲ့ရသူဖြစ်လို့ လွီဇာတစ်ယောက် သူ့အတွက် ဘာသာရေးမွှမ်းထုံတဲ့ဘဝကို ရဖို့ဆိုရင် သီလရှင်ဝတ်မှပဲ ရမယ်လို့ ခံစားသိခဲ့ပါတယ်။

''သီလရှင်ကျောင်း တံခါးဝကို ခြေတစ်ဖက်လှမ်းပြီဆိုတာနဲ့ ဒါဟာ ဘုရားအတွက် အမှုတော် ထမ်းဖို့ တစ်ခုတည်းဖြစ်သွားပြီ'' လို့ ဖရန်စီလာက ပြောပါတယ်။

အဲဒီနောက်ပိုင်း ၂ နှစ်လောက်ကြာတာတဲ့အခါမှာ သီလရှင်ကြီးနဲ့ သီလရှင်ငယ်လိုဖြစ်နေတဲ့ စစ္စတာနှစ်ယောက် ရင်းနှီးလာပါတယ်။ သူတို့တွေ သူငယ်ချင်းဖြစ်လာပြီး အဲဒီနောက်မှာတော့ နှစ်ဦးနှစ်ဖက် မလိုလားတဲ့အခြေအနေကနေ ကြည့်လို့ရတဲ့အသွင်ပြောင်းလဲခဲ့ပါတယ်။

ဒါပေမဲ့ သူတို့နှစ်ဦးကြား သူငယ်ချင်းလို ဆက်ဆံရေးခိုင်မာလာတာ တင်မကပါဘူး။ သီလရှင်ကျောင်းအတွက် သူတို့ သန္နိဋ္ဌာန်ဟာလည်း ယိမ်းယိုင်လာပါတယ်။

ကိုဗစ်ကပ်ဘေးကို ဖရန်စီလာ တစ်ယောက် အကြောက်ကြီး ကြောက်ခဲ့ပါတယ်။ ကိုဗစ်ပိုး ကူးစက်မယ့်သောကဟာ သူ့ကို မကြာခဏ အထိတ်တလန့်ဖြစ်စေခဲ့ပါတယ်။ ကျန်းမာရေးအတိုင်ပင်ခံနဲ့တွေ့ရတဲ့အထိဖြစ်ခဲ့ပါတယ်။ အဲဒီအတောအတွင်းမှာပဲ သူ့ရဲ့ရွေးချယ်မှုတွေကို ပြန်သုံးသပ်ဖို့ ဖြစ်လာစေပါတယ်။

''ဘာသာရေးထုံမွှမ်းတဲ့ဘဝက သိပ်ကို လှပပါတယ်။ ဒါပေမဲ့ စိတ်ပိုင်းနဲ့ ရုပ်ပိုင်း ကျန်းမာဖို့ လိုအပ်တယ်။ ဝတ်ပြုဆုတောင်းနေရုံနဲ့ မပြီးပါဘူး'' လို့ သူက ပြောပါတယ်။

အဲဒီကာလအတွင်း လွီဇာတစ်ယောက် ကိုဗစ်ကြောင့် သူ့အဖွားသေဆုံးမှုကို ပူဆွေးနေခဲ့ရချိန်ဖြစ်ပါတယ်။ အထိတ်တလန့်ဖြစ်တာ ခံစားရပြီးတဲ့နောက် တဖြည်းဖြည်း စိတ်ကျရောဂါ စွဲကပ်လာပါတယ်။

သူလည်း ကုထုံးကုသမှုခံယူရပြီး စိတ်ကျန်းမာရေးကို ဦးစားပေးဖို့ရာ အကြောင်းဖန် လာပါတယ်။ ဒါကြောင့် သူလည်း ကျန်နေတဲ့သူ့ဘဝကို သီလရှင်ကျောင်းမှာပဲ ကုန်ဆုံးတော့မယ်ဆိုတဲ့သူ့ ကတိသစ္စာကို ပြန်စဉ်းစားဖို့ဖြစ်လာပါတယ်။

''လွီဇာဟာ သူ့ စိတ်ကျန်းမာရေးကို ဂရုစိုက်ဖို့ လိုအပ်ခဲ့တယ်'' လို့ ဖရန်စီလီယာက ပြောပါတယ်။ ''ကျောင်းကို သူ စွန့်ခွာမယ်လို့ဆိုတော့ ဘုရားရေ ဆိုပြီး လန့်သွားခဲ့မိတယ်။ ဒီအသက်အရွယ် မိန်းကလေး တစ်ဦးဟာ ဘဝသစ်တစ်ခုကို ထပ်ပြီး စတင်ဖို့ ဆုံးဖြတ်တာဆိုတော့လေ။ ဘာကြောင့်လဲဆိုရင် ကျောင်းမှာနေခဲ့တဲ့အချိန်ထက် အပြင်မှာနေခဲ့တဲ့အချိန်ပိုများခဲ့တဲ့ ကျွန်မတောင် ဘဝသစ်ကို ပြန်စဖို့ဆိုတာ တွေးရင်တောင် ရင်မောစရာလေ''

နောက်ပိုင်းမှာတော့ ဖရန်စီလာ ကိုယ်တိုင်လည်း ဘဝကို ရဲရဲဝင့်ဝင့်ဖြတ်သန်းမယ်လို့ဆိုတဲ့ သူငယ်ချင်း မိန်းကလေးငယ်ရဲ့လမ်းစဉ်ကို လိုက်ပါတယ်။ သူလည်း သီလရှင်ကျောင်းကို စွန့်ခွာဖို့ ဆုံးဖြတ်ခဲ့ပါတယ်။ သီလရှင်ဘဝကို စွန့်လွှတ်လိုက်တာဟာ သူတို့အတွက် ထင်ထားတာထက် ခက်ခဲမယ်ဆိုတာ သိလျက်နဲ့ ဒီလိုဆုံးဖြတ်ခဲ့ကြတာပါ။

''လူ့ဘဝက တကယ်တော့ မလွယ်လှပါဘူး'' လွီဇာက ပြောပါတယ်။ ''အကျပ်အတည်း အစုံပါပဲ''

''ကောလိပ်ဆက်တက်နိုင်မှာလား၊ အလုပ်ရမလားဆိုတာလည်း မသေချာဘူးလေ''

ဖရန်စီလာလည်း အလားတူ ခံစားမိပါတယ်။ ''အလုပ်အင်တာဗျူးတစ်ခု ဝင်ကြည့်တယ်ဆိုပါစို့။ ဘာဘွဲ့ရလဲဆိုတာ မေးမှာပဲ။ ကိုယ်လေ့လာထားတဲ့က ဘာသာရေးသဘောတရား အထူးပြုဘွဲ့လေ။ ဘယ်လို အလုပ်မျိုးကို သွားရှာမလဲ'' လို့ သူက ပြောပါတယ်။

သူ ကျောင်းကနေ ထွက်ခွာဖို့ ဆုံးဖြတ်လိုက်တဲ့အခါ ကျောင်းကိုရောက်တာ ၇ နှစ်အထိ ရှိပါပြီ။ ဖရန်စီလီယာဟာ သီလရှင်အကျင့်ကိုပါ တစ်ခါတည်း စွန့်လွှတ်တာဖြစ်ဖို့ လူဝတ်ကြောင်တွေ ဝတ်တဲ့အဝတ်အစားအတွက် ထည့်ဖို့ ဘီဒိုပါ ဝယ်လိုက်ရပါတယ်။

ဒါပေမဲ့ ငွေကြေးအတွက် အများဆုံး ခေါင်းခဲရတာက အိမ်ခန်းငှားခဖြစ်ပါတယ်။ ဒီတော့ ငွေချွေတာနိုင်ဖို့ သူငယ်ချင်းနှစ်ယောက် အခန်းတစ်ခန်းကို မျှနေကြဖို့ သဘောတူလိုက်ကြပါတယ်။

အဲဒီနောက် ညနေခင်းတစ်ခုမှာ သူတို့ အချစ်ဟာသဇတ်လမ်းဖြစ်တဲ့ Love in Verona ကို ကြည့်ပြီးတဲ့နောက် ဖရန်စီလာဟာ လွီဇာနဲ့ပတ်သက်ပြီး သူ့ခံစားချက်ကို ဖွင့်ဟပါတယ်။ လွီဇာဘက်ကလည်း တူညီတဲ့ခံစားချက်ရှိတယ်ဆိုတာကို သိခဲ့ပါတယ်။

တစ်နေ့ညနေမှာတော့ သူတို့နှစ်ယောက် Love in Verona ဆိုတဲ့ အချစ်ဟာသရုပ်ရှင်ကို အတူကြည့်ပြီးနောက်၊ အစပိုင်းမှာ တစ်ယောက်နဲ့တစ်ယောက် မကြိုက်နှစ်သက်ဘဲ နောက်ပိုင်းမှာ ချစ်မိသွားကြတဲ့ ဇာတ်ကောင်နှစ်ဦးလိုပဲ၊ သူ့ ရဲ့ ခံစားချက်တွေကလည်း အဲဒီဇာတ်လမ်းအတိုင်း ဖြစ်ပေါ်လာခဲ့တယ်လို့ ဖရန်စီလာ က လွီဇာကို ဖွင့်ဟပြောကြားခဲ့ပါတယ်။

ဆယ်ကျော်သက်အရွယ်ကတည်းက နှစ်ဦးစလုံးဟာ သူတို့ကိုယ်သူတို့ လိင်နှစ်မျိုးလုံးအပေါ် စိတ်ဝင်စားမှုရှိသူများ (bisexual) အဖြစ် သတ်မှတ်ခဲ့ကြပါတယ်။ ဒါပေမဲ့ အဲဒီအချက်က သူတို့ရဲ့ သီလရှင်ဖြစ်လိုစိတ်နဲ့ သီလရှင်ကျောင်းထဲ ဝင်ရောက်ဖို့ ဆုံးဖြတ်ချက်ကို မထိခိုက်စေခဲ့ပါဘူး။

"ဒါက ကျွန်မတို့ကို ဘုရားသခင်ကို ကြောက်ရွံ့စေခဲ့တာမျိုး၊ ဒါမှမဟုတ် အဲဒီနေရာမှာ ရှိနေရတာကို ကြောက်လန့်စေခဲ့တာမျိုး မရှိပါဘူး" လို့ လွီဇာ က ပြောပါတယ်။

"ကျွန်မက ဘယ်သူနဲ့မှ သမီးရည်းစားဆက်ဆံရေး မထားချင်ခဲ့ပါဘူး။ အမှန်တကယ်ကို အိမ်ထောင်မပြုဘဲ သန့်ရှင်းစွာ နေထိုင်ချင်ခဲ့တာပါ။ ကျွန်မရဲ့ ဘာသာတရားနဲ့ အသင်းတော်ရဲ့ လမ်းစဉ်ကို လိုက်နာချင်ခဲ့တာ ဖြစ်ပါတယ်။ အပြင်ထွက်ပြီး တစ်ယောက်ယောက်နဲ့ ချစ်သူရည်းစား ဆက်ဆံရေးတစ်ခု ထားဖို့ကိုတောင် မစဉ်းစားခဲ့ပါဘူး" လို့ သူက ဆိုပါတယ်။

ဖရန်စီလာ ကဒါကိုသဘောတူပါတယ်။ "တခြားအရာတွေကို စဉ်းစားဖို့ အချိန်တောင် မရှိခဲ့ပါဘူး" လို့ သူက ပြောပါတယ်။ "သီလရှင်ကျောင်းထဲ ဝင်ရတာက အရမ်းလွယ်ကူခဲ့ပေမယ့်၊ အဲဒီကျောင်းကနေ ထွက်လာရတာကတော့ ကျွန်မ ဘဝမှာ ရင်ဆိုင်ခဲ့ရတဲ့ အခက်ခဲဆုံးအရာ ဖြစ်ခဲ့ပါတယ်" လို့ သူက ဆိုပါတယ်။

အခုတော့ သူတို့နှစ်ယောက်က စုံတွဲအဖြစ် အတူနေထိုင်နေကြပါပြီ။ ဒါပေမယ့် သူတို့အတွက် အကြီးဆုံး ပြဿနာကတော့ သူတို့ရဲ့ ဘာသာရေးယုံကြည်မှုကို ဘယ်လို ဆက်လက်ကျင့်သုံးသွားမလဲ ဆိုတာပါပဲ။

သူတို့ သီလရှင်ကျောင်းက ထွက်လာပြီး တစ်နှစ်အကြာ၊ မင်္ဂလာဆောင်မတိုင်ခင် နှစ်နှစ်လောက်အလို ၂၀၂၅ ခုနှစ် အောက်တိုဘာမှာတော့ ပုပ်ရဟန်းမင်းကြီး ဖရန်စစ် က လိင်တူစုံတွဲတွေအပါအဝင် အသင်းတော်က "ပုံမှန်မဟုတ်တဲ့ စုံတွဲများ" လို့ သတ်မှတ်ထားတဲ့ စုံတွဲတွေကို အခြေအနေတချို့မှာ ဘုန်းတော်ကြီးတွေ ကောင်းချီးပေးနိုင်တယ်လို့ ခွင့်ပြုခဲ့ပါတယ်။

ဒါပေမယ့် ကက်သလစ်အသင်းတော်ကတော့ လိင်တူချစ်သူစုံတွဲတွေရဲ့ ဆက်ဆံရေးကို "အပြစ်ဖြစ်တဲ့ အပြုအမူ" အဖြစ် ဆက်လက်သတ်မှတ်ထားဆဲဖြစ်ပြီး၊ လိင်တူလက်ထပ်ထိမ်းမြားမှုကိုလည်း အသိအမှတ်မပြုသေးဘူးလို့ သူက ပြောပါတယ်။

"ဒါက ဖရန် နဲ့ ကျွန်မတို့ အိမ်မှာ မကြာခဏ ပြောဖြစ်တဲ့ အကြောင်းအရာတစ်ခုပါ" လို့ လွီဇာက ပြောပါတယ်။ "လူသားအဖြစ်ရှိတဲ့ ယေရှုနဲ့ ဘုရားသခင်အဖြစ်ရှိတဲ့ ယေရှုကို ခွဲပြီး မမြင်နိုင်ပါဘူး။ သူက တစ်ဦးတည်းပါပဲ။ အဲဒီလိုပဲ ကျွန်မတို့ရဲ့ လိင်စိတ်ခံယူမှုနဲ့ ဘာသာရေးယုံကြည်မှုကိုလည်း ခွဲထားလို့ မရပါဘူး။ အဲဒါတွေက ကျွန်မတို့ရဲ့ တစ်စိတ်တစ်ပိုင်း ဖြစ်နေတဲ့အတွက်ပါ။ ကျွန်မတို့က ယုံကြည်မှုရှိတဲ့ စုံတွဲတစ်တွဲ ဖြစ်ပါတယ်။ အဲဒီအရာကို သီးခြားခွဲထုတ်ထားဖို့ မဖြစ်နိုင်ပါဘူး" လို့ သူက ဆိုပါတယ်။

သူတို့နှစ်ယောက်ဟာ သီလရှင်ကျောင်းမှာ ရှိခဲ့စဉ်က သိကျွမ်းခဲ့တဲ့ သီလရှင်တွေနဲ့ ဘုန်းတော်ကြီးတချို့နဲ့တော့ အခုထိ အဆက်အသွယ် ရှိနေဆဲပါ။ ဒါပေမယ့် သူတို့ရဲ့ မင်္ဂလာပွဲကိုတော့ အသင်းတော်ဘက်က ဘယ်သူမှ တက်ရောက်ခဲ့ခြင်း မရှိပါဘူး။ "ဒါပေမယ့် ကျွန်မတို့နှစ်ယောက်နဲ့ ကျွန်မတို့ရဲ့ မင်္ဂလာနေ့အတွက် ချစ်ခင်အားပေးတဲ့ စကားတွေ၊ ဆုတောင်းမေတ္တာတွေ အများကြီး ရရှိခဲ့ပါတယ်" လို့ လွီဇာက ပြောပါတယ်။

"ဘုရားကျောင်းထဲက စင်မြင့်ရှေ့မှာ ရိုက်ထားတဲ့ မင်္ဂလာဓာတ်ပုံတော့ မရှိပါဘူး။ ဒါပေမယ့် ဘရာဇီးနိုင်ငံမှာ အထူးကြည်ညိုကိုးကွယ်ကြတဲ့ အပျိုစင်မာရိရုပ်တု Our Lady of Aparecida နဲ့အတူ ရိုက်ထားတဲ့ ဓာတ်ပုံတော့ ရှိပါတယ်" လို့ လွီဇာ က ပြောပါတယ်။

"ကျွန်မတို့အတွက်တော့ အဲဒီရုပ်တုဟာ ကျေးဇူးတင်မှု၊ ဆုတောင်းပံ့ပိုးမှုနဲ့ ကျွန်မတို့ မိသားစုကို ဘုရားသခင်ထံ အပ်နှံထားခြင်းကို ကိုယ်စားပြုပါတယ်" လို့ သူက ဆိုပါတယ်။

ဆယ်ကျော်သက်ဘဝတုန်းက သီလရှင်ဖြစ်ဖို့ ရွေးချယ်ခဲ့ရတဲ့ အကြောင်းရင်းဖြစ်တဲ့ လူတွေအတွက် အကျိုးပြုချင်တဲ့ စိတ်နဲ့ ဘဝရဲ့ ရည်ရွယ်ချက်ကိုတော့ အခုထိ သူတို့ဆက်ထိန်းထားဆဲ ဖြစ်ပါတယ်။

သူတို့နှစ်ယောက်ရဲ့ ဇာတ်လမ်းကို လူမှုကွန်ရက်ပေါ်မှာ မျှဝေခဲ့ပြီးနောက်မှာတော့ မက်ဆေ့ချ်တွေ တဖြည်းဖြည်း ပိုများလာခဲ့ပါတယ်။ အဲဒီထဲမှာ သူတို့ရဲ့ လိင်စိတ်ခံယူမှုနဲ့ ပတ်သက်ပြီး မေးခွန်းတွေ ရှိနေတဲ့ ခရစ်ယာန်ဘာသာဝင်တွေလည်း ပါသလို၊ ယုံကြည်မှုနဲ့ ဘာသာရေးအကြောင်း သိချင်တဲ့ လိင်တူချစ်သူ၊ လိင်ကွဲပြားသူနဲ့ LGBTQ+ အသိုင်းအဝိုင်းဝင်တွေရဲ့ မေးမြန်းမှုတွေလည်း ပါဝင်ပါတယ်။

"ဒါက ကျွန်မတို့ရဲ့ ဇာတ်လမ်းကို ပိုပြီး ပွင့်ပွင့်လင်းလင်း ပြောပြချင်စိတ်ကို တကယ် အားကောင်းလာစေခဲ့ပါတယ်" လို့ လွီဇာက ပြောပါတယ်။

"ကျွန်မတို့ရဲ့ လိင်စိတ်ခံယူမှုအကြောင်း၊ ယုံကြည်မှုအကြောင်းတွေကို ပွင့်ပွင့်လင်းလင်း ပြောဆိုဖို့ ပိုပြီး စိတ်အားထက်သန်လာခဲ့တာပါ။ အဲဒီလို လုပ်ရတာက အဓိပ္ပာယ်ရှိတယ်လို့ ခံစားရသလို လူအများကြီးကိုလည်း အကူအညီ ဖြစ်စေပါတယ်" လို့ သူက ဆိုပါတယ်။

"ဒီလို နေရာမျိုးတွေက ကျွန်မတို့နှစ်ယောက်ရဲ့ ယုံကြည်မှုလမ်းကြောင်းကို လူတစ်ဦးချင်းစီအနေနဲ့ရော၊ စုံတွဲတစ်တွဲအနေနဲ့ပါ ပိုပြီး ခိုင်မာလာစေပါတယ်" လို့ လွီဇာ က ပြောပါတယ်။

"ကျွန်မတို့ရဲ့ ဇာတ်လမ်းကို မျှဝေခွင့်ရတဲ့ နေရာတိုင်းက ကျွန်မတို့အတွက်တော့ ကိုယ့်ရဲ့ ရည်ရွယ်ချက်နဲ့ တာဝန်ကို ဆက်လက် အကောင်အထည်ဖော်နေတယ်ဆိုတာ ပြသတဲ့ နည်းလမ်းတစ်ခုပါပဲ" လို့ သူက ဆိုပါတယ်။

ဖရန်စီလာကတော့ "ကျွန်မတို့ရဲ့ တာဝန်က လူတွေရဲ့ ဇာတ်လမ်းတွေကို နားထောင်ပေးဖို့နဲ့ သူတို့ကို ကူညီပေးဖို့ပါ" လို့ ပြောပါတယ်။

"လူမှုကွန်ရက်တွေကတစ်ဆင့် အလုပ်လုပ်တဲ့အခါ အကြီးမားဆုံး စိန်ခေါ်မှုတွေထဲက တစ်ခုကတော့ လူတွေရဲ့ စကားကို ဘယ်လို နားထောင်မလဲ၊ ကိုယ့်ဘက်ကလည်း ဘယ်လို ပြောဆိုဆက်သွယ်မလဲ ဆိုတာကို သိဖို့ပါပဲ" လို့ သူက ဆိုပါတယ်။

"ကျွန်မ အမြဲပြောလေ့ရှိတဲ့ စကားတစ်ခွန်း ရှိပါတယ်။ 'တစ်နေ့နေ့မှာ မိသားစုတစ်ခု တည်ဆောက်ရမယ်ဆိုရင် ဘုရားသခင်က ကျွန်မ တည်ဆောက်စေချင်တဲ့ မိသားစုပုံစံကို ပြသပေးလိမ့်မယ်' ဆိုတာပါပဲ။ အခုတော့... ကျွန်မတို့ ဒီမှာ ရှိနေကြပါပြီ" လို့ ဖရန်စီလာ က ပြောပါတယ်။

"ယုံရခက်ပေမယ့် အချစ်နတ်သား မြားနတ်မောင် ဆိုတာ တကယ်ရှိတယ်ဆိုရင်တော့ ကျွန်မတို့နှစ်ယောက်အတွက် အဲဒီ မြားနတ်မောင် က ဘုရားသခင်ပဲ ဖြစ်ပါတယ်" လို့ သူက ဆိုပါတယ်။