KALLATTIIN, Tiraamp boba'aa Raashiyaa bituuf waliigallaan Zeleniskiin kun Puutiniif kennaadha jedhe

Haguuggii Tamsaasa Kallattii

1. Sa'aatii tokko duraHobomboleettii hamaa Lubbuuf sodaachisu Isaayas jedhamu UStti yaaddoo uumeera

   

   Madda suuraa, Getty Images

   Haarikeenii hamaan Isaayas jedhamu Floridaa rukute. Haarikeeniin kun lolaa lubbuu namaa balaaf saaxilu fi bubbee cimaa fidu akka danda’u sodaatamuun kumaatamni qe’ee isaanii irraa akka baqatan taasiseera.

   Haarikeeniin Isaayas jedhame kun Jimaata galgala kutaa dhihaa Florida rukutuu isaa dura humni isaa xiqqoo hir’achuun sadarkaa haarikeenii ykn bubbee cimaa 2ffaatti gadi bu’e.

   Yeroo sana bunneen kun sa’aatii tokko keessatti jechuunis mph 110 (km 175) saffisaan bubbisaa ture.

   Aangawoonni mootummaa Floridaa, Alabaamaa fi Joorjiyaa haala labsiii yeroo muddamaa labsaniiru.

   Ogeeyyiin mootummaa haala qilleensaa ammoo dambaliin galaanaa fi lolaa haarikeenichaan dhalatu naannolee tokko tokko keessatti hanga meetira 2.7 ol akka ga’u akeekkachiisaniiru.

   Bubbee hamaan Isaayas jedhamu hobomboleettii cimaa Ameerikaa Kaabaa keessatti dhufu keessaa isa tokko.

   Dabalataan Meksikoo fi kutaa kibba Kaalifoorniyaa irratti dhiibbaa geessisaa jira.

2. Sa'aatii 2 duraGeetaachoo Raddaa ammas gorsaa MM Abiy tahuun muudame

   

   Madda suuraa, Waajjira Min. Muummee

   Geetaachoo Raddaa irra deebiin gorsaa MM Abiy tahuun muudame.

   Geetaachoon erga pirezidaantummaa bulchiinsa Yeroofii naannoo Tigiraay irraa ka'ee dhimmoota Gaanfa Afrikaa irratti gorsaa MM Abiy tahuun hojjechaa ture.

   Tibbana Mootummaa Ida'amuu haaraa kan ijaaran MM Abiy kaabinee isaanii hunda aifoomsaniiru. Kaabinee isaaniitti ministeerota haaraa 11 kan dabalan yoo tahu kan duraan turan bakkaa ka'aniiru.

   Ministeroota haaraa muudaman keessaa sagal dubartoota. Obbo Geetaachoonis kanneen irra deebiin muudaman keessaa tokko.

   Akkasumas Diyaaqon Daani'eel Kibiret, Waajjira Ministira Muummeetti, sadarkaa ministeraan hogganaa damee hordoffii hojii tahuun muudaman.

   Dr darajjee Dhugumaa, Deetaa Ministeera Fayyaa tahuun erga hojjechaa turanii, sadarkaa ministeeraatti qindeessaa ijaarsa dimokiraasii tahuun muudamaniiru.

3. Sa'aatii 2 duraAshamaa! Tamsaasa kallattii eegallee jirra

   Tamsaasa kallattii har'aa keessatti odeessa biyya keessaa fi alaa gurguddaa argattu.

   Nu waliin turaa.

4. 9 Onkololeessa 2026Daandiin Qilleensaa Itoophiyaa balalii adda kutee ture gara Maqaleetti eegaluuf

   

   Madda suuraa, Ethiopian Airlines

   Daandiin Qilleensaa Itoophiyaa balalii gara Maqaleetti taasisu yeroof adda kutee kan ture yoo ta'u, amma deebi'ee eegaluuf ta'uu ibseera.

   Daandiin qilleensichaa balalii kana kan eegalu ALI Onkoloolessa 1, 2019 ta'uu ibseera.

   Maamiloonni daandii qilleensichaa gara biiroo isaanitti dhihoo jiru deemuun ykn lakkoofsa bilbilaa 6787 fayyadamuun dabaree imalaa qabachuu danda'u jedhe.

   Daandiin qilleensichaa Fulbaana 23 Humnoonni Tigraay buufata xiyyaaraa Aluulaa Abbaa Naggaa magaalaa Maqaleetti argamu to'achuu booda balalii gara Tigraay ''yeroof adda kutuu'' ibsee ture.

   Yeroo sana ibsa baaseen magaalota sadii Naannoo Tigraay keessa jiran- Maqalee, Aksuum fi Shireetti balaliin adda cituu ibseera.

5. 9 Onkololeessa 2026US filannoo Sadaasa 3 gaggeeffamu dura Iraan irratti haleellaan hin raawwattu jedhe Tiraamp

   

   Madda suuraa, Reuters

   Pirezidantiin US Doonaald Tiraamp hanga filannoon walakkaa bara pirezidantummaa isaatti filatamu xumuramutti Iraan irratti haleellaan hin raawwatamu jedhe.

   Biyyoonni lameen marii abdachiisaa waraana kana dhaabuuf murteessaa ta'e gaggeessaa waan jiraniif murtee kanarra ga'uu ibse Tiraamp.

   Barreeffama miidiyaa hawaasummaa isaa Truth Social jedhamurratti maxxanseen ''filannoo Sadaasa 3 gaggeeffamu dura karaa kamiinuu haleellaan Iraan irratti hin raawwatamu,'' jedhe.

   Waraanni Iraan Guraandhala keessa eegale fudhatamummaa Tiraamp siyaasa US keessatti qabu hir'iseera.

   Lammiileen Ameerikaa dhibbeentaa 60 ta'an tarkaanfii Tiraamp Iraan keessatti fudhate mormaniiru.

   Iraan fi US ammallee dhimma Ulaa Hormuuz irratti akkuma wal dhabanitti jiru.

   Iraan Ulaa Hormuuz cufuun gatiin boba'aa addunyaarratti akka dabalu taasiseera.

   Dubbiin Iraan fi US hanga gar tokkotti hin baanetti dhimmi gatii boba'aa furmaata hin argatu.

6. 8 Onkololeessa 2026Itoophiyaan loltootaa fi konkolaattota Eertiraa dirooniin haleeluu maddeen himan

   

   Madda suuraa, Getty Images

   Loltoonni Eritiraa torban kana keessa daangaa Itoophiyaa ce’anii gara Tigraay kaabaatti seenuudhaan naannoo magaalaa Adigraat keessa qubatanii akka jiran maddeen AFP hedduun himaniiru.

   Dhaabbanni walitti bu’iinsa hidhannoo hordofu ACLED akka jedhetti, halkan Roobii irraa gara Kamisaatti bari'u naannoo Adigraat keessatti loltoonni Eritiraa fi meeshaaleen waraanaa isaanii haleellaa mootummaan qilleensaarraan diroonii fayyadamee raawwateen rukutamaniiru.

   Namni tokko kan Adigraat keessatti argamuufi nageenya isaatiif jecha maqaan isaa akka hin ibsamne gaafate, mootummaan haleellaa qilleensaa jabaa raawwachuu AFPtti hime.

   “Kaleessa mootummaan Itoophiyaa haleellaan qilleensarraa hedduu raawwateera.

   Konkolaattotni waraanaa Eritiraa muraasni barbadaa’aniiru. Amma karaa irratti hin mul’atan,” jedhe.

   Jiraataan biraa kan maqaan isaa akka hin ibsamne gaafate immoo, halkan keessa dhohinsa guddaa tokko dhaga’uu isaa dubbateera.

   “Halkan keessa dhohinsa guddaa ture. Akkasumas konkolaattota waraanaa Eritiraa dirooniidhaan rukutaman ijaan argeera,” jechuun AFPtti hime.

   Maddi sadaffaanis, loltoonni Eritiraa gara kaabaatti deebi’aa akka jiran argeera jechuun ibseera. Akka jiraataan kun jedhutti sochiin isaanii irra caalaan gara daangaa Eritiraatti deebi'uudha.

   Mootummaan Eertiraa loltoonni isaa ifatti daangaa darbuu waan hime hin qabu. Biyyoonni lameen bara 1998 hanga 2000 daangaa irratti wal waraanuun lubbuun kumaatamaa darbeera.

7. 8 Onkololeessa 2026Kaabinee mootummaa MM Abiy keessaa sagala dubartoota, eenyu faa'a?

   

   Madda suuraa, FBC/BBC

   Ministirri Muummee Abiy Ahmad kaabinee mootummaa isaa hundeesse miseensota 23 qabu keessaa sagal dubartoota. Kana jechuun yeroo parsantaan ilaalamu %39.1 ta'uu agarsiisa.

   Isaanis:

   1. Dooktar Fitsum Asaffaa, Ministira Maallaqaa

   2. Aadde Haannaa Ara’ayaasillaasee, Ministira Haqaa

   3. Aadde Yasminii Wasrabbii, Ministira Daldalaafi Walitti Hidhamiinsa Naannawaa

   4. Dooktar Maqdas Dhaabaa, Ministira Fayyaa

   5.Aadde Ayinaalem Nugusee, Ministira Galiiwwan

   6. Aadde Salaamaawwit Kaasaa, Ministira Aadaafi Tiruzimii

   7. Aadde Alamtsahaay Phaawuloos, Ministira Albuudaa

   8. Aadde Shawwit Shaankaa, Ministira Dubartootaafi Hawaasummaa

   9.Aadde Fireehiwoot Taammiruu, Ministira Innooveeshiniifi Teeknoloojii

8. 8 Onkololeessa 2026MM itti-aanaa dabalatee aanga'oonni sagala bakkuma duraan turaniin itti fufan

   

   Madda suuraa, PMO

   Muudama Ministirri Muummee Itoophiyaa Abiy Ahmad har'a Onkoloolessa 8, 2026 kennaniin Ministira Muummee Itti-aanaa dabalatee aanga'oonni sagal bakkuma dura turaniin itti fufan.

   Tamasgeen Xurunee ministira muummee itti-aanaa ta'ee kan itti fufu yoo ta'u, Geediyoon Ximootiwoos (PhD) Ministira Dhimma Alaa ta'ee itti fufa.

   Dabalataan, Piroofeesar Birhaanuu Naggaa Ministira Barnootaa, Addisuu Araggaa Ministira Qonnaa, Haannaa Arayaasillaasee Ministira Haqaa ta'uun itti gaafatamummaan duraan irra turaniin itti fufu.

   Habtaamuu Ittafaa (Dr.) Ministira Bishaanii fi Inarjii, Dr. Maqidas Dhaabaa, Ministira Fayyaa, Ayinaalam Nugusee Ministira Galiiwwanii, akkasumas Salaamaawwit Kaasaa Ministira Aadaa fi Turiizimii ta'uun itti fufaniiru.

   Filannoo Waxabajji darbe gaggeeffameen booda MM Abiy caasaa bulchiinsa haaraa diriirsaa jira.

9. 8 Onkololeessa 2026Kaabinee mootummaa MM Abiy keessa warra jiran suuraan

   Manni-maree Bakka Bu'oota Ummataa Itoophiyaa torbaffaa kora idilee isaa jalqabaa gaggeesseen muudama ministeerotaa MM Abiy Ahmad dhiyeesseef raggaasiseera.

   Ministeerota 23 muudamni isaanii raggaasifameef keessaa harki caalan warra bakkumaa duran itti fufan yoo ta'an, kanneen haaraa muudamaniifi ministeera duraan turan irraa gara biraatti jijjiiramanis ni jiru.

   Suura isaanii daawwadhaa

   

   Madda suuraa, FBC/BBC

10. 8 Onkololeessa 2026MM Abiy kaabinee mootummaa isaa ijaaruun muudama gara garaa kenne

    

    Madda suuraa, Screenshot from FBC

    Manni-maree Bakka Bu'oota Ummataa Itoophiyaa torbaffaa kora idilee isaa jalqabaa gaggeesseen muudama ministeerotaa MM Abiy Ahmad dhiyeesseef raggaasiseera.

    Ministeerota 23 muudamni isaanii raggaasifameef keessaa harki caalan warra bakkumaa duran itti fufan yoo ta'an, kanneen haaraa muudamaniifi ministeera duraan turan irraa gara biraatti jijjiiramanis ni jiru.

    Tarreeffamni ministeerotaa kunooti:

    1) Obbo Tamasgeen Xurunaa Ministira Muummee Itti Aanaa Itoophiyaa

    2) Dooktar Geediyoon Ximootiwoos Ministira Dhimma Alaa

    3) Obbo Addisuu Araggaa Ministira Qonnaa

    4) Dooktar Fitsum Asaffaa Ministira Maallaqaa

    5) Obbo Mahaammad Idiris Ministira Raayyaa Ittis Biyyaa

    6) Piroofesar Birhaanuu Naggaa Ministira Barnootaa

    7) Aadde Haannaa Ara’ayaasillaasee Ministira Haqaa

    8) Aadde Yasminii Wasrabbii Ministira Daldalaafi Walitti Hidhamiinsa Naannawaa

    9) Dooktar Fissahaa Yittaaggasuu Ministira Indaastirii

    10) Dooktar Injinar Habtaamuu Ittafaa Ministira Bishaaniifi Inarjii

    11) Dooktar Maqdas Dhaabaa Ministira Fayyaa

    12) Obbo Awwaluu Abdii Ministira Hojiifi Ogummaa

    13) Aadde Ayinaalem Nugusee Ministira Galiiwwan

    14) Obbo Barakat Fissahaatsiyoon Ministira Istiraateejii Biyyaalessaa

    15) Aadde Salaamaawwit Kaasaa Ministira Aadaafi Tiruzimii

    16) Aadde Alamtsahaay Phaawuloos Ministira Albuudaa

    17) Obbo Saadaat Nashaa Ministira Ministira Loojistiksii

    18) Aadde Shawwit Shaankaa Ministira Dubartootaafi Hawaasummaa

    19) Obbo Muusaa Adam Ministira Nageenyaa

    20) Aadde Fireehiwoot Taammiruu Ministira Innooveeshiniifi Teeknoloojii

    21)Injinar Mahaammad Abdurahaaman Ministira Magaalaafi Bu’uuraalee Misoomaa

    22)Dooktar Injinar Sulxaan Walii Ministira Jallisii fi Naannawaa Gammoojjii

    23)Dooktar Akililuu Taaddasaa Ministira Dargaggootaafi Ispoortii

11. 8 Onkololeessa 2026Arteettaan kontiraata haaraa Arsenaal waliin waggaa afur isa tursiisu mallatteesse

    

    Madda suuraa, Arsenal Football Clu

    Milkaa'ina Arsenaaliif "kun jalqabbiidha" jedhe Manaajeriin kilabichaa Mikeel Arteettaa kontiraata haaraa mallatteessuu hordofee dubbii dubbateen.

    Kontiraata hanga 2030 Arsenaal waliin isa tursiisu kan mallatteesse Arteettaan shaampiyoonaa Piriimer Liigiif baroonni itti aanan kan injifannoo itti galmeessan akka ta'u akeekeera.

    Jalqaba ji'a kanaa kontiraata haaraa kanaan Arteettaan miindaa fi faayidaa fooyya'aa akk argatu BBC Sport gabaasee ture.

    Leenjisaan lammii Ispeen kun bara 2019 Arsenaal hogganuu kan eegale yoo ta'u, kontiraata amma dheereffameef kanaan waggoota 10 ol kilabicha waliin akka dabarsu isa taaisa.

    Kontiraata haaraa kanaan Arteettaan waggaatti Paawondii miliyoona 10 bifa miindaan, akkasumas bonasii (dabalata) ammoo Paawondii miliyoona 5 argata.

    "Kilabichi addadha, amalli isaafi miira sitti tolu inni siif uumu. Imalli nuti waliin qabnu itti waan fufuuf anaaf akka carroomuutti natti dhaga'ama," jedhe Arteettaan.

    "Hidhata cimaa fi yaadannoo umurii guutuu hin dagatmne uumneerra. Kan baayyee nama gammachiisu ammoo waan waliin milkeessuuf jirruuf kun ishee jalqabaati."

    Leenjisaa umuriin isaa waggaa 44 ta'e Arteettaan Arsenaal waliin Piriimer Liigii fi FA Cup mo'atee Shaampiyoons Liigii Awurooppaa ammaa Caamsaa darbe PSG waliin wancaaf qaqqabeera.

    Hogganaan olaanaa Arsenaal Richaard Garliik, Mikeel Artaattaan Arsenaal kilaba cimaafi dorgomaa jabaa taasisaa jira jedhe.

    "Amma manaajera yeroo dheeraaf nu waliin turuufi garee jabaa ijaaraa jiru qabna".

    Arteettaan kontiraata haaraa Arsenaal waliin turuuf mallatteessuun namatti haaraa hin taane. Sababiin isaa ammoo duraaniyyu kilabicha waliin turee waan hojjetu akka qabu kaasee dubbataa tureera.

    Kanaaf, Arsenaal waancaa Piriimer Liigii waggaa 20 booda akka mo'atu gochuun isaa jalqabbii akka ta'etti himamaa jira.

    Kanaaf, xiinxaltoonni kubbaa miilaa Arteettaan Arsenaal keessatti legaasii isaa (milkaa'ina dhaalamu) hojjechuutti akka jiru kaasu.

    Kallattii jireenya isaa haati warraa kan jijjiirte Arteettaan eenyu?

12. 8 Onkololeessa 2026Haleellaa hidhattoonni Huutii buufataalee xiyyaaraa Sa'uudii Arabiyaa irratti raawwataniin namoonni sadi du'an

    

    Aangawoonni akka jedhanitti namoonni sadi haleellaa Huutiin guyyoota lamaaf buufataalee xiyyaaraa Sa'uudii irratti raawwateen kan du'an yoo ta'u, kunis waraanni daangaa Sa'uudii fi Yamanii gidduutti adeemaa jiru sadarkaa yaaddessaarra ga'uu mul'isa.

    Abbaan Taayitaa Siivil Aviyeeshinii Sa'uudii ibsa Roobii kenneen haleellaa Buufata Xiyyaaraa Idiladdunyaa Abha irratti raawwatameen namoonni lama yoo du'an, 28 madaa'aniiru.

    Buufata Xiyyaaraa Idiladdunyaa King Kaaliid kan magaalaa guddoo Sa'uudii Arabiyaa, Riyaaditti argamurratti haleellaa raawwateen ammoo namni tokko du'uu eere ibsi kun.

    Haleellaan lubbuu namootaa galaafate kan Huutiin akka raawwate amane kun, mootummaa Yaman kan beekamtii idiladdunyaa qabuu fi Sa'uudiin deeggaramuu fi hidhattoota Huutii kan Iraaniin deeggaraman gidduutti lolli daran hammaachuu mul'isa.

    Ibsi mootummaa Sa'uudii haleellaawwan kunneen kan raawwataman Onkoloolessa 6 fi 7 ta'uu eera.

    Dubbi himaan damee waraanaa Huutii Yahyaa Saaree humnoonni isaa buufataalee xiyyaaraa Sa'uudii lamaan misaayeloota balistikii fi dirooniin haleeluu ibseera.

    Dubbi himaan Huutii kun Buufata Xiyyaaraa Idiladdunyaa Aden kan to'annoo mootummaa Yaman jala jiru haleeluus ibseera.

    To'annoo Huutiin ala kan ta'ee fi Yamaniin addunyaatti karaan ittiin baatee galtu tokkittiin buufata xiyyaaraa kana yoo ta'u, wayita waraanni ka'u yeroo mara xiyyeeffannaa haleellaa hidhattootaati.

13. 8 Onkololeessa 2026Raayis kontiraata haaraa Arsenaal waliin mallatteessuuf

    

    Madda suuraa, Getty Images

    Dekilaan Raayis kontiraata haaraa yeroo dheeraaf Arsenaal keessa isa tursiisu mallatteessuuf akka jedhu maddeen BBC Sport'tti himan.

    Taphataan sarara gidduu lammii Inglaand kun erga Adoolessa bara 2023 West Haam irraa Paawondii miliyoona 105niin dhufee Arsenaaliif taphataa baayyee murteessaa ta'eera.

    Kontiraata inni amma qabu dhuma bara dhufuu xumurama garuu maddeen akka BBC Sport'tti himanitti kontiraata haaraa mallatteessuu ilaalchisee mariin Bitootessa keessa jalqabame amma waliigalteetti dhiyaateera.

    Taphataan umuriin isaa waggaa 27 ta'e kun taphoota 165 irratti Arsenaaliif hiriiree taphachuun kilabichis dheebuu waancaa Piriimer Liigii waggaa 22 akka ba'atuuf gargaareera.

    Raayis kontiraata haaraa kana yoo mallatteesse miindaan isaa amma torbanitti argatu Paawondii 240,000 argatu gara Paawondii 350,000 guddachuun kan taphataan garee isaa Bukaayoo Saakaa torbanitti argatu waliin walqixxaata.

    Leenjisaan garee biyyaalessaa Ingilaand Tomaas Tuheel Raayisiin "yeroo ammaa taphataa sarara gidduu Awurooppaa keessa jiran keessa kan hunda caaludha" jechuun jajateera.

    Raayis tapha PIriimer Liigii torban lamaan booda Sambata deebiyuun morkii Arsenaal Liids waliin qaburratti ni taphata.

    Oduun Raayis kontiraata haaraa mallatteessuuf jedhu kun manaajeriin Arsenaal Mikeel Arteettaa shaampiyoonaa Piriimer Liigii waliin kan isa tursiisu kontiraata waggaa afur mallatteessuuf waliigaluun boodadha.

14. 8 Onkololeessa 2026Yooyyaa!

    Tamsaasa kallattii eegalleerra. Waraana Sa'uudii Arabiyaa fi Huutii gidduutti hammaate akkasumas dhimmoota biyya keessaa fi addunyaa irratti odeeffannoo jiran hordofnee isin biraan geenya.

    Tamsaasa kallattii armaan duraan odeeffannoo dabarsaa turre asii argattu.

    Odeessaalee karaa Marsariitii (Website), Instagram, YouTube, Facebook, WhatsApp fi TikTok keenyaas ni argattu.

    Bakka nagaa oolaa!