Waliigalteen dhukaasa dhaabuu Israa'elifi Libaanos torban sadiin dheerachuu Tiraamp ibse

Haguuggii Tamsaasa Kallattii

1. 24 Ebla 2026Ergamaan addaa US Istiiv Witkoofi fi Yaared Kushinar marii Paakistaan irratti hirmaachufi

   

   Madda suuraa, Reuters

   Rooytarsii fi CNN akka gabaasanitti Ergamaan addaa US Istiiv Wiitkoof fi soddaan Tiraamp Yaared Kushinar marii haaraadhaaf gara Islaamaabaad akka deeman qondaalonni Ameerikaa himanii jiru.

   Gabaasaaleen lamaanuu akka eeranitti, dippiloomaatonni lamaan kunneen Ministira Dhimma Alaa Iraan Abbaas Araagchii faana wal arguufi.

   Waayit haawus akka himetti dippilomaatonni lamaan Sanbat-duraa ganama imala isaanii jalqabu.

   Abbaas Araagchii gara Islaamaabaad Paakistaan imalaa jiraachuu fi galgala kana Islaamaabaad akka dhaqqaban Iraan mirkaneessuu gabaasnee turre.

2. 24 Ebla 2026Waraanni Israa'el kibba Libaanos haleelaa jiraachuu BBC'n mirkaneesse

   

   Madda suuraa, x

   BBC Verify Israa'el kibba Libaanos ganda Deer Eemis jiraattonni akka bahan erga akeekkachiisee booda haleellaa qilleensaa raawwachuu ilaalchisee viidiyoowwan bahan xiinxaleera.

   Viidiyoowwan bahan lama dhoo'insi guddaan tuuta manneenii gandicha keessaa rukutuu fi, bakki kun daangaa Israa'el irraa 11km ta'uu mirkaneessu.

   Maxxansa isaa afaan Arabaatiin, dubbii himaan waraana Israa'el (IDF) Avichaay Adiraa'ii, ''gochaawwan Hezboolaa waraanni Israa'el akka tarkaanfii irratti fudhatu kan kakaasani'' jedhe. Naannawa kanatti jiraattonni meetira 1000 gandicharraa akka fagaatan akeekkachiise IDF.

   IDF boodarra viidiyaa haleellaa kana kaleessa galgala ''buufata waraanaa'' Hezboolaan gara ganda Israa'elii Shitulaa daangaa Libaanositti rokkeettii irraa dhukaasu haleelle'' jedhe.

   

   Madda suuraa, IDF

3. 24 Ebla 2026Hezboolaan waliigaltee nagaarratti ashaaxirii hojjetaara jedhe Neetaniyaahuun

   

   Madda suuraa, Getty Images

   Ministirri muummee Israa'el Beenjaamin Neetaniyaahuu, dhimma lola Baha Jiddu-galeessaarratti ergaa viidiyoo irratti dabarseen, adeemsi marii ''nagaa seena-qabeessa'' Israa'elii fi Libaanos gidduutti buusuuf godhamu karaarra jira jedhe

   Garuu, Hezboolaan immoo adeemsa kanarratti shira xaxaa jira jedhe.

   • Humni Ittisaa Israa'el (IDF) fi Hezboolaan waliigaltee dhukaasa dhaabuu sarbuun walhimachaa jiru.

   Israa'el balaa isheerratti aggaa'amu kamirrattuu ''tarkaanfii fudhachuuf walabummaa'' guutuu qabdi jedhan Neetaniyaahuun. Israa'el Kamisaa fi Jimaata haleellaa raawwatteerti jedhe.

   Israa'el maqaa ''bifa Baha Jiddu-galeessaa jijjiiraa'' jirti, kana immoo tumsa Ameerikaa waliin gochuudhani jedheera.

   Donaald Tiraampis jaje. ''Dhiibbaa baay'ee jabaa Iraan irratti gochaa jira, diinagdee fi waraanaan'' jedhe.

4. 24 Ebla 2026Waliigalteen raawwatamnaan Gamtaan Awurooppaa qoqqobbii Iraanirraa salphisuufi

   

   Madda suuraa, EPA/Shutterstock

   Hoggantoonni Gamtaa Awurooppaa gita isaanii Ijipt, Sooriyaa fi Libaanos waliin Saayippiras keessatti mariirra jiru.

   Waliigalteen nagaa kan milkaawu yoo ta'e Gamtaan Awurooppaa qoqqobbii Iraanirraa salphisuuf waliigaluu Chaansilariin Jarman Fireedirik Merz himan.

   "Kun adeemsa marii nagaa gulantaa fooyyeen gahuu keessatti carraaqqii gama keenyaa fudhachuu fi dhukaasa dhaabuu fulla'aa dhugoomsu dha,'' jedhan Merz.

   Pirezdantiin Mana Maree Gamtaa Awurooppaa Antonio Costa Ulaan Hormuuz ''saffisaan banamee ugguraa fi kaffaltii malee geejjibaaf banaa ta'uu qaba'' jechuu isanii immoo AFP'tu gabaase. Ulaan kun ''addunyaa guutuuf murteessaa dha'' jedhan.

   Itti gaafatamtuun dhimma imaammata haajaa alaa gamtichaa Kaajaa Kalaas, mariin dhimma niwukilarii Iraan yoo waliigaltee jabaan goolabamuu baate addunyaan balaa hamaatti seenuu dandeessi jettu.

5. 24 Ebla 2026Ameerikaan marii Paakistaan irratti hirmaachuunshee shakkii uume

   

   Madda suuraa, EPA

   Pirezdantii Itti aanaa US JD Vaans marii nagaa itti aanuuf Kibxatan darbe gara Islaamaabaad akka imalan eegaman ture. Garuu xiyyaarri isaanii Air Force Two gara Islaamaabaad osoo hin balaliine hafe. Mariinis itti hin fufne.

   Tiraamp yeroo dhukaasa dhaabuu Roobii galgala darbe xumurame dheeressuu hime

   Amma Iraan ministirri dhimma alaa ishee Abbaas Araagchii gara Islaamaabaad imaluuf akka jiru mirkaneessite. Mariin kun qabiyyeen maal akka ta'u hin beekamne. Ameerikaan ni hirmaattii fi dhiiftis waanti mirkanaaye hin jiru.

   Islaamaabaad marii nagaa marsaa lammaffaaf qophaawaa jiraachuu gabaasaan BBC gabaasaa ture.

   Paaksitaan Teehraanii fi Waashingtan walitti fiduuf carraaqqii gootu itti fufte.,

6. 24 Ebla 2026'US marii dabalataatiif karaa amansiisaan deemuu qabdi' - Ambaasaaddara Iraan

   

   US marii dabalataatiif karaa amansiisaan deemuu qabdi jedhan UN'tti ambaasaaddarri Iraan Alii Baahireen.

   US mariin Iraan waliin eegalte akka itti fufu yoo feete uggura dooniiwwaniis dhaabuu qabdi jedhan.

   BBC Radio 4, irratti yaada kennaniin dippilomaatiin Iraan kan Jenevaa kun, uggurri Ameerikaan ulaa Hormuuz irra keesse ''sarbama dhukaasa dhaabuu guddaa dha'' jedhan.

   ''Wayita irra deebiin mariitti seenan mirgoota fi gaaffii haqaa Iraaniif beekamtii kennuun karaa amansiisaa hordofuu qabu''.

   ''Gitni biraa mariidhaaf akka qophaawuuf carraa kennuuf osoo hin taane, Iraan irra caalaa haleeluufi'' jedha.

   Donaald Tiraamp as dura waraanni Ameerikaa yoo ajajame haleellaa raawwachuuf qophii dha jedhe ture.

   Baahireen, yaada marii itti fufuuf hoggantoota Iraan jidduu qoqqoodamiinsi jira jedhu fudhatama dhorkan.

   Kana caalaa rakkoo kan taate, yaada wal faallessanii fi qoqqoodamiinsaa qabattee kan deemtu Ameerikaa dha jedhan.

7. 24 Ebla 2026US Iraan keessatti tarkaanfii ittifufuuf ejjennoo fi qophii qabdi - Pentaagon

   

   Madda suuraa, Reuters

   Yeroon dhukaasa dhaabuu yoo xumurame Ameerikaan tarkaanfii Iraan keessaa itti fufti jedhan dura taa'aan humnoota waloo Daan Keen.

   Ameerikaan dooniiwwan gara buufata Iraan socho'anii fi buufaticharraa bahan hordofaa jirti jedhan.

   Ganama har'aa dooniiwwan 34 uggura cehuuf turan ofirra deebisuu dubbataniiru. Doonii alaabaa Iraan baattu tan uggura dabarte takka humni galaanaa US to'achuu ibsan.

   Tuutni doonii tanaa sa'aatiiwwan jahaaf akeekkachiisa dhagahuu akka didee fi humni galaanarraa US tarkaanfii hatattamaa akka fudhate beeksisan. Tarkaanfiin kun dhukaasa akeekkachiisaa banuu, motora ishee rukutuu, fi sochiin ala gochuu dha.

   Dooniin tun humna addaa Ameerikaan to'atamtee, ''hojjettoonni ishee nagaadhaan to'annoo jala jiraachuu'' ibsan qondaalli Pentaagon.

8. 24 Ebla 2026'Iraan carraa waliigaltee gaarii fi hubannoorratti hundaa'e gochuu qabdi' - Pentaagon

   

   Madda suuraa, Getty Images

   Ministirri Ittisaa US Piit Heegseet, Ameerikaan torbaanota keessatti "bu'aa waraanaa jajjabaa'' galmeessifte jedhan waraana Veetnaamii fi Iraaq waggoota kurnanoota fudhateen wal maddii qabanii madaaluun.

   "Shakkii tokko malee Iraan nukilarii hin hidhattu,'' jedhan. Ergamni US kan Iraan keessaa kunis "kennaa addunyaati '' jedhan.

   Ergamni kun marsaa haaraa akka itti fufu ibsan. Iraan carraa waliigaltee gaarii fi hubannoorratti hundaaye gochuu qabdi jechuun dubbatan.,

   Humni galaanarraa buufataalee Iraan humna jabaadhaan uggureera, kun ''guyyoota itti aanan jabaatee itti fufa'' jedhan.

   Humni galaanaa US uggura of gara hirannaa fi araarama malee raawwata jedhan.

   Uggurri kun ''dooniiwwan Ameerikaan ulaagaa guutan jettu hundarratti raawwata,'' jedhan. Dooniiwwan Iraan ykn dooniiwwan buufata Iraanirraa bahaniifi gara buufata Iraan seenan irratti raawwata jedhaniiru.

   Dooniiwwan 34 ganama kana ofirra deebsuus himan Heegseet.

   US Indoo-Paasifikii keessatti dooniiwwan dhokatanii yaa'an lama to'achuus himan. ''Kan biraas to'achuu itti fufna.''

   Eenyullee Ulaa Hormuuz keessa heeyyama Ameerikaa malee doonii sochoosuu hin danda'u jedhan Heegseet.

   Heegseet, Ulaa Hormuuz keessa dhukaatuu kaawuun ''waliigaltee dhukaasa dhaabuu sarbuu'' dha jedhan.

   Imalli Ulaa kana keessaa baay'ee murtaawadha. Gochi Iraan gootu balaafamaadha, ''gaafatamummaan waan itti hir'ate'' jedhan.

   Ameerikaan Iraan faana waliigaltee raawwachuuf muddama hin qabdus jedhan Heegset.

9. 24 Ebla 2026Amma nu gahe, Jilli Iraan mariif har'a galgala Paakistaan dhaqa jedhu maddeen BBC

   

   Madda suuraa, Getty Images

   Ministirri Dhimma Alaa Iraan Abbaas Araaghchii galgala kana Islaamaabaad Paakistaan akka dhaqan eegamaa jiraachuu maddeen mootummaa Paakistaan BBC'tti himan.

   Gama Iraanii fi Paakistaaniim wanni mirkanaaye hin jiru.

   Odeessi kun Abbaas ministira muummee itti aanaafi ministira dhimma alaa Paakistaan sa'aatiiwwan dura "dhimmoota dhukaasa dhaabuun ilaallatanirratti'' mari'achuuf waliin haasawuu isaanii booda dhagahame.

   Dhimma dhukaasa dhaabuu Iraanii fi US haata'u kan Libaanosii fi Israa'el adda hin baafne.

   Abbaas Araagchii: Namni dippilomaasii Iraan harkaa qaban kun eenyudha?

10. 24 Ebla 2026Iraan fi Paakistaan dhimmoota dhukaasa dhaabuu ilaallatan irratti mari'atan

    

    Madda suuraa, AFP via Getty Images

    Ministirri dhimma alaa Iraan Abbaas Araagchii aanga'oota olaanoo Paakistaan faana dhimmoota waliigaltee dhukaasa dhaabuun walqabatan irratti mari'atan.

    Kunis yeroo aanga'oonni Paakistaan marii US fi Iraan itti fufsiisuuf haala mijeessaa jiranitti dhagahame.

    Abbaas Araagchii ibsa Telegram irratti maxxanseen ministira dhimma alaa itti aanaa Paakistaan Ishaq Dar waliin dubbachuu ibse.

    Hoogganaa waliigalaa humna waraanaa Paakistaan Fiildi Maarshaal Asiim Muniir waliinis dubbataniiru.

    ''Waa'ee naannawa kanaa fi dhukaasa dhaabuu kaasnee dubbanne,'' jedhe.

    Araagchiin waa'ee marii US fi Iraan kaasuu fi dhiisuu ifatti hin eerre.

    Yookiin dhimma dhukaasa dhaabuu Israa'el fi Libaanos ta'uus hin ibsine.

    Magaalaa guddoon Paakistaan Islaamaad marii gaggeessuuf qophii guddaatti jirti.

    Garuu US fi Iraan yoom akka mariitti deebi'an ifa miti.

11. 24 Ebla 2026Aanga'oonni Iraan ergaa tokkummaansaanii cimuu mul'isu Tiraampiif ergaa jiru

    Pirezidant Tiraamp bulchiinsa Iraan gidduu tokkummaan akka hin jirre fi ''hooggantoonni biyyattii akka wal jeeqaa jiran'' karaa miidiyaa hawaasummaa ergaa dabarseera.

    Kana hordofee warri Iraan tokkummaa sibiila walitti baqee qarame fakkaatu qabaachuu ibsaa jiru.

    Aanga'oonni Iraan tokkummaansaanii daran cimuu karaa miidiyaalee hawaasummaa fi miidiyaalee biroodkastiingii kaanii dabarsaniiru.

    Rakkoon isaan mudate akka tokko isaan taasise ibsan.

    ''Iraan keessa kan qarqaratti ba'e ykn kan mormuu fi kan deeggaru wanti jedhu hin jiru,'' jedha ergaan aanga'oota Iraan.

    ''Hundi keenyayyuu lammiilee Iraani, hordoftoota warraaqsaati, saba tokko, daandii tokkorra deemna.''

    Torban kana dhimmoota muraasa irratti waldhibdee xixiqqoon kan jaarmiyaalee biyyattii, kanneen akka Eegdota Warraaqsa Islaamaa fi kaaniin walqabatan keessatti uumamuu miidiyaan Iraan gabaasaniiru.

    Haata'u malee Iraan keessatti yeroo ammaa dhimma biyyaarratti murtee darburratti garaagarummaa guddaan hin jiru.

12. 24 Ebla 2026Chaayinaan ''dooniin Iraan to'atamte kenna Chaayinaati'' jechuun himata Tiraamp dhiheesse kuffiste

    

    Madda suuraa, Reuters

    Pirezidant Tiraamp dooniin Iraan kan humni waraanaa US to'ate kan Chaayinaan Iraaniif kennite jechuun himannaa dhiheesse Chaayinaan kuffisteetti.

    Dooniin Iraan osoo bakka humni waraanaa US itti uggura kaa'e keessa darbuuf yaaltuu haleelamuu US ibsitee turte.

    Iraan dooniin sun Chaayinaarraa garashee seenaa akka turte ibsite.

    Kanaanis Ameerikaan ''saamicha galaanarraa humna waraanaa deeggarame raawwatte'' jechuun akka haaloo baatu dhaadatte Iraan.

    Tiraamp asxaa dooniin kun ofirraa qabdu akka hin jaallannee fi tarii kan Chaayinaa ta'uu akka dandeessu dheengaddas dubbatee ture.

    Ministeerri dhimma alaa Chaayinaan himannaa Tiraamp kana kuffisuun ibsa baaseera.

    Dubbi himaan ministeerichaa Guo Jiakun ''Chaayinaan himannaa bu'uura hin qabnee fi ragaadhaan hin deeggaramne kamuu ni mormiti,'' jedhe.

    Dooniin konteenara feetu Touska kan erga dhaabbattee booda harka waraana US galte, akkuma Waashingitan jettu tajaajila lamaaf kan ooltu ta'uun hin oolu.

    Humna waraanaafis ooluu maddeen nageenya galaanarraa ibsaniiru.

13. 24 Ebla 2026Tiraamp ''ilma mootii Haarii caalaa anatu UK'f dubbata'' jedhe

    

    Pirezidant Tiraamp ilma mootii UK kan ta'e Haariin waa'ee UK hamma kiyya hin dubbatu jedhe.

    Daawwannaa mootii UK Chaarlis Ameerikaatti taasisuuf karoorfame dura kan dubbate Tiraamp, ilmi mootii kun osoo waa'ee UK hin dubbatin dhimma Yukreen dubbachuu eere.

    Ilmi mootii kun wayita Yukireen daawwatetti hanqina US, keessummaa ammoo Tiraamp ifatti dubbate.

    Tiraamp yaada Haariin kenne irratti wayita gaafatamu ''Ilma mootii Haarii? Akkam jira inni? Haati manaa isaa akkam jirti? Nagaa koo ittiin naaf ga'i adaraa!'' jedhe.

    Daawwannaa mootii Chaarlis kanaan walqabatee Tiraamp ilma mootii Haarii sagantaa irbaataa irra affeeruu fi dhiisuun isaa ifa miti.

    Mootii Chaarlis III fi giiftii Kaamilaan torban dhufu Waayit Haawusitti Tiraamp waliin walarguuf karoorri qabameera.

    Tiraamp daawwannaan kun hariiroo UK fi US dhiheenya kana cabee jiru akka suphu BBCtti himee ture.

14. 24 Ebla 2026Humni waraanaa Iraan kan bulchiinsi Tiraamp yaade caala cimaadha- maddeen

    

    Madda suuraa, Getty Images

    Bulchiinsi Tiraamp ifatti kan amane caalaa Iraan humna waraanaa jabaa akka qabdu qondaalonni US keessa beekan ibsuu isaanii CBC News gabaase.

    Akka miidiyaan US kun qondaalotafi maddeen tikaarraa odeeffadhe jedhetti, misaa'elli baalistikii Iraanifi sirni misaa'elli ittiin dhukaafamu walakkaa kan ta'u ammayyuu osoo hin tuqamin jira.

    Humni galaanaa Eegdota Warraaqsa Islaamaa (IRGC) %60 haleellaa US-Israa'eliin osoo hin miidhamin akka jiru qondaalonni US ibsan.

    Keessumaa bidiruuwwan waraanaa xixiqqoon saffisaan imalan heddu akka jiraniifi Iraan bidiruuwwan kana fayyadamuun Ulaa Hormuuz irratti dooniwwan uggura cabsan irratti haleellaa gaggeessaa jirti.

    Akka gabaasa kanaatti, humni qilleensaa Iraan haleellaa US-Israa'eliin baay'ee miidhamullee guutummaan hin mancaane.

    Qondaalonni US eenyummaansaanii akka hin ibsamne gaafachuun CBS News waliin turtii taasisan akka jedhanitti, humni qilleensaa Iraan lama sadaffaan hojjataa jira.

    Doonaald Tiraamp dabalatee qondaalonni waraanaa US garuu humna waraanaa Iraan akka waan guutummaatti manca'eetti dhiyeessaa turan.

    "Humna galaanaasaanii mancaasnera, humna qilleensaa isaanii mancaasnera, gaggeessitoota isaanii ajjeesnera," jechuun Tiraamp Kibxata darbe irra deebiin dubbatee ture.

15. 24 Ebla 2026US doonii xayyaarota waraanaa baatu kan biraa Baha Giddugalaatti ergite

    

    Madda suuraa, US Central Command

    US doonii waraanaa xayyaarota waraanaa baatu gara Baha Giddugalaatti erguu Ajaji Giddugalaa Ameerikaa beeksise.

    Dooniin xayyaarota waraanaa baatu dabalataan gara Baha Giddugalaatti ergame kun USS George HW Bush kan jedhamu yoo ta'u, Baha Giddugalaatti dhiyaachuutu ibame.

    Doonichi naannoo Ajaji Giddugalaa keessa socho'u gahaa jiraachuutu ibsame. Dooniin xayyaarota waraanaa baatu kun dooniwwan kanaan dura sababa waraana Iraaniin naanicha jiranitti dabalamaafi tokkoosaanii bakka bu'a kan jedhu adda hin baane.

    USfi Israa'el Iraanirratti haleellaa osoo hin gaggeessin dura US dooniwwan waraanaa xayyaarota waraanaa baatan gara Baha giddugalaatti ergitee turte.

    Dooniwwan kunneen Abrahaam Linkoniifi SS Gerald R Ford yoo ta'an, amma dooniin sadaffaan garasa imalaa jira.

    Isaan keessaa dooniin waraanaa guddaan SS Gerald R Ford yoo ta'u, sababa miidhaan "xiqqaan irra gaheef naannichaa bahee suphamee garas deebi'uun gabaafaamee ture.

16. 24 Ebla 2026Waliigalteen dhukaasa dhaabuu Israa'elifi Libaanos torban sadiif dheerate

    

    Madda suuraa, Reuters

    Pirezidaantiin US Doonaald Tiraamp Israa'elifi Libaanos waliigalteen dhukaasa dhaabuu torban sadiif akka dheeratu waliigaluusaanii ibse.

    Waraana Israa'elifi Hezbollaa gidduutti gaggeeffamaa ture mariin fixuuf bakka bu'oonni Israa'elifi Libaanoos jaarsummaa UStiin mariirra turan.

    USfi Israa'el wal-ta'uun Iraan haleeluu hordofee Hezbollaan Israa'el irratti lola bane. Iraan wajjin waliigalteen dhukaasa dhaabuu yoo gaggeeffamu, Iraan ammoo Libaanosittis dhukaasi dhaabbachuu qaba jechuun ijjannoo cimaan falmaa turte.

    Waliigalteen dhukaasa dhaabuu jalqabaa amma torban sadiif dheerachuu kan ibse Tiraamp, Libaanos Hezbollaa irraa akka of ittistuuf US gargaarsa barbaachisu akka gootu dubbate.

    Gara fuulduraatti ammoo Ministiira Muummee Israa'el Beeniyaamiin Netaaniyaahuufi Pirezidaantii Libaanos Jooseef Awuun Waayit Haawusitti akka simatu abdii qabaachuus ibse.

17. 24 Ebla 2026Ashamaa!

    Tamsaasi kallattii keenya har'aa eegaleera!

    Israa'elifi Libaanos gidduutti waliigalteen dhukaasa dhaabuu torban sadiif dheerachuu Tiraamp beeksise.

    Gama biraan ammoo Iraan wajjin waliigalteerra gahuuf "waanti nu ariifachiisu hin jiru" jedhe.

    Djimma muddama waraana Baha Giddugaleessaa dabalatee odeessawwan biyya keessafi kan idiladdunyaa isin biraan geenya.

    Karaa toora Marsartii,Facebook, Whtasapp, YouTube BBC Afaan Oromoo argachuu dandeessu.

    Dhiyaadhaa!