"Узр сўрамайман!" Юлдуз Усмонованинг АҚШдаги концерти яна бекор қилинди
Сурат манбаси, Instagram/yulduzibragimovnausmonova
Ўзбекистондаги чиқишлари тез-тез муҳокама марказига айланадиган қўшиқчи Юлдуз Усмонованинг Ню-Йоркдаги концертининг бекор қилиниши сиёсий мунозараларга сабаб бўлди. У икки йил аввал ҳам шундай вазиятга дуч келган.
Бу йилги концерт 9 май куни Бруклиндаги Oceana Theater саҳнасида ўтказилиши режалаштирилганди. Бироқ маҳаллий сиёсатчилар ва жамоат фаолларининг қаршилиги ортидан концерт бекор қилинди. Норозилик билдирганлар Усмонованинг Фаластин-Исроил можаросида яҳудий жамиятини танқид қилиб келганини асос сифатида кўрсатдилар.
4 май куни Нассау округи раиси ва Ню-Йорк губернаторлигига номзод Брюс Блейкман бошчилигида матбуот анжумани ўтказилиб, Усмонованинг концертига қарши фикрлар билдирилди. Уларнинг таъкидлашича, Бруклиннинг яҳудийлар кўп яшайдиган ҳудудида, айниқса Иккинчи жаҳон уруши хотираси билан боғлиқ санада бундай концерт ўтказилиши мақбул эмас. Маълумотларга кўра, Блейкман хонанданинг АҚШга кириш визасини бекор қилишни сўраб, давлат котиби Марко Рубиога хат йўллаган.
Шундан сўнг Oceana Theater ўзининг Facebook саҳифасида концерт тўхтатилгани ва чипта сотиб олганларга пул қайтарилишини ёзди.
End of Ижтимоий тармоқлардаги саҳифаларимиз
Юлдуз Усмонова 5 май куни Instagram орқали мурожаат йўллаб, барча чипталар сотилганини айтди ва мухлисларига миннатдорлик билдирди. Би-би-cида ҳозирча сотилган чипталар сони ҳақида аниқ маълумот мавжуд эмас.
Agar siz yahudiy sionistlar meni uzr so‘raydi deb o‘ylasangiz, qattiq yanglishasiz. Men o‘zimning qadriyatlarimga qattiq ishonaman.
У ҳолатни изоҳлар экан, ўз қарашларидан чекинмаслигини, ҳеч кимдан кечирим сўрамаслигини ва келажакда албатта концерт бўлишини таъкидлади.
"Агар сиз яҳудий сионистлар мени узр сўрайди деб ўйласангиз, қаттиқ янглишасиз. Мен ўзимнинг қадриятларимга қаттиқ ишонаман. Биринчидан, мен зўравонликка қаршиман", – деган Усмонова Фаластин тарафдори эканини яна бир бор қайталади.
Ўзбекистон ҳалқ артисти билан боғлиқ бу мавзу ҳозирда медиада кенг муҳокама қилинмоқда. Журналист Илёс Сафаров қўшиқчининг сўзларини расмий Тошкентнинг позицияси сифатида талқин қилиш мумкинлигини айтади.
"Юлдуз Усмонованинг шов-шув бўлаётган чиқиши тезиси қаердан туширилганини сезиш қийин эмас. Матн, шубҳасиз, пухта маслаҳатлашувлар маҳсули. Фикримча, стратегик жиҳатдан ҳам бу яхши танланган позиция. Бир томондан, Усмонова орқали ҳукуматнинг қатъий ва ўзгармас муносабати билдирилмоқда. Хонанданинг энди АҚШга кира олмаслиги эса, умумий вазият фонида арзимас йўқотиш. Бироқ бу ерда бошқа бир жиддий жиҳат ҳам бор: ҳукумат учун "ҳақиқат" кимнинг тилидан чиқиши ҳам муҳим аҳамиятга эга. Масалан, айнан шу мазмундаги фикрларни илгарироқ билдирган Мубашшир Аҳмад бугун озодликда эмас"- деб ёзди у Facebook саҳифасига. Бироқ ҳукумат томонидан бу масалага расмий муносабат билдирилмади.
Сурат манбаси, Reuters
Ғазодаги вазият туфайли Исроилни фаол танқид қилиб келаётган Юлдуз Усмонова 2023 йили Исроил маҳсулотларини сотиб олмасликка чақирган. Шундан кейин Ню-Йорк штатида 2024 йилнинг 14 сентябрига мўлжалланган концерти ҳам АҚШдаги яҳудий диаспорасининг норозилиги ортидан тўхтатилган.
Юлдуз Усмонова билан аввал ҳамкорлик қилган таниқли продюсерлардан бири Би-би-сига исмини ошкор қилмаслик шарти билан изоҳ бериб, хонандани сиёсатдан йироқ бўлишга ундади.
"Унинг кўп гапи бошига бало бўлади. Ўйламай гапиради, машҳурлик ва маданият масъулиятини, ҳамда юртнинг юзи хам эканини ҳис қилмайди. Аммо унинг позициясини танқид остига олиш ҳам бир томондан нотўғри. Демократияни тарғиб этаётганларнинг ўзи шундай қадамга бориб турса, унда билмадим" – деди у.
Шу билан бирга, ижтимоий тармоқларда Усмоновани Россиянинг Украинага кенг миқёсли уруши ҳақида фикр билдирмагани учун танқид қилганлар ҳам бўлди. Шундай фикрларнинг бири асли ўзбекистонлик, ҳозирда АҚШда яшовчи хонандалардан бири Наргиз Зокирова Facebook саҳифасига ёзди.
Россия томони бу урушга минглаб ўзбек мигрантларини ҳам жўнатгани ва юзлаб ўзбек бу урушда ҳалок бўлгани Украинанинг "Яшашни ҳоҳлайман" лойиҳасида тасдиқланган.
Юлдуз Усмонова ўзбек замонавий қўшиқчилигининг примадоннаси сифатида таърифланади. Унинг ижодига Ислом Каримов даврида бир неча йил норасмий таъқиқ қўйилган, концертлари ўтказилмаган, қўшиқлари телерадиода эшиттирилмаган. 2017 йилда Шавкат Мирзиёев президентликка келгач, хонанда саҳнага қайтган.
2010 йилдаги Қирғизистоннинг жанубида бўлган қонли июн воқеаларида куйлаган қўшиғи ортидан қирғиз жамияти ҳам унинг ижодини бир муддат бойкот қилган. У қўшиғида қўшни давлатга нисбатан нафратли сўзлар бор эди. Аммо Усмонова АҚШда бекор қилинган концертига муносабат билдирган охирги чиқишида қирғиз мухлисларини ҳам тилга олиб, чипта харид қилганлари учун миннатдорлик билдирди.
