Трамп энди диққатини кўпроқ Украинага қаратмоқчи

Дунёнинг йирик етти иқтисодиёти ҳисобланган мамлакатлар раҳбарлари Франциянинг Эвиан-ле-Бен шаҳрида тўпландилар, Украина Президенти Володимир Зеленский ҳам у ерга борди.

Швейцариянинг Женева шаҳри номи билан аталадиган кўл соҳилидаги курорт шаҳар - Эвиан-ле-Бен G7 саммити учун танланган.

Саммитдаги мулоқотларда АҚШ, Буюк Британия, Германия, Канада, Франция, Италия, Япония етакчиларидан ташқари Яқин Шарқдан БАА, Қатар ва Миср раҳбарлари ҳам иштирок этиши хабар қилинган.

15 июн куни Эвианга етиб борган АҚШ Президенти Трамп Франция Президенти Эммануэл Макрон билан учрашди.

Эрон билан урушни тугатиш келишувига эришганларини айтди, бу келишув тафсилоти шу ҳафта охирида эълон қилинишини маълум қилди.

"Кеча бизда Президент Путин билан ва Президент Зеленский жуда яхши суҳбатлар бўлди. Мен кўраяпманки, балки биз нимадир қила олишимиз мумкиндир. Ҳақиқатан ҳам. Улар иккиси ҳам бунинг учун очиқлар. Шундай экан, Эрон билан уруш тамом бўлганидан кейин биз диққатимизни бунга (Россия-Украина урушига) қаратамиз", деди журналистларга Президент Трамп.

15 июн куни Украина Президенти Володимир Зеленский хабар қилишича, у Россия Президенти Владимир Путинга G7 саммити пайти Франциянинг Эвиан-ле-Бен шаҳрида юзма-юз учрашишни таклиф қилган.

Бироқ Reuters ахборот агентлиги хабар беришича, Президент Путин Зеленский таклифига кўнмаган.

Кузатувчиларга кўра, Европа сиёсатчилари ушбу йирик еттилик саммитида Президент Трампнинг Украина уруши борасида қарашларини ўзгартиришни истайдилар, АҚШ шу вақтгача илгари суриб келган Украинада ўт очишни тўхтатиш таклифлари Россияга ҳаддан зиёд ён босиш бўлганига ишонтиришни хоҳлайдилар.

Эвиан саммити 15 июндан 17 июнгача мўлжалланган, 16 июн куни Украина Президенти Володимир Зеленский Европа раҳбарлари ва АҚШ Президенти Доналд Трамп билан музокаралар ўтказган.

Президент Зеленский ўзининг Телеграм каналида Президент Трамп билан учрашуви фото суратларини эълон қилди, икки президент ҳам суҳбатларидан мамнун эканликларини билдирдилар.

Президент Зеленскийга кўра, Президент Трамп билан бўлган қисқа учрашуви чоғида аксилбаллистик ракеталар ишлаб чиқариш учун лицензиялар олиш масаласи муҳокама қилганлар.

"Биз бу ҳақда Президент Трамп билан гаплашдик, жамоаларимиз ишлайди, Худо хоҳласа, бу сафар тегишли аксилбаллистик тизимлар ва ракеталарни ишлаб чиқариш учун лицензиялар олишга эришамиз", дея хабар берди Президент Зеленский.

Президент Зеленский, шунингдек, саммитнинг бошқа иштирокчилари билан бўлган учрашувларда Украинага қўшимча ҳаво ҳужумидан мудофаа тизимлари зарурлиги ҳақида гапирганини билдирди.

«ҲҲМ — ҳамма (муаммони) тан оляпти, ҳамма ёрдам беради, бутун "еттилик" бизнинг ҳимоямизни кучайтириш устида ишлайди. Биз ҳам тизимлар, ҳам ракеталар ҳақида гаплашдик. Ҳозирча тафсилотларсиз», — дея маълум қилди Украина президенти.

Президент Зеленскийга кўра, йирик еттилик саммити иштирокчиларининг ҳаммаси Россия урушда ғалаба қозонаётгани йўқ, деган фикрга қўшилганлар.

«Жуда яхши, ҳамма Россия ғалаба қозонмаётганини тушуняпти ва биз бу урушни якунлашга эришишимиз керак», — деди у.

16 июн куни Кремл Украина Президенти Зеленскийнинг Эвиан саммитига таклифини олмаганлари ҳақида хабар берди.

Кремл матбуот котиби Дмитрий Песков айтишича, ҳозир Россия билан Украина ўртасида ўзаро алоқа расмий каналлари йўқ, бироқ Зеленский "агар масъулият билан ва жиддий гаплашмоқчи бўлса", "хоҳлаган вақти Москвага келиши мумкин".

Аммо Украина Президенти Володимир Зеленский Президент Путин Москвадан бошқа ҳамма жойда учрашиши мумкинлигини айтган.

Июн ойининг бошида Президент Зеленский Президент Путинга очиқ мактуб эълон қилди.

Зеленский Путинни чарчоқ оқибатидан огоҳлантирди

Очиқ хатда Зеленский уруш тобора россияликларга ёқмай бораётгани, Россиянинг тобора ичкарисига кириб боришга муваффақ бўлиб, нефтни қайта ишлаш заводлари ва нефт омборларини портлатаётган Украина дронлари туфайли бензин қимматлаётгани, Интернет чекловлари кучайтирилётгани халқни норози қилаётгани айтилди.

Путиннинг 26 йил ҳокимиятда қолгани, кексайганига ишора қилинди, бу эса Президент Путиннинг ўзига ва Россия сиёсатчиларига ёқмади.

Санкт-Петербургдаги халқаро форумда сўралганида, Президент Путин Президент Зеленский билан учрашишдан маъни кўрмаётганини айтди.

Президент Путинга кўра, Россия билан Украина урушни тўхтатиш бўйича келишув бандларини ўзаро маъқуллаганларидан кейингина Президент Зеленский билан учрашиши мумкин.

Россия ўт очишни тўхтатиш талаби сифатида Украина бутун Донбасс ҳудудидан ўз қўшинларини олиб чиқиб кетишини илгари суради.

Россия гўё референдум ўтказган ва Луҳанск, Донецк Халқ республикалари деб эълон қилган Украина вилоятларини беришни расмий Киев истамайди.

Санкт-Петербургдаги халқаро форумда журналистлар билан мулоқотда Президент Путин айтишича, Россия қўшинларини мунтазам ғалабага эришаяптилар ва илгари силжияптилар.

Аммо кўплаб таҳлилчилар ва ҳатто россиялик ҳарбий блогерлар Россия армиясининг жабҳа чизиғи бўйлаб илдамлаши жуда секинлашганини тан оладилар.

Май ойи бошидан буён Украина Россиянинг қуруқликдаги ҳудудини Қрим ярим ороли билан боғлайдиган ягона автомобил йўлини дронлар ҳужумига тутишни кўпайтирди.

Бу йўлдаги ҳарбий техника ва ёқилғи ортилган автомобиллар мунтазам ҳужумга тутилгани оқибатида Қримда ёқилғи ва айрим озиқ-овқат маҳсулотлари танқислиги юзага келди.

Украина ҳарбийлари ўзларининг мақсадлари Қримни Россиядан тўлиқ узиб қўйиш эканини очиқ айтдилар.

Украинадан минглаб километр узоқликдаги нефт заводлари ва омборларига ҳужумлар Россиянинг бошқа ҳудудларида ҳам ёқилғи тақчиллигига сабаб бўлаяпти.