ሰሜናዊ ምዕራብ ትግራይ፡ ሰዓታት እቶ-እቶን ጽኑዕ ቀይዲ ምንቅስቓስን ተነቢሩ

ኣብ መንጎ ሰራዊት ምክልኻል ፈደራል ኢትዮጵያን ሓይልታት ትግራይን ዝካየድ ዘሎ ኲናትን ምልውዋጥ ተዅስን እናበርትዐ ኣብ ዝኸደሉ ዘሎ እዋን፡ ሓይሊ ዕማም (ኮማንድ ፖስት) ዞባ ሰሜናዊ ምዕራብ ትግራይ፡ "ሰላምን ጸጥታን ህዝቢ ንምሕላው" ብዝብል ኣብ ምንቅስቓስ ሰባትን መካይንን ጽኑዕ ቀይዲ ዘንብር ሽዱሽተ ነጥብታት ዝሓዘ ትእዛዝ ኣመሓላሊፉ።
እቲ ኮማንድ ፖስት ዘውጽኦ ሽዱሽተ ነጥብታት ዝሓዘ ናይ ጸጥታ ኣዋጅ ከምዚ ዝስዕብ ተዘርዚሩ ኣሎ፤
- ምእካብ ሰባትን ምዝንጋዕን፤ ኣብ መላእ እቲ ዞባ ኣብ ዝዀነ ይዅን ግዜን ቦታን ሰባት ልዕሊ ኣርባዕተ ኰይኖም ብሓባር ከይንቀሳቐሱ ተኸልኪሉ ኣሎ። ብተወሳኺ፡ መንእሰያት ተኣኪቦም ዝጻወትዎ ናይ ቢንጎ ጸወታታት ንዘይተወሰነ ግዜ ጠጠው ክብል ተወሲኑ።
- ናይእግረኛታትሰዓታትእቶ-እቶ፤ ዝዀነ ሰብ ድሕሪ ሰዓት 8፡00 ድሕሪ-ቐትሪ (ሰዓት 2፡00 ምሸት) ኣብ ጐደናታትን መላእ እቲ ዞባን ክንቀሳቐስ ከም ዘይፍቀድ ተደንጊጉ ኣሎ።
- ቀይዲመጓዓዝያ፤ ሰለስተ እግረን ተሽከርከርቲ (ባጃጃት)ን ሞተር-ብሽክለታታትን ድሕሪ ሰዓት 6፡00 ድሕሪ ቀትሪ (ሰዓት 12፡00 ኣጋ-ምሸት) ኣብ ጐደናታት ከይንቀሳቐሳ ምሉእ ብምሉእ ተኣጊደን ኣለዋ።
- ፍሉይፍቓድዘለወንተሸከርከርቲ፤ መድሓኒት ዝጸዓና መካይንን ናይ ዘይመንግስታውያን ትካላትን (NGOs) ተሸከርከርቲ ብዝተዋህበን ፍሉይ ሕጋዊ መስርሕ ጥራይ ክንቀሳቐሳ ዝፍቀደለን ክኸውን እንከሎ፡ ህይወት ንምድሓን ዝንቀሳቐሳ ኣምቡላንሳት ግን ን24 ሰዓታት ናይ ምንቅስቓስ ምሉእ ፍቓድ ኣለወን።
- ምምዝጋብኣጽዋር፤ ኵሎም ኣባላት ጸጥታ ኣብ ኢዶም ዝርከብ ዝዀነ መሳርሒ ኲናት ክሳዕ 23 ሕዳር 2026 (14 ሕዳር 2019 ግእዝ) ናብ ዝቐረበ ቤት ጽሕፈት ጸጥታ ኣቕሪቦም ከመዝግቡ ተኣዚዞም ኣለዉ። ብሕጊ ዘይተፈቕደ ዕጥቅን በላሕቲ ነገራትን ሒዙ ዝተረኽበ ዝዀነ ውልቀሰብ ይዅን ጕጅለ፡ ተሪር ሕጋዊ ስጕምቲ ከም ዝውሰዶ ተገሊጹ ኣሎ።
- ዕደናወርቂጠጠውምባል፤ ነቲ ኣብቲ ዞባ ዝካየድ ቍጠባዊ ንጥፈታት ብዝምልከት፡ ብመሰረት መንግስቲ ፈደራልን መጕዚት ምምሕዳር ትግራይን ዘውጽእዎ መምርሒ፡ ንዕደና ወርቅን ካልኦት ክቡራት መዓድናትን ዝውዕሉ ማሽነሪታት ስርሖም ንዘይተወሰነ ግዜ ብቕልጡፍ ጠጠው ከብሉን ካብቶም ናይ መዐደኒ ስፍራታት ብምሉኦም ክእለዩን ትእዛዝ ተመሓላሊፉ ኣሎ።
እዚ ብሓይሊ ዕማም (ኮማንድ ፖስት) ሰሜናዊ ምዕራብ ትግራይ ዝተደንገገ ተሪር ናይ ጸጥታ ስጕምቲ፡ ካብ ከተማ ሸራሮ ጀሚሩ ክሳዕ ከባቢታት ቢያራን ዓዲ ክልተን ዝተዘርግሐ ሓያል ወተሃደራዊ ግጥማት ኣብ ዝካየደሉን፡ ኣብ ጥቃ ባድመ ኣብ ልዕሊ ተመዛበልቲ ዝጸዓነት መኪና ናይ ድሮን መጥቃዕቲ ድሕሪ ምውራዱን እዩ ዝመጽእ ዘሎ።
ብተወሳኺ፡ እዚ ተነቢሩ ዘሎ ናይ ሰዓታት እቶ-እቶን ናይ መጓዓዝያ ቀይድን፡ ነቲ ብሰንኪ እቲ ኲናት ካብ ቤት ንብረቱ ተመዛቢሉ ኣብ ሸራሮ ተጸጊዑ ዝርከብ ልዕሊ 1,200 ህዝቢ ህጹጽ ሰብኣዊ ረድኤት ንምብጻሕ ኣብ ዝግበር ዘሎ ጻዕሪ ተወሳኺ ዕንቅፋት ኰይኑ ኣሎ።
ተወሳኺ፤

