Anti-migrants demonstration start for South Africa as recent attacks lead to death of two Nigerians

Di March and March Movement wey dey often campaign for stronger anti-immigration laws don begin demonstration for Pretoria, one of di largest city wey be home to migrants for South Africa.

Di anti-migrant campaigners demonstration dey come afta series of xenophobic attacks on foreigners for di kontri.

Dozens of demonstrators hold sticks and carry placards wey dem write "March and March until we win. If fighting for my kontri mean say I be xenophobic, den I'm proudly xenophobic".

Dem march across different streets for di city dey chant slogan.

Although di reason for dia protest neva dey clear, but for inside videos from previous protest wey bin spread online wey BBC News Pidgin neva fit independently verify, dem say dem want make foreigners leave dia kontri.

Dis demonstration dey come afta one recent anti-foreigner attacks for di kontri wey lead to di death of some African nationals including two Nigerians.

Chairman Nigerian Union of South Africa Olaniyi Abodedele wey confam dia death to BBC News Pidgin tok say dem die for di same week wey anti-foreigner protests bin dey ginger.

E identify di pipo wey die as Kelvin Chidiebere Amaramuiro and Ekpenyong Andrew.

Explaining di circumstances wey surround dia death, Oga Abodedele say Andrew die on Sunday, 19 April for Pretoria West. E say officials bin arrest am, and no tell am wetin be im offence. E claim say dem beat am to death and dump im body for hospital.

For di second victim, Abodedele say according to reports wey im gada, police and di military invade Kelvin Amaramuiro house on Monday, 20 April, dem ask am to provide evidence of wetin e dey do.

"Dem beat am well-well and lock am for jail, and on Wednesday, 22 April, e get bail. E go hospital for treatment and e go back house feeling better. On Thursday, e go hospital again, only for dem to tell am say e get internal bleeding. Unfortunately, e die on Friday, 24 April."

Security operatives for di kontri neva react to dis allegations.

Di leader of Nigerian citizens wey dey for South Africa say dem currently dey live in fear sake of di way South Africans take dey harass black foreigners for di kontri, and especially as anoda anti-migrant protest dey planned to hold on Tuesday for Pretoria and Johannesburg on Wednesday.

On Monday, 27 April, during di National Freedom Day Celebration, President Cyril Ramaphosa tok say im understand say corruption dey dia immigration system and im administration go root out di corruption.

E also say dem no go allow pipo take laws into dia hands, as e condemn di recent xenophobic attacks, wey see some South Africans attack black Africans and destroy dia businesses for di kontri.

Oga Ramaphosa add say im govment dey clamp down on illegal migration and on businesses wey disobey dia laws by hiring undocumented persons at di expense of dia citizens.

E also caution im kontri pipo say make dem no allow dia legitimate concerns about illegal migration lead to hatreds towards fellow Africans.

Ghana issue advisory to citizens for South Africa

However, as calls for anti-foreigner protest dey ginger for South Africa, authorities for Ghana don release advisory to dia citizens.

Di Ghana high commission office for South Africa tok for Tuesday morning say make citizens kontinu to stay safe for dis time when demonstrations still bin dey go on.

Di high commissioner oga Benjamin Quashie explain say di anti-foreigners protest go happun for Pretoria on Tuesday 28 April, wey go see pipo march for street to di presidency to president dia wahala to dia govment, e say:

Di Chairman of di Ghanaian Community for Mthatha and di oda environs Dr. Yirenkyi Gyekye Darko tell BBC pidgin say tins don calm down for dia area afta di protest wey happun last week.

E say "di Ghanaians return to dia normal life wey businesses don dey go on as usual since di last Thursday protest."

According to Dr Darko, di protest wey happun for dia area na di first time anti-immigration march like dat happun for Mthatha for ova 30 years.

E say di foreigners and locals for dat area get good relationship for many years.

"I don dey hia for ova 30 years, wit di oda Ghanaians, wey don dey hia for a long time, some bin come on contract and oda arrangement, but we and di locals dey very fine since den. Na only last Thursday, we see say dem do protest for hia, dis place always dey peaceful."

Oga Darko say dem get notice say dem go do anoda protest for di area for 11 May.

"We bin dey put plans in place for di May demonstration, so nobody go dey affected for hia. I bin contact dia station commanders for Mthatha and dem dey alert," oga Darko explain.

E add say "We don discuss wit di mayor for dis area and oda pipo, so dem dey on top of di mata ahead of di 11 May protest for hia."

Di Mthatha community chairman say make dia family and friends wey dey Ghana remain calm sake of di situation dey under control.

"Di South Africa president during im address for di National Freedom Day celebration chook mouth for dis mata, wey mean say tins go beta. We dey hope say tins go return to normal across oda parts of di kontri."

Im advise di Ghanaians wey dey stay for Pretoria and oda surrounding communities say make dem stay indoors and avoid gathering as a group for public at dis time.

"Di high commissioner bin send notice to us and oda community leaders ahead of di Pretoria protest. Im tok say make we no involve for any protest, make pipo dey dia house."

"E also add say make we keep low profile and make pipo no enta social media to post anytin wey fit carry confusion come and attract di attention of di locals. Na so I bin share dis letter wit all di community members for hia."

Dr. Yirenkyi Gyekye Darko add say im dey in touch wit oda Ghanaian community leaders for Queenstown and East London wey dem dey share information about how to stay safe and work in peace.

Earlier, di Nigerians in Diaspora Commission (NiDCOM) bin issue advisory to Nigerian citizens for di southern kontri, and advise dem to take caution and avoid areas wey trouble fit escalate.

Nidcom advise Nigerians to avoid confrontation, stay away from protest areas and closely monitor local media for updates.

Di agency also ask business owners to consider temporarily closing dia shops during di period, as dem warn say foreign-owned businesses na target most times during such unrest.

Di statement add say Nigeria diplomatic mission for Johannesburg go dey open and go dey work wit South African security agencies to ensure di safety of dia citizens.

Also, Nigeria govment say di Ministry of Foreign Affairs say diplomatic engagements dey go on between di two kontris.

NIDCOM Chairman, Abike Dabiri wey give di informate say, "Africa Union gatz intervene for dis dastardly xenophobic attacks against blacks for South Africa".

Xenophobia for long don be issue for South Africa and dey occasionally lead to outbursts of deadly violence.

Ghana Foreign Affairs Ministry say dia officials don also meet South Africa acting high commissioner to Ghana, Thando Dalamba, and don raise formal protest ontop di recent "xenophobic incidents" against foreigners, including dia citizens.

South Africa na home to about 2.4 million migrants, just less dan 4% of di population, according to official figures. However, belief dey say many more dey di kontri unofficially.

Most of dem come from neighbouring kontris like Lesotho, Zimbabwe and Mozambique, wey get history of providing migrant labour to dia wealthy neighbour. Small number come from Nigeria.

Vigilante groups like Operation Dudula, wey mean to force out for di Zulu language, and March on March claim say migrants don full South Africa and dem blame di migrants for many of di kontri social problems, especially unemployment and drug abuse.

Dem don hold demonstrations for major cities wey sometimes turn violent and result in attacks on foreign-owned shops.

Earlier dis week, March on March bin lead one protest for di port city of Durban and inside one clip wey spread on social media, e show as some of di participants bin seriously dey attack one man dem believe say na illegal foreigner.