Kuva ku iyicwa rya Khamenei kugeza ku iterabwoba rya Trump ryo 'gusenya Iran': Ibintu 10 by'ingenzi byabaye mu minsi 100 ya mbere y'intambara

Iminsi ijana irashize intambara ya Amerika na Israel kuri Iran itangiye.

Mu gicuku cyo ku ya 28 Gashyantare 2026, Leta Zunze Ubumwe za Amerika na Israel bagabye ibitero icyarimwe kuri Iran; ibitero byibasiye abategetsi bakuru ba Repubulika ya Kiyisilamu kuva mu ntangiriro ikwirakwira vuba igera ku mwaro wa Hormuz, no mu bihugu by'Abarabu biherereye mu kigobe, na Liban.

Iyi nkuru igaragaza ibintu 10 by'ingenzi byabaye muri iyi minsi 100 ishize y'intambara.

Uretse uwo mutegetsi w'imyaka 86, abakuru ba gisirikare benshi nabo bishwe mu bitero byo ku munsi wa mbere w'intambara.

Ali Shamkhani, Umunyamabanga w'Inama y'Igihugu ishinzwe kwirwanaho

Abdulrahim Mousavi, Umugaba Mukuru w'Ingabo

Mohammad Pakpour, Umugaba Mukuru w'Ingabo zirinda impinduramatwara

Na Aziz Nasirzadeh, Minisitiri w'Ingabo, bari mu bantu bakomeye bishwe

Iki gikorwa cyabaye ikintu gikomeye cyane ku butegetsi bwa Iran kuva bwashingwa, kandi kuva uwo munsi intambara yahise ifata n'akarere mu gihe Iran yihoreraga.

Intangiriro y'intambara n'iyicwa rya Ali Khamenei

Mu gicuku cyo kuwa Gatandatu tariki ya 28 Gashyantare 2026 gishyira itariki ya 01 Werurwe, Amerika na Israel bagabye ibitero bikomeye ku bikorwa bya gisirikare bya Iran, iby'umutekano, n'ibya politiki.

Kimwe mu bitero bya mbere kandi by'ingenzi byagabwe ni ku nyubako ya Pasteur i Tehran, aho Ali Khamenei, umutegetsi w'Ikirenga wa Repubulika ya Kiyisilamu, yari ari.

Uwo munsi igisirikare cya Israel cyatangaje ko cyagabye ibitero icyarimwe ahantu hatatu abategetsi ba Iran bari bateraniye, kandi ko "benshi mu bategetsi" ba Iran "bishwe" muri ibyo bitero.

Nyuma y'amasaha 20, televiziyo ya leta ya Iran yemeje ku mugaragaro urupfu rwa Ali Khamenei.

Igitero ku ishuri ry'i Minab

Ishuri ribanza ry'i Minab, mu Ntara ya Hormozgan mu majyepfo ya Iran, ryarashweho ku munsi wa mbere w'intambara.

Icyo gitero cyahitanye abantu 156, abenshi muri bo bakaba bari abana b'abanyeshuri bari hagati y'imyaka 7 na 12.

Abarimu benshi n'ababyeyi b'abanyeshuri nabo bishwe muri icyo gitero.

Abategetsi ba Iran bashinje Amerika na Israel kuba ari bo bakoze icyo gitero, kandi raporo zasohotse mu bitangazamakuru mpuzamahanga zavugaga ko igisirikare cya Amerika cyagize uruhare muri icyo gitero, ariko Washington ntiyemera ku mugaragaro ko yagikoze.

Iki gitero cyaranenzwe cyane muri Amerika ndetse cyanateye uburakari mpuzamahanga.

Ifungwa ry'uhora Hormuz

Mu ntangiriro z'intambara, Iran yagenzuraga cyane ingendo z'ubwato zinyura mu muhora wa Hormuz, igikorwa cyahinduye ikirere cy'intambara kiva ku mirwano ya gisirikare kijya ku kibazo cy'ibitoro na gaze ku isi.

Iki gikorwa cyabaye nyuma y'imyaka myinshi y'iterabwoba, kandi ku nshuro ya mbere, cyemereye Iran kugenzura urujya n'uruza mu muhora wa Hormuz mu rwego rwo gusubiza ibitero bya Amerika na Israel.

Umuhora wa Hormuz ni umwe mu nzira z'ingenzi zo kohereza peteroli na gaze ku isi, kandi ingamba za Iran zo guhagarika ingendo zo kunyuramo zatumye ibiciro bya peteroli bizamuka, ibiciro by'ubwishingizi bw'amato bizamuka, ndetse n'impungenge zikomeje kwiyongera ku mutekano w'amato mu kigobe cya Perse.

Kuva icyo gihe, gufungura uyu muhora w'ingenzi byabaye intego y'ingenzi ya Amerika mu biganiro byakurikiyeho, ariko ubu nyuma y'iminsi 100, urujya n'uruza mu muhora wa Hormuz ntirwasubiye mu bihe bya mbere y'intambara.

Bamwe mu basesenguzi bemeza ko iminsi 40 ya mbere y'intambara yatumye Iran irushaho gusobanukirwa akamaro k'uyu muyoboro nk'igikoresho cy'ingenzi cyo gukaza igitutu.

Ibitero ku birindiro bya Amerika mu kigobe

Mu byumweru bya mbere by'intambara, Iran yagabye ibitero bikomeye bya misile na drones kuri Israel, ndetse n'ibitero byinshi mu bihugu by'Abarabu byo muri ako karere.

Bahrain, Kuwait, Emira Zunze Ubumwe z'Abarabu, Arabiya Sawudite na Qatar byatangaje ko byafashwanyaguje ibisasu bya misile na drones cyangwa ibitero ku bice bifitanye isano n'ingabo za Amerika.

Nyuma, iperereza ryakozwe n'ishami rishinzwe iperereza rya BBC Persian ryagaragaje ko mu minsi 40 ya mbere y'intambara, Iran yagabye ibitero ku birindiro 20 bya gisirikare bya Amerika mu bihugu umunani, nubwo umubare nyawo w'inyubako zangiritse ushobora kuba uri hejuru cyane.

Ibitero byangije cyane inyubako za gisirikare, harimo 'radar' zihenze kandi zikomeye hamwe n'indege zari ziparitse muri ibyo bigo.

Hagati aho, Amerika na Israel bakomeje kugaba ibitero ku bigo byinshi bya gisirikare, ibisasu bya misile, ibirwanisho byo mu mazi, n'iby'umutekano muri Iran.

Muri iki gihe, ibitaro byinshi, kuri za kaminuza n'ibigo bya gisivili nabyo byagabweho ibitero cyangwa byarasenywe, bigaragaza urwego rw'ubukana bw'iyi ntambara.

Mojtaba Khamenei: Umutegetsi wa gatatu wa Iran

Ku ya 8 Werurwe, itangazamakuru ryo muri Iran ryatangaje ko Mojtaba, umuhungu wa Ali Khamenei, yagizwe umutegetsi w'Ikirenga mushya wa Iran.

Bitewe n'umutekano n'intambara irimo, nta makuru menshi yatangajwe ku bijyanye n'igihe inama y'impuguke yafatiyeho umwanzuro, n'uburyo bwakoreshejwe kumugena.

Ishyirwaho rya Mojtaba Khamenei ryari rimwe mu mpinduka zikomeye za politiki muri iyi ntambara.

Leta ya Iran yabyerekanye nk'ikimenyetso cyo gukomeza ubutegetsi no kubungabunga ituze, ariko abayinenga bavuga ko icyo cyemezo cyagaragaje uburyo ubutegetsi bwa Repubulika ya Kiyisilamu na IRGC bwari burimo kwerekezwa ku bantu bakikije umutegetsi w'ikirenga.

Iyicwa rya Ali Larijani

Ku ya 17 Werurwe (3), Ali Larijani, Umunyamabanga w'Inama Nkuru y'Umutekano w'Igihugu akaba n'umuyobozi ukomeye muri guverinoma ya Iran, yishwe mu gitero cyagabwe na Israel.

Iyicwa rya Ali Larijani ryagaragaje ko ibitero bitagarukira ku bakuru ba gisirikare gusa, kandi ko abayobozi bakuru ba politiki nabo bari ku rutonde rw'abagomba kwibasirwa.

Iyicwa rye ryanagaragaje ko gukuraho umuntu wagize uruhare runini mu gushyiraho inzira za guverinoma zo hanze n'iz'imbere mu butegetsi byari gutuma gufata ibyemezo muri Tehran bigorana.

Larijani yishwe mu gihe no mu bihe aho, Ali Khamenei wahoze ari umutegetsi wa Repubulika ya Kiyisilamu adahari, hanyuma hakaza kubura umutegetsi mushya, byavuzwe ko ari we "mutegetsi" ugenzura ibikorwa bya leta.

Igitero cyagabwe ku kiraro kinini cy'i Karaj

Ku ya 2 Mata(4), ikiraro cya B1 cyari hafi gufungurwa mu gace ka Bilqan aho umuhanda uziw nka Chalus uhurira n'uruzi rwa Karaj cyagabweho igitero n'ingabo za Amerika kirangirika bikomeye.

Iki kiraro, cyagombaga kuba gifite agahigo ko kuba ikiraro "kinini" mu Burasirazuba bwo Hagati, cyabaye urugero rw'igitero cyagabwe ku bikorwa remezo by'abaturage ba Iran.

Nyuma y'amasaha make igice cy'ikiraro gisenyutse, Perezida Donald Trump yatangaje amashusho y'iki kiraro kirimo kurashwa butumwa yanditseho ati: "Ikiraro kinini cyane muri Iran cyasenyutse kandi ntikizongera gukoreshwa. Hari byinshi biri imbere!"

Trump yongeyeho ati: "Igihe kirageze ngo Iran yumvikane mbere yuko ibintu birushaho kuba bibi!"

Nubwo igitero cyashenye iki kiraro cyagize ingaruka nyinshi ntabwo cyari igitero cya mbere ku bikorwa remezo bya Iran.

Mbere yaho, uruganda rw'icyuma rwa Isfahan, uruganda rw'icyuma rwa Mobarakeh ruri muri Ahvaz, ikirwa cya Kharg, n'ikibuga cya peteroli cya South Pars byari byibasiwe.

Mu ntambara, uretse ibirindiro bya gisirikare bya Amerika, Iran yanateye ibitero by'abaturage bo muri ako karere, harimo ibibuga by'indege na sitasiyo za peteroli na lisansi mu bihugu byo mu kigobe cya Perse.

Iterabwoba rya Trump ryo "gusenya Irani"

Ku itariki ya 7 Mata, Trump, mu ijambo rye yaburiye ko Tehran niramuka itubahirije amasezerano, Iran "izasenywa."

Ibya byaramaganwe cyane ku rwego mpuzamahanga, aho imiryango iharanira uburenganzira bwa muntu yavuze ko ari akaga no gukanga abantu kubarimbura.

Guhagarika intambara

Umunsi umwe nyuma y'iterabwoba ridasanzwe rya Trump, ku ya 8 Mata, Iran na Amerika byemeye guhagarika imirwano by'agateganyo.

Nubwo uku guhagarika imirwano byatumye imirwano igabanuka, amasezerano yari afite intege nke kuva mu ntangiriro.

Amakimbirane ku bijyanye n'umuhora wa Hormuz, ibitero bya Israel bikomeje muri Liban, n'amasezerano y'aya masezerano yo guhagarika intambara byatumye impande zombi zigabanya urugero rw'imirwano.

Mu byumweru byakurikiyeho, impande zombi zakomeje gushinjanya ko zishe amasezerano yo guhagarika imirwano.

Ibiganiro bitaziguye muri Pakisitan

Ku itariki ya 11 na 12 Mata (4), iminsi mike nyuma y'itangazwa ry'umugambi wo guhagarika imirwano, ibiganiro bya mbere byo ku rwego rwo hejuru hagati ya Iran na Amerika byabereye muri Pakisitan.

Mohammad Baqer Qalibaf, ukuriye Inteko Ishinga Amategeko ya Iran akaba n'umwe mu bayobozi bakuru ba Tehran, yaganiriye na Visi Perezida wa Amerika JD Vance.

Ibi biganiro ntibyageze ku masezerano ya nyuma, ariko byari bifite akamaro kanini muri politiki, kuko byari ubwa mbere habaho imikoranire itaziguye ku rwego nk'urwo kuva intambara yatangira.

Inama yanafatwaga nk'iya mbere hagati y'abategetsi bakuru b'ibihugu byombi kuri uru rwego kuva ku mpinduramatwara yo mu 1979.

Hagati aho, hari hakomeje ibikorwa by'ingabo za Amerika mu muhora wa Hormuz no gushyira igitutu kuri Iran ngo ifungure uyu muhora.

Nyuma y'umunsi umwe Qalibaf na Vance bahuriye i Islamabad, Trump yatangaje ko ahagaritse ibyambu bya Iran kandi ko atazemerera amato kujya cyangwa kuva muri Iran.

Iki kibazo cyatumye habaho ubushyamirane hagati y'ibihugu byombi ndetse n'izamuka ry'ibiciro bya peteroli ku masoko mpuzamahanga.

Imbaraga, zifatwa nk'izigamije guhatira Iran kugera ku masezerano Trump yashakaga ku meza y'ibiganiro cyangwa gufungura Strait of Hormuz, kugeza ubu zarananiwe.

Nyuma y'iminsi 100

Mu byumweru bya nyuma by'iki gihe, imirwano ya hato na hato irakomeje mu kigobe.

Ibitero bya Amerika ku nkengero z'inyanja za Iran, ibitero bya drones, n'ibitero bya Tehran byo kwihimura kuri Kuwait na Bahrain na Israel byagaragaje ko intambara itararangira.

Umuhanda wa Hormuz nturafungurwa, kandi inzitizi zo mu mazi ku byambu bya Iran ntizirakurwaho; icyakora, ibikorwa by'ubuhuza birakomeje.

Nyuma y'iminsi 100 intambara itangiye, ako karere karacyari mu bihe by'intambara n'amahoro; guhagarika imirwano ntabwo bihagije kugira ngo hagaragazwe irangira ry'intambara, ndetse n'impande zombi ntiziteguye kwemera ingaruka zo gusubira mu ntambara.

Muri ubwo buryo, amaso aracyari ku musaruro w'ibiganiro n'ejo hazaza h'umuhora wa Hormuz.