Trump yavugirijwe induru i New York mu gihe yari abaye perezida wa mbere wa US witabiriye NBA Finals

Donald Trump yavugirijwe urwamo rwo kumwamagana ku mukino wa Basketball i New York mu gihe yari abaye perezida wa mbere uri ku butegetsi witabiriye imikino ya NBA Finals.

Byabaye nyuma y'uko abantu bafite amatike yo kwinjira bategereje amasaha ku mirongo hanze ya arena yitwa Madison Square Garden kubera ingamba z'umutekano zazanye na perezida.

Trump yari yaje kureba umukino wa New York Knicks yakiriye San Antonio Spurs mu mukino wa gatatu muri irindwi ya NBA finals, aho Knicks yatsinze ibiri ibanza.

Umukuru w'umujyi wa New York Zohran Mamdani hamwe n'ibindi byamamare binyuranye na bo bitabiriye uwo mukino wabaye mu ijoro i New York, mu rukerera ku masaha yo mu Rwanda no mu Burundi.

Kuvugiriza urwamo Trump byabaye ubwo camera zamwerekanaga kuri 'screens' nini muri iyo arena, arimo guterera isaluti umuhanzi waririmbye indirimbo y'igihugu.

Trump yitabiriye uyu mukino ari kumwe n'umwuzukuru we Kai Trump hamwe na nyiri ikipe ya Knicks witwa James Dolan, na bamwe mu bagize leta ye.

Trump, umurepubulikani wavukiye mu gace ka Queens muri New York, yagiye agirana ingorane n'abatuye uyu mujyi wiganjemo abademokarate.

Ibyamamare birimo Chalamet, Tina Fey, Tracy Morgan, Ben Stiller, Larry David, Spike Lee, Derek Jeter na Eli Manning bari mu babonetse kuri uyu mukino.

Trump wari wabanje kujya ku kibuga cye cya Golf muri New Jersey, yafashe kajugujugu ya Marine One ajya i Manhattan muri New York, maze yerekeza kuri arena aherekejwe n'imodoka za perezida.

Kuhagera kwe byasobanuye ko imihanda izengurutse Madison Square Garden ifungwa ngo boroshye kugenda kwe.

Abapolisi ibihumbi n'amagana y'abakozi b'urwego rumurinda rwa Secret Service bari boherejweyo.

Bariyeri z'ibyuma zari zashyizwe kuri buri gice abafana binjiriramo muri arena. Ibi byatumye abafana ba Knicks benshi bagorwa no kwinjira kubera imirongo miremire.

Umwe mu bafana yabwiye BBC ko umutekano wakajijwe "wishe 'ibyishimo' bya Knicks".

Manhattan yari yuzuye abafana ba Knicks bambaye amabara ya orange n'ubururu, benshi barebera umupira ku mihanda no mu tubari.

Bimwe mu birori bibera hafi ya Madison Square Garden nyuma y'umukino byahagaritswe kubera kuhagera kwa Trump.

Muri iyi minsi, abafana ba Knicks bari mu byishimo byo kuba ikipe yabo iheruka gukina Finals nk'izi mu myaka 17 ishize, kandi ubwo baheruka muri iyo mikino na bwo bakinaga na San Antonio Spurs.

Gusa, undi mufana w'imyaka 44 yabwiye BBC ko kuza kwa Trump "byateje rwaserera".

Gusa buri wese ntiyarakariye Trump.

Umufana wa Knicks Anthony Pulley w'imyaka 43 yabwiye ibiro ntaramakuru AFP ko izo mpinduka koko zari zibangamye ariko ashimira Trump kuza kuri uwo mukino.

Yagize ati: "Ni byiza ko ashaka kugaragara kuri iyi mikino".

Inyubako nyinshi zizwi ku isi zo muri New York nka Empire State Building na One World Trade Center nijoro zose zari zicanyeho amatara y'amabara ya orange n'ubururu ya Knicks

Nyuma y'uko Knicks itsinze imikino ibiri ibanza kuri arena ya San Antonio muri Texas, abafana benshi cyane ba Knicks bari bifuje kuza kuyishyigikira ku mukino wa gatatu muri arena yayo i New York.

Ariko benshi ntibabashije kwigondera itike yo kwinjira, aho ihendutse yagurishwaga (resale) 'online' yageze hejuru ya $10,000 (hafi miliyoni 15 Frw) kugera ku zihenze cyane zaguraga $100,000 (hafi miliyoni 150 Frw).

N'ubusanzwe, umukino wa shampiyona wa Knicks ku kibuga cyayo usanzwe uba mu mikino ihenze cyane muri NBA.

Ku wa gatanu ushize abajijwe kuri ibi biciro bikabije y'uyu mukino wa none, Trump yagize ati: "Ni uko ubuzima bugenda. Gusa ni nkaho ari ubuntu kuwureba kuri televiziyo"

Mamdani ukuriye New York, yabwiye abanyamakuru ko we tike yayiguze mbere aho yishyuye 1,000$ (hafi miliyoni 1,5 Frw).