Pêl-droed: Casnewydd yn osgoi disgyn ond Wrecsam yn colli cyfle

Mae tîm pêl-droed Casnewydd wedi llwyddo i aros yn Adran Dau Lloegr a hynny mewn modd dramatig, wrth iddyn nhw sgorio dwy gôl hwyr i guro Barrow.

Gyda 15 munud yn weddill, roedd hi'n edrych yn debygol y byddai Casnewydd yn disgyn o'r gynghrair am y tro cyntaf mewn 13 mlynedd, ond 1-2 oedd y sgôr terfynol.

Tom Davies a Bobby Kamwa wnaeth hawlio'r goliau i Gasnewydd.

Ond nid dathlu oedd cefnogwyr Wrecsam ddydd Sadwrn, ar ôl i'w gêm yn erbyn Middlesbrough orffen yn gyfartal (2-2).

Mae hynny'n golygu eu bod yn colli allan ar gyfle i fod yn chweched yn y Bencampwriaeth ac felly safle yn y gemau ail-gyfle i fynd i gynghrair uchaf Lloegr.

Felly er gwaethaf goliau Josh Windass a Sam Smith, bydd Wrecsam yn aros yn yr un gynghrair at y tymor nesaf.

Ennill oedd hanes Abertawe yn yr un gynghrair, 3-1 yn erbyn Charlton, tra bod Caerdydd wedi colli 5-4 yn erbyn Mansfield yn Adran Un.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.