Gwefan AI 'wedi dwyn cannoedd o bunnoedd o'n harian ni'

Mae cwsmeriaid sy'n dweud iddyn nhw gael eu twyllo gan wefan oedd wedi'i chreu gan ddeallusrwydd artiffisial (AI) yn rhybuddio pobl i fod yn wyliadwrus ac yn galw am fynd i'r afael â gwefannau o'r fath.

Dywedodd nifer o gwsmeriaid wrth BBC Cymru eu bod wedi prynu gemwaith o wefan 'Seren Jewellery', gan gredu eu bod yn cefnogi busnes lleol yng Nghymru.

Ond dywedon nhw eu bod yn dal i aros am yr eitemau fisoedd yn ddiweddarach, ac yn "dal i aros am yr arian 'nôl".

Ar ôl i BBC Cymru gysylltu â'r cwmni, cafodd y wefan ei dileu.

Mae BBC Cymru wedi gwneud sawl ymgais i gael ymateb gan y cwmni, ond ni chafwyd unrhyw ateb.

Roedd Lowri Ann yn un o'r rhai a brynodd emwaith o wefan Seren Jewellery ar ôl gweld hysbyseb ar-lein.

Roedd y wefan yn honni eu bod yn fusnes o Gaerdydd oedd yn cau oherwydd "rhesymau personol".

Roedd yn nodi eu bod yn cynnal gwerthiant cau lawr, gyda gostyngiadau o hyd at 80%, ac yn annog cwsmeriaid i brynu'r stoc olaf cyn iddyn nhw gau am byth.

Dywedodd Lowri ei bod wedi'i denu gan yr enw Cymreig a'r honiad ei fod yn fusnes lleol.

"Nes i weld yr enw Seren Cardiff a meddwl, 'waw, busnes lleol'.

"Roedd y gemwaith yn edrych yn hyfryd ac mewn sale mawr.

"Roedd neges ar y wefan yn dweud bod nhw'n gorfod cau oherwydd costau byw, felly nes i brynu."

Gwariodd tua £100 ar glustdlysau a mwclis, ond wythnosau'n ddiweddarach doedd dim wedi cyrraedd.

"Nes i ebostio sawl gwaith ond doedd dim ymateb.

"Wedyn nes i ddechrau ymchwilio a sylweddoli bod y lluniau wedi'u dwyn o wefannau eraill.

"Dyna pryd nes i sylweddoli 'mod i wedi cael fy sgamio."

Dywedodd ei bod hi'n "ifanc ac fel arfer yn dda am adnabod sgamiau", ond bod y wefan wedi'i thwyllo'n llwyr.

"Pan ti'n edrych ar yr holl reviews mae'n amlwg bod y cwmni AI yma wedi dwyn cannoedd o bunnoedd gan bobl. Mae angen ei stopio."

Roedd Finnley Idris yn chwilio am anrheg pen-blwydd i'w gariad pan ddaeth ar draws y wefan.

Gan fod y cwmni'n honni ei fod yn fusnes Cymreig, dywedodd ei fod yn awyddus i gefnogi busnes lleol.

"O'n i eisiau prynu rhywbeth lleol iddi. Roedd y wefan yn edrych yn broffesiynol iawn ac roedd popeth yn edrych yn ddilys."

Ond ar ôl wythnosau o aros, doedd dim golwg o'r gemwaith.

"Nes i sganio'r lluniau gan ddefnyddio tool arbennig a gweld wedyn eu bod nhw wedi dod o wefannau eraill.

"Dyna pryd nes i clocio 'mod i wedi cael fy sgamio."

Dywedodd nad oedd unrhyw beth yn codi amheuaeth ar y dechrau.

"Roedd telerau fel '30 day money back guarantee' a 'secure payment'.

"Roedd popeth yn edrych yn real. Dim ond wedyn nes i weld bod y cyfan yn ffug."

Mae Finnley yn credu bod angen mwy o reoleiddio ar gynnwys sy'n cael ei greu gan ddeallusrwydd artiffisial.

"Mae AI wedi gwneud hi'n llawer rhy hawdd i greu gwefannau sy'n edrych yn gwbl ddilys.

"Erbyn hyn mae'n teimlo bod rhaid cwestiynu popeth rwyt ti'n ei weld ar-lein."

Dechreuodd Jack Knowles edrych yn fanylach ar wefan Seren Jewellery ar ôl i'w fam fynegi rhwystredigaeth nad oedd eitemau wedi cyrraedd, er iddi dalu cannoedd o bunnoedd.

Dywedodd iddo geisio olrhain yr archeb a chysylltu â'r cwmni, ond heb unrhyw lwyddiant.

"O'dd Mam 'di prynu braclet oddi ar y wefan, a wythnosau wedyn doedd dim parsel.

"O'n i'n trio ffeindio parcel tracking neu ffordd o gysylltu efo nhw, ond doedd dim byd.

"'Naethon ni anfon llwyth o emails hefyd ond dim ateb."

Wrth edrych ymhellach i'r wefan, dywedodd iddo sylweddoli pa mor soffistigedig oedd y twyll.

"O'dd e'n edrych fel gwefan go iawn, yn broffesiynol. O'dd hi heb sylweddoli, a nes i ddim chwaith."

Mae'n credu bod y defnydd cynyddol o AI yn gwneud hi'n haws nag erioed i sgamwyr greu gwefannau sy'n ymddangos yn ddilys.

"Mae'n eitha' ofnus bod AI yn gallu gwneud gwefan mor realistig, a bod e mor hawdd gwneud hynny erbyn hyn.

"Mae'n mynd i ddigwydd eto ac eto os na chaiff rhywbeth ei wneud."

Dywedodd Ditectif Arolygydd Iolo Edwards o Heddlu'r Gogledd fod sgamiau sy'n defnyddio AI yn dod yn fwyfwy cyffredin.

"Mae troseddwyr yn defnyddio technoleg fel AI i greu gwefannau sy'n edrych yn gwbl ddilys, ac mae hynny'n ei gwneud hi'n llawer anos i ddefnyddwyr adnabod sgam.

"Mae angen i'r defnydd o AI ddatblygu ochr yn ochr â mesurau sy'n diogelu'r cyhoedd.

"Wrth i'r dechnoleg ddatblygu, mae'n bwysig bod defnyddwyr yn gallu ymddiried yn yr hyn maen nhw'n ei weld ar-lein."

Mae gwefannau wedi'u creu gan ddeallusrwydd artiffisial ar gynnydd, yn ôl data Llywodraeth y DU.

Dywedodd llefarydd bod twyll ar-lein yn "weithred ffiaidd", a bod y Ddeddf Diogelwch Ar-lein yn ei gwneud hi'n ofynnol i gwmnïau ddiogelu defnyddwyr rhag twyll anghyfreithlon, gan gynnwys twyll sy'n defnyddio deallusrwydd artiffisial.

O flwyddyn nesaf ymlaen, bydd yn rhaid i lwyfannau digidol mawr gymryd camau ychwanegol i amddiffyn defnyddwyr rhag hysbysebion

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.