Y salon sy'n rhoi hyder i gleifion canser

Mae siop trin gwallt yn Nryslwyn ger Llandeilo yn cynnig gwasnaeth am ddim i gwsmeriaid sy'n colli eu gwallt wrth fynd drwy driniaeth canser.

Dywedodd perchennog y siop, Cath Redfern ar raglen Bore Cothi, Radio Cymru: "Mae'r cwsmeriaid wedi fy nghefnogi i ers blynyddoedd, felly y peth lleiaf fedra i 'neud ydi cynnig eu cefnogi nhw drwy beth sy'n amser ofnadwy o anodd yn eu bywyd nhw."

Drwy gyd-weithio gydag elusen Cancer Hair Care, mae Cath a'i chyd-weithwr Becky'n rhoi wigiau synthetig am ddim a'u steilio, trin gwallt, a rhoi cyngor ar sut i ofalu am y gwallt a'r croen wrth fynd drwy driniaeth cemotherapi.

A hithau'n trin gwallt ers dros 25 o flynyddoedd fe sylweddolodd Cath fod mwy o'i chwsmeiriaid yn cael ei heffeithio gan ganser y dyddiau hyn.

"Mae lot o cwsmeriaid fi'n cael canser, mae'r ystadegau yn un mewn dau nawr felly fi'n clywed e lot fwy na beth o'n i flynydde yn ôl.

"O'n i jest moyn helpu a rhoi tamed bach o normalrwydd yn ôl i rywun os ydyn nhw'n mynd drwy driniaeth fel cemo.

"Dim doctor ydw i, fi ffili 'neud nhw'n well ond mae colli gwallt yn rhywbeth anferth.

"Ni wedi cael ein gwallt ers i ni gael ein geni a gall rhywun golli hyder wrth golli gwallt. Fi mewn sefyllfa lle i fi'n gallu helpu pobl yn fy ffordd fy hunan felly dyna beth i fi'n gwnud yn y salon. Fi moyn rhoi hyder i bobl sy'n mynd drwyddo fe."

Mae effaith canser hefyd wedi bod yn rhan fawr o fywyd Cath ers ei bod hi'n blentyn gyda'i brawd, ei mam-gu, a'i mam wedi cael diagnosis.

"O'n i'n ifanc iawn pan gafodd fy mrawd, Ryan, ddiagnosis o ganser Hodgkin Lymphona pan oedd e'n 6 oed.

"Fi'n cofio mynd i weld e'n yr ysbyty yn colli gwallt, a merched bach hefyd."

Fe wellodd Ryan ond mae'r atgof o'i weld yn yr ysbyty'n sâl gyda phlant bach eraill yn un sy'n parhau'n ddwfn i Cath.

Fe gollodd ei mam-gu ei ganser yn ddiweddarach, a rhai blynyddoedd yn ôl fe gafodd ei mam ddiagnosis o ganser y fron.

"Oedd Mam yn lwcus iawn, gath hi wared ar y lwmpyn yn ei bron ac oedd hi'n ocê. Os bydde hi wedi colli ei gwallt bydde hi wedi bod yn devastated gan ei bod hi'n gymaint o fashionista."

Er mwyn cefnogi pobl sy'n wynebu triniaeth canser fe ddechreuodd Cath wirfoddoli yn Ysbyty Glangwili ddeunaw mis yn ôl.

Bob bore Iau bydd hi neu ei chyd-weithwraig Becky'n gadael y salon i wirfoddoli gydag elusen Cancer Hair Care yn yr ysbyty.

Eglurodd: "Mae troli bach 'da fi gydag amrywiaeth o headwear a fringes a mae hwnna'n ryddhad i'r bobl sy'n cael cemo ar y pryd, jest i gael rhywun i siarad gyda a trafod y posibiliadau os bydd colli gwallt yn digwydd iddyn nhw.

"Gall capiau â ffrinjis bach ynddyn nhw fod yn gamechanger i rywun sydd ddim moyn wig."

Ond roedd Cath eisiau rhoi mwy o gefnogaeth i gleifion canser na gwirfoddoli'n wythnosol yn Ysbyty Glangwili.

Erbyn hyn mae Cath wedi trawsnewid ystafell yn ei salon yn Nryslwyn er mwyn gallu rhoi ymgynghoriad preifat ac am ddim i gwsmeriaid sy'n derbyn triniaeth cemotherapi.

Yno bydd hi, Becky neu'r ddwy yn trafod gwahanol opsiynau gyda'r cwsmer.

Yn ôl Cath, mae Becky'n "sidekick fabulous".

Ychwanegodd: "Mae Becky'n wych am roi gwybodaeth am beth sydd ar gael - wigs, headwear a pha shampŵ sy'n addas, ac mae'n wych am egluro sut i edrych ar ôl y croen a'r scalp."

Yn ôl Cath mae torri wigiau a'u steilio i siwtio'r cwsmer mor bwysig.

Meddai: "Fi'n licio torri'r wigs, siapio fe rownd y wyneb, a'i steilio. Mae'n rhaid bod y cwsmer yn hapus, yn teimlo'n dda ac yn gyfforddus ynddo fe.

"Mae synthetic wigs yn fabulous erbyn hyn. Sdim pawb yn gallu fforddio prynu wig gwallt go-iawn am £700. Drwy weithio gyda elusen Cancer Hair Care gallwn ni roi synthetic wigs am ddim felly mae digon o opsiynau."

Gobaith Cath yw ei bod hi'n rhoi rhywfaint o gysur i rai sy'n mynd drwy amser caled.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.