Cystadleuaeth golff ym Môn sy'n codi arian i achosion lleol yn dathlu'r 40

Mae cystadleuaeth golff ar Ynys Môn sy'n cefnogi cymdeithasau lleol ar fin cyrraedd carreg filltir nodedig.

Bydd Golff Llannerchymedd yn dathlu 40 mlynedd ers ei sefydlu cyn diwedd y mis.

Fe gafodd y gystadleuaeth ei sefydlu yn y lle cyntaf yn 1986, i fod yn achlysur cymdeithasol yn unig.

Ond ddechrau'r ganrif fe benderfynodd y trefnwyr - criw o wirfoddolwyr o'r pentref - fynd ati i godi arian hefyd.

Ers hynny maen nhw wedi llwyddo i godi dros £50,000 ar gyfer achosion lleol.

"Roedd 'na un neu ddau wedi bod yn chwarae pêl-droed i Lannerchymedd ers rhai blynyddoedd ac yn dechrau mynd yn hen," meddai Derek Evans, aelod o'r pwyllgor trefnu, wrth raglen Post Prynhawn ar Radio Cymru.

"Felly y syniad oedd bod 'na griw yn dod at ei gilydd i chwarae golff yn enw Llannerchymedd a threfnu cystadleuaeth.

"Pedwar ohonyn nhw - John Jukes, Arfon Jones, Tony Lewis a Ronnie Gadsby.

"Yr enillydd cyntaf oedd Tony Lewis a mae o'n dal i chwarae hyd heddiw."

Mae unigolion a busnesau lleol yn noddi twll ar y cwrs golff ym Mhorth Llechog ac mae nodyn bach ar bob twll yn dweud pwy sydd wedi gwneud hynny.

Ar hyd y blynyddoedd mae'r ysgol gynradd, capeli ac eglwys y pentref wedi cael arian.

Y llynedd, cronfa leol Eisteddfod Genedlaethol yr Urdd oedd ar ei hennill, ond eleni clybiau pêl-droed ieuenctid Llannerchymedd fydd yn elwa.

"Mae 'na 13 o dimau pêl-droed yma," meddai Dafydd Williams, cadeirydd y pwyllgor ers pum mlynedd.

"Maen nhw'n ofnadwy o dda yma, ac ar foreau Sadwrn a Sul mae caeau Tanparc yn brysur iawn.

"Mi fydd y pres yn eu helpu nhw yn ofnadwy. Mae yswiriant a phethau fel 'na yn ddrud. Mi helpith nhw lot."

Er mwyn cystadlu mae'n rhaid i unigolyn fod â chysylltiad gyda'r pentref, neu fod yn ŵr neu wraig gwadd i chwaraewr o Lannerchymedd.

"Mae o'n anhygoel - wedi dechrau ar raddfa fechan ym 1986 a naw yn chwarae am y tro cyntaf," meddai Derek Evans.

"Erbyn y flwyddyn ddiwethaf, [roedd] dros 70 yn chwarae."

27 Medi ydy dyddiad y gystadleuaeth eleni, gyda'r pwyllgor yn gobeithio y bydd y tywydd yn ffafriol.

"'Dan ni wedi gorfod gohirio ddwywaith neu dair gwaith oherwydd y tywydd," meddai Dafydd Williams.

"Ond 'dan ni'n edrych ymlaen yn ofnadwy gan obeithio y bydd y tywydd yn ffafriol.

"Os ydy rhywun isio cystadlu mae gynno ni dudalen Facebook – Golff Llannerchymedd."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.