Sefyll ar y Sgwâr: 'Byse Richard a Wyn wrth eu boddau'

Mae cyfarwyddwr Sioe yr Eisteddfod eleni yn dweud y byddai'r ddau frawd sydd wedi'i hysbrydoli "wrth eu boddau".

Nod Siwan Llynor, Mari Elen a Nico Dafydd - y criw tu ôl i'r sioe - oedd parhau â gwaddol Richard a Wyn Jones o'r band Ail Symudiad.

Mae Sefyll ar y Sgwâr yn sioe gerdd jiwcbocs newydd sy'n dathlu etifeddiaeth y band.

Bydd y cast yn perfformio'r sioe nos Sadwrn a nos Lun, ac mae pob tocyn eisoes wedi'i werthu.

Dywedodd yr Eisteddfod y bydd y sioe yn "un o uchafbwyntiau artistig ac emosiynol" y Brifwyl eleni, "trwy gyfuno pŵer corawl, stori newydd a thiwns bachog Ail Symudiad".

Ychwanegodd fod y sioe gerdd yn "gyfle unigryw i'r gymuned leol a Chymru gyfan ddathlu etifeddiaeth eiconig Richard ac Wyn Jones (Fflach) ac Ail Symudiad".

Un sydd wedi bod yn brysur iawn yn ceisio rhoi'r cyfan at ei gilydd yw Siwan Llynor, cyfarwyddwr y sioe.

Wrth siarad â Cymru Fyw dywedodd ei bod yn "awyddus iawn i gastio o'r byd cerddorol Cymraeg oherwydd gwaddol a gweledigaeth Richard a Wyn Ail Symudiad".

"Oedden nhw'n cefnogi artistiaid ifanc ar hyd eu gyrfa, felly oedd o'n bwysig i ni fod cerddorion ifanc - nid jest actorion - yn rhan o'r perfformiad yna, a dwi mor falch hefyd bod 'na gerddorion ifanc yn y band hefyd.

"Ma' gyno' ni aelodau o fand Dewin a Lafant ar y llwyfan, a dwi'n siŵr byse Richard a Wyn wrth eu boddau bo' ni'n creu hwn, ac yn creu cyfleoedd i gerddorion ar gychwyn eu gyrfa gerddorol yng Nghymru."

Wrth sôn am y sioe ei hun, dywedodd: "O'n i wir eisiau llwyfannu rhywbeth lle oedd y gynulleidfa yn cael dianc am awr a hanner, yn brofiad theatrig, cerddoriaeth byw a stori dda, a dwi'n gobeithio bod ganddo' ni hynny."

I Gareth Potter, sy'n chwarae rhan Mr Do, mae'r sioe yn golygu llawer iddo.

Bu'n rhannu llwyfan gyda Richard a Wyn dros y blynyddoedd, ac roedd y ddau yn gefnogwyr brwd iddo pan oedd yntau ar ddechrau ei yrfa gerddorol.

"Dwi wedi treulio lot fawr o amser yn yr ardal yma, a hefyd o'n i'n 'nabod Richard a Wyn o Ail Symudiad, ac mae'n fraint i fod yn rhan o'r peth," meddai.

"Mae'n bwysig iawn i ddathlu Ail Symudiad - maen nhw'n un o'r grwpiau yna oedd yn arbennig.

"Maen nhw 'di sgwennu gymaint o ganeuon classic pop Cymraeg, ac weithiau dy'n nhw ddim yn cael eu rhoi mewn 'da'r bandiau mawr, mawr, mawr, ond i fi maen nhw.

"A ma' beth maen nhw wedi gwneud i'r ardal yma, gyda [label recordiau] Fflach yn ogystal ag Ail Symudiad a gyda hybu grwpiau er'ill a phobl greadigol yr ardal, wy'n meddwl bod e'n bwysig iawn dathlu hwnna.

"A ma' pawb yn adnabod y caneuon, ac mae'n grêt cael gwneud hwnna."

Un arall sydd â rôl flaenllaw yn y sioe yw Betsan Lees, sy'n chwarae cymeriad Nansi.

Er ei bod wedi ei magu yng Nghaerdydd, mae ganddi gysylltiad teuluol gref ag ardal yr Eisteddfod.

Dywedodd fod y "sioe yma wedi bod yn ffordd o ailgysylltu â rhan bwysig o bwy ydw i".

"Er 'mod i wedi tyfu lan yng Nghaerdydd, mae gwreiddiau fy nheulu yn ddwfn yn yr ardal yma, ac mae wedi bod yn emosiynol cael dod 'nôl a gweithio yma bob dydd.

"Mae'n gwneud i'r stori deimlo'n bersonol iawn."

Dywedodd ei bod wedi "mwynhau pob eiliad o fod yn rhan o'r cynhyrchiad yma", a'i bod wedi "dysgu cymaint o eiriau ac ymadroddion newydd, ac mae hynny wedi ychwanegu at y profiad".

Dyma sioe broffesiynol gyntaf Mefin Hughes, a dywedodd ei fod yn "teimlo'n ffodus iawn o gael y cyfle".

"Fel rhywun sydd wedi tyfu lan yn yr ardal, mae cael bod ar lwyfan yn adrodd stori sy'n perthyn i'r fro yma'n golygu lot.

"Dwi wedi bod yn ffan o waith Ail Symudiad ers blynyddoedd, felly ma' cael canu eu caneuon wedi bod yn fraint, ac mae'r profiad cyfan wedi rhoi hyder mawr i fi."

Ag yntau'n aelod o fand Lafant, dywedodd ei fod yn "gweld pa mor bell mae dylanwad Richard a Wyn yn ymestyn".

"Maen nhw wedi agor drysau i gymaint o fandiau Cymraeg dros y blynyddoedd, a dwi'n teimlo'n ffodus iawn o gael chwarae rhan fach yn parhau â'r etifeddiaeth honno.

"Mae 'na deimlad go arbennig pan ti'n perfformio'r caneuon yma yn y fro lle gawson nhw eu hysgrifennu."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.