Dyn wedi goroesi ar y môr ger Porthmadog ar ôl 4 awr yn arnofio ar focs

Y traethRNLI

Cafodd y person ei ganfod ar Draeth Harlech yn y diwedd, cyn cael ei gludo i'r ysbyty

Fe wnaeth dyn oroesi ar y môr ger Porthmadog am tua phedair awr yn arnofio ar focs oeri (coolbox) ddydd Iau.

Dywedodd y gangen Gwylwyr y Glannau yng Nghricieth iddyn nhw dderbyn galwad am 15:00 yn codi pryder am gwch oedd yn hwyr yn dychwelyd ar ôl gadael Porthmadog.

Daethon nhw o hyd i'r cwch wyneb i waered ar domen dywod ger y dref, gan godi pryderon am ddiogelwch y person oedd ar goll.

Roedd yr ymgyrch i ddarganfod y person yn cynnwys hofrennydd, gwahanol dimau achub Gwylwyr y Glannau a chwch lleol.

Cafodd yr unigolyn ei ganfod yn y diwedd ar Draeth Harlech, yn dioddef yn ddifrifol o effeithiau o fod mewn dŵr oer, felly cafodd ei gludo i'r ysbyty.

Y gred yw ei fod wedi bod yn y dŵr am dros bedair awr ar ôl i'r llanw trai ei gludo allan o'r aber, gan lwyddo i arnofio drwy ddal gafael yn y bocs oeri.

'Ffodus iawn'

Dywedodd Ifer Gwyn, sy'n aelod o fad achub Cricieth y gall tymheredd y dŵr gymryd amser i gynhesu yr adeg yma o'r flwyddyn, a bod y dyn wedi bod yn ffodus iawn i oroesi.

"Mae'r dŵr tua 13 neu 14 gradd selsiws ar hyn o bryd.

"Yn anffurfiol mae'r rheol yn cael ei ddefnyddio ddyle rhywun aros yn y dŵr am un munud i bob gradd, felly fyse rhyw chwarter awr wedi bod yn ddigon yn yr achos yma i rywun oeri a falle methu symud eu dwylo a'u traed yn rhydd.

"Felly i'r unigolyn yma fod yn dal yna am rai oriau a dal ffeindio ei hunan ar draeth Harlech - ydy mae wedi bod yn ffodus iawn."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.