Achos o Hepatitis A wedi'i gysylltu ag ysgol gynradd

Ysgol Gynradd High Street, Y BarriGoogle

Mae un achos o Hepatitis A sydd â chysylltiad ag Ysgol Gynradd High Street, Y Barri wedi cael ei gadarnhau

Mae pobl wedi gorfod cael triniaeth ysbyty wedi i achosion o lid yr afu ddod i'r amlwg ym Mro Morgannwg.

Dywed Iechyd Cyhoeddus Cymru (ICC) bod un achos wedi ei gadarnhau o Hepatitis A sydd â chysylltiad ag Ysgol Gynradd High Street yn Y Barri, a bod ymholiadau'n cael eu cynnal.

Dydy cyfanswm yr achosion heb ei gadarnhau, ond mae'n llai na 10, medd ICC.

Mae yna apêl i drigolion helpu atal lledaeniad yr haint ac i gael brechlyn os ydyn nhw'n derbyn gwahoddiad.

Dywed ICC eu bod wedi nodi pobl sydd o bosib wedi dod i gysylltiad â'r haint ac wedi cynnig i'w brechu.

Pwysigrwydd hylendid da

Maen nhw wedi pwysleisio pwysigrwydd golchi dwylo a chadw ystafelloedd ymolchi a cheginau'n l'an, gan rybuddio bod risg o ledu'r haint yn enwedig ar ôl bod i'r tŷ bach a chyn paratoi neu fwyta bwyd.

Mae symptomau Hepatitis yn cynnwys:

  • Blinder anarferol neu deimlo'n sâl yn gyffredinol;

  • Tymheredd uchel;

  • Dim awydd bwyta a theimlo'n gyfoglyd;

  • Poen neu deimlad anghyfforddus yn rhan uchaf ochr dde'r abdomen;

  • Pasio dŵr tywyllach na'r arfer neu garthion lliw golau;

  • Y croen neu wyn y llygaid yn melynu;

  • Croen sy'n cosi.

Yn ôl ICC gall rhai - plant ifanc yn arbennig - fod heb symptomau o gwbl, neu symptomau ysgafn yn unig.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig