"12 yaşında bir təcavüz qurbanı" kimi davranaraq dələduzluq edən 37 yaşlı qadın

BBC News Azərbaycanca Xidmətinin hazırladığı xəbərləri, təhlilləri və videoları birbaşa WhatsApp Kanalımızda izləyin. Qoşulmaq üçün linkə klikləyin.

Braziliyada insanlar istismardan qaçdığını, 12 yaşında və tənha olduğunu deyərək kömək istəyən bir qıza evlərini və həyatlarını açaraq dəstək olublar.

Lakin Braziliya rəsmiləri, əslində müdafiəsiz və autizmli bir uşaq kimi davranan 37 yaşlı qadın haqqında tamamilə fərqli bir həqiqəti ortaya çıxarıb.

Qadın dələduzluq və saxta şəxsiyyətdən istifadə etmək ittihamı ilə həbs olunub.

Qadının 14 ay boyunca saxta bir adla bir ailə ilə birlikdə yaşadığı qeyd edilib.

Polis qadının San-Paulu, Rio-de-Janeyro, Minas-Jerays, Riu-Qrandi-du-Sul və Qoyas ştatlarında da bənzər dələduzluqlar etdiyindən şübhələnildiyini bildirib.

İttihama görə, "şübhəli, uşaq rolunu gücləndirmək üçün müntəzəm olaraq əmzik, şüşə qab və oyuncaqlardan istifadə edərək uşaqcasına davranışlar nümayiş etdirib".

Psixoloji qiymətləndirmə

Polis detektivi Qusso "BBC News Brasil"ə verdiyi açıqlamada fırıldağın, qadını himayəsinə götürən ailənin bir yaxınının şübhələnməsi və internetdə demək olar ki, tamamilə eyni görünən bir hadisə ilə bağlı xəbərlər tapması nəticəsində ortaya çıxdığını bildirib.

Qusso digər ştatlardakı polislərlə məsləhətləşdikdən sonra bunun eyni şəxs olduğunu təsdiqləyib.

Şübhəlinin həbs olunarkən dələduzluğunu etiraf etdiyini və yalan danışmağı vərdiş halına gətirdiyini qəbul etdiyini söyləyib.

Qusso "BBC News Brasil"ə "Cinayətkar ruhi xəstəliyə işarə edəcək hər hansı bir əlamət nümayiş etdirmədi. Ağlabatan, əməkdaşlığa hazır və çox məntiqli düşünmə qabiliyyətinə malik idi" deyib.

Oliveyranın vəkili Rafael Luiz Sivert "BBC Dünya Xidməti"nə verdiyi açıqlamada, onun psixoloji vəziyyətini qiymətləndirmək üçün ekspertiza tələb etdiyini və bu tələbin qəbul olunduğunu bildirib.

Vəkil nəticələri gözləyəcəyini və növbəti hüquqi addımları bundan sonra müəyyənləşdirəcəyini qeyd edib.

"Qorxulu" hekayə

Rio-de-Janeyroda istismara məruz qalmış autizmli uşaqlara dəstək olan bir xeyriyyə cəmiyyətini idarə edən iki qadın BBC-yə bildirib ki, eyni qadın 2023-cü ildə onları aldatmaq üçün fərqli bir saxta addan istifadə edib.

"Maos que Abençoam com Amor" adlı təşkilata rəhbərlik edən Viviane Henrikes özünü "Duda" kimi təqdim edən Oliveyra ilə ilk dəfə təşkilatın sosial şəbəkə səhifəsi vasitəsilə əlaqə saxladığını deyir.

Henrikesin sözlərinə görə, Oliveyra şimal-şərqdəki Seara ştatında istismardan qaçdığını, atasının onu fahişəliyə məcbur etdiyini və hormon müalicələrinə məruz qaldığını, yetkin görünüşünün də məhz bununla bağlı olduğunu iddia edib.

Henrikes "Hekayəsini danışanda çox qorxdum, çünki onsuz da bu cür hadisələrlə məşğul oluram" deyir.

"Diqqət, qayğı, yemək"

Eşitdiklərindən təsirlənən Henrikes və həmkarı Renata Maqalhaes Oliveyra üçün kiçik bir mənzil kirayələyib ona baxmağa başlayıblar.

Henrikes "Gənc bir qıza bənzəyirdi" deyir.

"Çox uşaqcasına danışırdı, autizmli olduğunu söyləyirdi və həmişə kapüşonlu gödəkcələr geyinirdi".

Növbəti bir ay ərzində iki qadın onunla emosional bağ qurub.

Onlar Oliveyranın uşaq kimi davrandığını, uşaq şüşəsi, əmzik və uşaq qidası istədiyini, lakin heç vaxt pul tələb etmədiyini bildirirlər.

Maqalhaesin sözlərinə görə, Amanda Searaya geri göndərilməkdən qorxurdu və uşaq mühafizə şurasına aparılmaması üçün onlara yalvarırdı.

Qadınlar onun danışdığı hekayəni təsdiqləyən vahiməli fiziki əlamətlərin də olduğunu qeyd edirlər.

Onu rentgen müayinəsinə apararkən bədənində 200-dən çox iynə olduğunu görüblər.

O bu iynələrin istismarçı atası tərəfindən cadu ritualları zamanı bədəninə yeridildiyini iddia etmişdi.

Maqalhaes "Dəhşətli idi" deyir.

"Ona sevgi, diqqət və yemək verdim. Şübhələnmək üçün heç bir səbəb yox idi" - deyə əlavə edir.

Böyüyən şübhə

"Duda"nın kiminlə birlikdə olmasından asılı olaraq fərqli davranması narahatlıqlara yol açdı.

Maqalhaesin sözlərinə görə, o, emosional cəhətdən asılı vəziyyətə düşdü və tək qaldıqda özünə zərər verməklə təhdid edərək davamlı olaraq diqqət tələb etdi.

"Psixoloji sağlamlığımı və maddi vəziyyətimi məhv etdi. Məni o qədər təzyiq altında saxladı ki, uşaqlarımdan uzaqlaşdırdı" - o deyir.

Lakin Henrikes Oliveyranın davranışlarının onunla birlikdə olarkən stabil olduğunu qeyd edir.

Bu vəziyyət şübhələri artırdı və qadınlar nəhayət polisə müraciət etdilər.

Polis təhqiqat başlatdı və fırıldağın üstünü açdı.

Riodakı işi aparan rəsmi şəxs Monika Areal "BBC News Brasil"ə bildirib ki, polis daha sonra Oliveyranın telefonunda "autizmli insanlar necə davranır" və "istismara məruz qalmış qurban kimi necə şəkil çəkmək olar" kimi internet axtarışları tapıb.

Həbs olundu, amma sərbəst qaldı

O, həbs edildi və ilk məhkəmə iclasında dələduzluğunu etiraf etdi, lakin məhkəmə onun istintaq dövründə azadlıqda qalması barədə qərar çıxardı.

Prokurorlar daha sonra rəsmi olaraq ittiham irəli sürsələr də, rəsmi qurumlar qadını tapa bilmədilər.

Areal qeyd edir ki, dələduzluq məhkəmələr tərəfindən zorakılıq və ya ciddi təhdid ehtiva etməyən bir cinayət kimi qiymətləndirildiyi üçün bu növ hadisələrdə şübhəliləri həbsdə saxlamaq "çətindir".

Maqalhaes başqalarının da eyni fırıldaqçılıq planının qurbanı olduğunu gördükdə özünü "çarəsiz" hiss etdiyini və ədalətin bərqərar olacağını ümid etdiyini söyləyir.

Lakin "məsələ sadəcə onu həbs etmək deyil" deyir və Oliveyranın psixoloji müalicəyə ehtiyacı ola biləcəyinə inanır.

Yaşananlara baxmayaraq, Henrikes müdafiəsiz uşaqlara dəstək olmaq fəaliyyətinə davam edəcəyini bildirir: "Kömək etmək istəyimdən vaz keçməyəcəyəm".