Bliadhna nan ÒranYear of Song

Coinneach MacÌomhair (Coinneach Ùr)

Chaidh Zulu Dhòmhnaill Ruaidh a sgrìobhadh le Coinneach MacÌomhair, Coinneach Aonghais Òig, a bha a' fuireach aig 18 Breascleit, Leòdhas. Duine socair, sàmhach a bh' ann an Coinneach ach feumaidh e bhith gu robh mac-meanmna beothail aige. Ma rinn e òrain eile a bharrachd air Zulu Dhòmhnaill Ruaidh chan eil iad air lorg.

B' e clachair a bh' ann an Coinneach Ùr agus bhiodh e a' togail dhrochaidean. Cha robh eathar aige riamh agus cha mhotha na sin a b' e iasgair a bh' ann.

Rinn e an t-òran do ghrunnan dhaoine à Breascleit a bha caran coltach ris fhèin. Cha bhiodh iad a' dol gu muir agus cha robh eathar aig duine aca.

Bhàsaich Coinneach mu mheadhan an fhicheadamh linn 's e air greis latha fhaighinn.

Tha sinn an comain Dhòmhnaill Norrie MacLeòid à Tolastadh a' Chaolais, Leòdhas, airson an fhiosrachaidh seo.