Bliadhna nan ÒranYear of Song

Tha an samhradh air tighinn, tha chuthag air tilleadh,
Tha iarmad an fhirich cur luinneig an gleus;
Thriall sàmhchair a' ghlinne mar sgàilean an t-silidh,
'S tha 'n duilleag air mhire le siùdan nan geug.

Sèist / Chorus

Tha 'n samhradh air tighinn, cha bhi mi leam fhìn,
Tha 'n samhradh air tighinn, cha bhi mi leam fhìn.
Tha 'n samhradh air tighinn, thèid mise gum nighinn,
'S bidh iarmad an fhirich cur luinneig an gleus.
Tha 'n samhradh air tighinn, cha bhi mi leam fhìn.

Nach caomh leat an t-sòbhrag mu aodainn nan òban!
Nach caomh leat an neòinean a' còmhdach an t-slèibh!
An druid air an ògan, an driùchd air an ròsan,
Is ceileireadh sòlais tighinn beò anns an speur.

Bidh sumainnean geala mar chualaidh na mara
Ag iomart gu cala len aignidhean rèidh;
Thoir an eidheann bhon chuilionn 's an leòmhann bho cuilean,
Ach fàg mi air m' uilinn air mullach Dun Sgèith.