KALLATTIIN, 'Waa'ee jireenyaa sirriitti waanan hubadheef haleellaan mudate na hin yaaddessine, addunyaa maraatte keessa jirra'- Tiraamp

Haguuggii Tamsaasa Kallattii

1. Sa'aatii tokko duraGodina Waagimraatti ayisuuzuu midhan fe'erratti balaa qaqqabeen namootni 19 du'an

   Naannoo Amaaraa godina Waagimraa keessa konkolaataan ayisuuzuu midhaan fe'etti dabalataan hanga namoota 80 fe'ee osoo deemuu balaa mudateen yoo xiqqaate namootni 19 lubbuu dhabuu Poolisiin godinichaa ibse.

   Konkolaataan fe'isaa kun magaalaa Kibba Gondar Aabinnetirraa ka'e gara Saqoxaa imalaa osoo jiruu naannoo Naggaasii jedhamutti garagaluun namoota 19 du'aniin alatti 60 kan ta'an miidhamaniiru jedhame.

   Hogganaa Olaanaa dandii tiraafikaa kan ta'an Komaandara Itti aanaa Malaakuu Ashaagree midhaan fe'ame irratti namootni 80 fe'amanii akka turan ragaa argachuu himan.

   Warra miidhaman keessa daa'immaniifi miseensotni maatii tokkoo hedduun akka jiran ibsaniiru.

   Uummata naannoo tokkootu baayyinaan du'ee kan jedhan hoogganaan kun reeffa 17 gara naannoo tokkootti erginee jedhan.

2. Sa'aatii tokko duraYutuubarri Poolaandi guyyaa sagaliif osoo adda hin kutiin livestream hojjetee £50m walitti qabe

   Lammiin Poolaand daa'imman dhibee kaansariitiin dararamaaniif galii walitti qabuuf guyyoota walitti aanan sagaliif livestream gochaa ture £50m walitti qabuun beekame.

   Piotr Hancke hordoftoota miliyoonaan lakkaa'aman kan qabu yo ta'u mana jireenyaa xiqqaa magaalaa Waarsoo jirurraa galii kana walitti qabaa ture.

   Duula kana jifataan Ispeen Lamiin Yamaal, goolii eegaan duraanii Arsenaal Sheezniifi namootni beekamoon kaanis irratti hirmaataniiru.

   Galiin walitti qabame kun dhaabbata gargaarsa Cancer Fighters Foundation kennama jedhame.

   Dargaggeessi maqaa waltajjii Latwongang jedhamuun beekamu kun takkaatti namoota miliyoona 1.4 fa'atu isa hordofaa ture.

3. Sa'aatii 2 duraPireezdaantiin Libaanos waliigaltee dhukaasa dhaabuu irratti Hezbollaah qeeqan

   Pireezdaantiin Libaanos Jooseef Awun waraana Israa’el waliin taasifamaa jiru xumuruuf tattaaffii taasisaa jirutti Hezbollaan gufuu ta'aa akka jiru qeeqan.

   Pirezdaantichi ibsa kennaniin, jalqaba marii kanaa irraa kaasee Ameerikaan ''dhukaasa dhaabuun tarkaanfii jalqabaa barbaachisaa fudhachuu ishee'' ibsan.

   Haa ta'uu malee kibbi Libaanos ammallee ''waraana namootni biroo lafa keenya irratti raawwataniif gatii kaffalaa jirti'' jedhu.

   Guyyoota darban Israa’elii fi Hizbullah gidduutti walitti bu’iinsi itti fufee jiraatus, walii galteen dhukaasa dhaabuu Israa’elii fi Libaanos gidduu jiru torban sadiif dheerateera.

   Hizbullaah marii naannicha keessatti nagaa buusuuf kaayyeffate keessaa hin hammatamne.

   Jooseef Awun waraanni kun ''Libaanosif jecha'' kan geggeeffamu yoo ta'e, akka deeggaru kan dubbatan yoo ta'u, itti dabaluudhaan garuu ''kaayyoon waraanaa kanaa kan Libaanos utuu hin taane dantaa namoota biroo galmaan ga'uu waan ta'eef guutummaatti hin barbaannu'' jedhan.

   Qeeqa Hizbullaan doorsisa Israa’el deebisuuf mirga qaba jedhu irrattis Pirezidaantichi “Wanti nuti gochaa jirru gantummaa miti, inumaa gantummaa kan raawwataa jiru warra dantaa alagaa galmaan ga’uuf biyya isaanii gara waraanaatti harkisanidha.” jechuun ibsan

4. Sa'aatii 2 dura'To'annoon ulaa Hormuz itti gaafatamummaa Iraan ta'a'- Iraan

   Qondaalli olaanaan Iraan tokko akka beeksisetti, seera ulaa bishaanii kana bulchuuf yaadame jalatti humnoonni waraanaa Iraan ulaa Hormuz bulchuu fi hogganuuf itti gaafatamummaa akka fudhatu himan.

   Hogganaan koree nageenya biyyoolessaa paarlaamaa Iraan, Ibrahim Azizii televijiinii mootummaatti akka himanitti, humnoonni waraanaa duraanuu ulaa kana ta'uchuun ''dooniiwwaan diinota Iraan waliin hidhata qaban'' akka hin dabarre barbaadaa jiru jedhan.

   Aziiziin itti dabaluudhaan labsiin yaadame kun kanfaltiin ulaa kana keessa dooniwwaan akka darban taasisuu fi Kanfaltiin maallaqaa ulaa kana irratti taasifamu riyaala Iraanin akka kaffalamu tumameera jedhan.

5. Sa'aatii 2 duraIraan fi Raashiyaan maal mari'atan?

   Ministirri Dhimma Alaa Iraan hariiroo Raashiyaa fi Iraan irratti mari'achuun ibsameera.

   Ministirri Dhimma Alaa Iraan Abbaas Araagchii fashaluu marii nagaa booda jila isaanii waliin gara Raashiyaa kan imalan yoo ta'u Pirezidaantiin Putin waliinis Moskotti mari'ataniiru.

   Puutiin waliin walgahii kana irratti kan hirmaatan Jila Iraan dabalatee Ministira Dhimma Alaa Raashiyaa Sargee Laavroo kanneen biroo ni argamu.

   Ministirri dhimma alaa Iraan hariiroon Moskoo fi Tehran gidduu jiru ''walta'iinsa tarsiimoo'' ta'uu ibsuun ''cimee akka itti fufu'' dubbataniiru.

   Jilli Iraan Raashiyaa keessatti Puutiin waliin mari’achaa jirus itti aanaa ministeera haajaa alaa Kaazem Garibabadii fi Moskootti ambaasaaddara Iraan Kaazem Jalalii kan hammatedha.

   Dubbi himaan Kiremlin Dimitiri Peeskov akka jedhanitti, Raashiyaan marii gara fuula duraatti taasifamu irratti furmaata barbaaduuf ''jaarsummaa gama lachuu biratti fudhatama qabu'' dhiyeessuuf qophii ta'uu ibsaniiru.

   Itti dabaluudhaanis, "tasgabbbii, nageenyi waaraa ta'e bu'ee gonkumaa walitti bu'iinsi akka hin deebinee akka ta'uuf Raashiyaan waan hunda gochuuf qophiidha," jedhan.

6. Sa'aatii 2 duraMooskoofi Tehraan hariiroo tarsiimawaa sadarkaa olaanaa qabu jedhe aanga'aan Iran

   Ministirri Haajaa Alaa Iran Moskoofi Tehraan gidduusaaniitti hariiroo hariiroo tarsiimawaa jabaachaa itti fufu'' qabu jechuu miidiyaan biyyaalessaa Raashiyaa gabaase.

   Aanga'oonni Iraan Mooskootti Putriin waliin walarguusaanii kan gbaasan yoo ta'u, qondaalotni Iraan kun Ministira Haajaa Alaa Itti aanaa Kaazeem Gaaribaabadii fi Mooskootti Ambaasaaddar Iraan kan ta'an Kaazem Jalaaliidha.

   Dubbii himaan Kireemliin Dimeetrii Peeskoov Raashiyaan qaamolee lamaaniinuu fudhatama kan argachuu danda'u tajaajila jaarsummaa kennuu akka dandeessu dubbate.

   ''Nageenya mirkaneessuuf wanta kamuu gochuuf qophiidha, nageenya wabii qabu, kan waaraa ta'eefi waraanatti hin deebine'' jecuun dubbate.

7. Sa'aatii 3 duraFiilmiin seenaa Maayikil Jaaksanirratti xiyyeefatee hojjetame riikardii cabse

   Fiilmiin muuziqaan dabalaame(Musical film) fi seenaa Mayikil Jaaksan irratti xiyyeeffate guutuu addunyaatti lakkoofsa hedduun daawwatamuun riikardii box office cabse.

   Torban tokkotti lakkoofsi namoota fiilmii seenaa dhuunfaa daawwatanii inni guddaan galmaaheera.

   Fiilmii kanarratti durbii isaa kan ta'e Jafaar Jaakssantu akka Maayikil Jaaksan ta'ee taphate. Fiilmiin kun Roobii darbe erga argaaf dhiyaachuu eegalee doolaar miliyoona 217 galcheera.

   Hanga ammaatti ilaalcha torban tokkoo gadiin galii guddaa kan galchee ture, Bohemian Rhapsody ture. Bara 2018 wayita argaaf dhiyaate doolaara miliyoona 124 galche.

   Fiilmiin seenaa Jaaksan irratti hojjetame kun riikardii bara 2024tti Oppenheimer qabamee ture doolaara miliyoona 180 caaleera.

   Damee fiilmii musical biopic jedhamuun fiilmiin hanga mootii muziiqaa Poop, Maayikil Jaaksan galii galche hin jiru.

   US keessatti fiilmii kana tamsaasuun daayireektarummana kan hojjetu Adam Fogelsan maallaqa hang knaa galchuuf bakka maratti namni danuun yaa'ee daawwachuu qaba, Daawwattootni danuu jaalataniiru jedhe.

   Fiilmiin kun seenaa guutuu Maayikil Jaaksan isa falmisiisaa ta'e hin agarsiisu jehcuun xiinxaltoota biratti badaa jaalataamaa hin turre. Uummatattti yeroo gadi bahu garuu jaalala guddaa argate.

   Maayikil Jaaksan daa'imman irratti yakka haleellaa saalaa raawwachuun himatamaa ture. Bara 2005 garuu badiin irratti hin argamne jedhamee bilisa jedhameera.

8. Sa'aatii 4 duraQondaaltonni Iraan gamoo waraanaan caccaban qulqulleessuuf maal akka barbaachisu ibsan

   Abbaan taayitaa eegumsa naannoo Iraan gamoolee mana jireenyaa waraanaan barbadaa'an qulqulleessuuf ''konkolaattota fe'umsaa kuma 200'' barbaachisa jedheera.

   "Haleellaa qilleensaa Israa'elii fi Ameerikaatiin gamoowwan mana jireenyaa kumaatamaan lakkaa'aman barbadaa'aniiru jedhu.

   Caccabni manneenii toonii miliyoona 10 ta'u lafarra tuulameera. Caccabaa kana kaasudhaaf gara konkolaattota fe'umsaa kuma 200 nu barbaachisa," jedhan miseensi Mana Maree Eegumsa Naannoo Abu Ali Golzari.

   Golzarin itti dabaluudhaan, "Iraan keessatti rakkoon bulchiinsa faalama naannoo hamaan akka bishaan, biyyee fi qilleensaa mudachaa jira,” jedhan. Isaan kunis sababa waraana kanaan akka malee hammaataniiru." jechuun ibsu.

9. Sa'aatii 5 duraGareen Hizbullaah ibsa haaraa baase

   Barreessaan olaanaa Hizbullaah mariin kallattiin Libaanos fi Israa’el gidduutti taasifamu ''yakka guddaa'' kan Libaanos keessatti ''tasgabbii dhabsiisu'' jechuun ibsaniiru.

   Akka ibsa marsariitii garee kanaa Al-Manar irratti maxxanfametti Nahim Qassem mootummaan Libaanos marii Israa’el waliin taasisaa jiru qeequun, “adeemsi isaan keessa jiran Libaanos kan miidhu'' ta’uu ibsan.

   Barreessaan kun akkasumas ''wayita mirgi Libaanos balaadhaaf saaxilamuu gareen kun yoomiyyuu hidhannoo hiikkachuus ta’e lola akka hin dhaabne'' cimsanii dubbataniiru.

   Libaanos dhiheenya kana waggoota 30 oliif yeroo jalqabaaf Israa’el waliin kallattiin mari’atteetti. Barreessaan olaanaa Hizbullaah kun mootummaan Libaanos Israa'el waliin ''marii kallatti'' akka dhaabuu fi ''marii waliigalaa'' Iraani fi Ameerikaa dabalate taasisuu keessatti hirmaachuun ala furmaata akka hin finne ibsan

   Naim Qassem kessumaa karoora hidhannoo hiikkachuu Hizbullaah akka malee qeequun "Meeshaan waraanaa diddaa weeraraf hidhannee fi jiraachuu keenyaaf murtessa ta'e hin hikkannu'' jedhan.

10. Sa'aatii 5 duraDooniiwwan ulaa Hormuz keessatti danqamaniif furmaatni maali?

    “Yoom akka gara biyyaatti deebinu waanti beeknu hin jiru''- Dooniiwwaan ulaa Hormuz keessatti qabaman furmaata dhabuu ibsaa jiru.

    Akka Daarektarri olaanaan waldaa abbootii qabeenyaa dooniwwan boba’aa jedhanitti, sababa cufamuu ulaa Hormuz tiin namootni dooniiwwan irra hojjatan kumaatamaan lakkaa’amaniifi dooniiwwan 105 ol ta’an ugguramanii jiru.

    Namootni kunneen dhiphina hamaa fi yaaddoo lubbuun isaanii balaaf saaxilamuu keessa jiru jedhan Daarektarri olaanaan waldaa abbootii qabeenyaa dooniwwan boba’aaIntertanko Tiim Wiilkins.

    Iraan ulaa bishaanii boba'aa fi gaaziin uumamaa addunyaa keessaa darbe keessaa kan dhibbeentaan 20 ittiin geejjibsiifamu sababa ''dhukaasa dhaabuun cabeera'' jechuun Ameerikaa fi Israa'el himattuun ulaan kun akka hin banamne beeksifteetti.

    Tiim Wiilkins sagantaa BBC Today irratti dhiibbaa cufamuun ulaa kanaa namoota galaanarra hojjatan kan qarqara galaanaa Iraan irratti ukkaamfamanii jiraniif furmaatni tokko akka kennamu gaafatu.

    Wiilkins akka jedhutti hojjettoonni dooniiwwanii nyaata fi bishaanii ga'aa malee fi yoom deebi'uu akka danda'anillee quba hin qaban'' jedhu.

    Torban darbe Iraan dooniiwwan fe’umsaa lama kanneen “qorannoof” qarqara galaanaa kana keessa darbuuf turan to’annaa jala oolchuu ishee ibsiteetti. Doonii biroos ulaa kana keessa darbuuf yaalan haleellaan irratti raawwatameera.

    Gama kaaniin Ameerikaan dooniiwwan gara buufata doonii Iraan deemaan uggurtee turte, dooniiwwan hedduus to’attee jirti.

11. Sa'aatii 6 duraWaraanni Israa'el miseensota Hezboolaa sadi ajjeesuu hime

    Waraanni Israa'el Dilbata oppireeshinii kibba Libaanos keessatti tolcheen miseensota Hezboolaa sadi ajjeesuu hime.

    Humni Ittisaa Israa'el (IDF) loltootni Hezboollaa sadeen gama kibbaatiin fuulduraan loltoota Israa'elii gaadan akka ta'an ibse.

    Israa'el ''zoonii walabaa (buffer zone)'' gara kiiloomeetira 10 Libaanos keessa seentee jirti. Kun balaa Hezboolaarraa dhufu hir'isuuf jetti.

    Kana jechuun lafti Libaanos 5% weerara Israa'el jala jira jechuu dha.

    '''Daangeffama kanatti aansee Humni Qilleensaa Israa'el haleellaa raawwachuun shororkeessitoota balleesse,'' jedhe IDF.

    Buufataaleen Hezboolaa Biint Jibeel keessaa akkasuma haleelamuu ibse.

    Israa'elii fi Libaanos dhukaasa dhaabuuf waliigalanii turan. Yeroo dhukaasa dhaabuu keessa jirus. Hezboolaan qaama waliigaltee kanaatii miti.

    Ministirri Muummee Israa'el Beenjaamiin Neetaniyaahuu Hezboolaan waliigaltee dhukaasa dhaabuu ''borcaa'' waan jiruuf Hezboolaa haleelaa jechuun loltoota isaa ajaje.

    Dilbata,Ministeerri Fayyaa Libaanos, Israa'el haleellaa raawwatteen daa'imman lama dabalatee namoota 14 ajjeesuu ibse.

12. Sa'aatii 7 duraWaldhabdee eela bishaaniin yoo xiqqaate 42 kan ta'an du'an

    Baha Chaaditti gosoonni lama eela bishaanii irratti walitti bu'uun yoo xiqqaate namoonni 42 yoo du'an 10 kan ta'an madaa'uu qondaalonni himan.

    Eela horiin bishaan keessaa dhugdu irratti lolli maatii lama gidduutti eegale babal'achuun gosoota walitti buuse jedhan aanga'oonni kutaa biyyaa Wadi Fira.

    Sababa kanaan gandoonni hedduun abiddaan gubataniiru.

    Jilli mootummaa Ministira Muummee Itti Aanaa Limaanee Mahamatiin durfamu erga garasitti ergamee booda rakkoon dhalate tasgabbaa'eera.

    Giddugaleessa Afrikaatti walitti bu'iinsi hamaan sababa bishaanii fi iddoo dheediisaa gosoota gidduutti mudachuun lubbuu galaafata.

    Keessattuu qonnaan bultootaa fi tikfattee bultoota gidduutti rakkoon akkanaa deddeebi'ee mudata.

    Dhaabbati International Crisis Group jedhamu bara 2021 fi 2024 gidduutti sababa walitti bu'iinsa akkanaan namoonni 1,000 yoo du'an, 2,000 kan ta'an madaa'aniiru.

13. Sa'aatii 7 duraHaleellaa Israa'eliin sirni fayyaa Libaanos balaarra bu'uu hakiimni BBC'tti hime

    Doktaraafi ministirri fayyaa duraanii Libaanos Dr Fiiras Abiyaad haleellaan raawwatamaa jiru sirna fayyaa biyyattiirratti ''dhiibbaa hedduu'' uumaa jira jedhan.

    Hospitaalonni Libaanos ''guyyaa guyyaan namoota du'an hedduu,'' keessummeessaa jira, kun immoo nbamoota buqqa'an dabalateeti, jedhu.

    Dhiibbaawwan kanneen keessatti, doktaroonni fi narsoonni ''bifa nama ajaa'ibuun'' carraaqqii gochaa jiru kan jedhan Dr Fiiras Abiyaad , doktaroonni mataan isaanii buqqa'uu BBC'tti dubbatan.

    Libaanos meeshaalee waldhaansa fayyaa hundumaa alaa galchiti kan jedhan hakiimni kun, "meeshaaleen amma qabdu hanga ji'a lamaa qofa ishee gaha'' jedhaniiru.

    Dilbata,Ministeerri Fayyaa Libaanos, Israa'el haleellaa raawwatteen daa'imman lama dabalatee namoota 14 ajjeesuu ibse.

    Waraaanni Israa'el garee Hizboollaa fi buufataalee isaa irratti qiyyaafachuu akkasumas dursee jiraattonni gandoota garaagaraa kibba Libaanos akka qe'ee gadhiisan akeekkachiisuu hime.

14. Sa'aatii 7 duraIraan fi Omaan dhimma Hormuuz irratti ''dirqama waloo'' qaban irratti mari'atan

    Ministirri dhimma alaa Iraan Abbaas Araagchii gara Raashiyaa imaluu dura Omaan daawwatanii turan.

    Omaanitti ministira dhimma alaa fi aanga'oota biyyattii waliin mari'ataniiru.

    Ministirri dhimma alaa Omaan Badir Abdulsa'id gitasaanii kan Iraan Abbaas Araachii waliin dhimma Ulaa Hormuuz irratti mari'achuu ibsan.

    Ergaa karaa X dabarsaniin ''itti gaafatamummaa fi mirga Hormuuz irratti qaban,'' dubbachuu ibsan.

    Dippiloomaatii olaanaan Iraan ''simannaa addaa'' Omaan taasisteef galateeffataniiru.

    Abbaas Araagchii miidiyaa hawaasummaasaaniirratti waa'ee daandii dooniiwwan irra imalanii eeraniiru.

    Haasaan qondaalota Omaan waliin taasisan ''akkaataa nageenya imala galaanaa mirkaneessuun danda'amu,'' kan hammate ta'uu eeran.

15. Sa'aatii 8 duraAbbaas Araagchii danqamuu marii nagaaf sababni gaaffilee US dhiyeessite jedhan

    Ministirri Dhimma Alaa Iraan Abbaas Araagchii fasahaluu marii nagaatiif sababni baay'achuu gaaffilee US dhiyeessite jedhan wayita Raashiyaa gahanitti.

    Akka Seeyint Piitarsbarg ejjetaniin Araagchiin, dhimma waraana Baha Jiddu-galeessaa michuu isaanii Raashiyaa faana akka mariyatan himaniiru gabaasa Parshiyaan Telegiraamii isaarratti maxxanseen.

    Araagchiin Islaamaabaaditti kan jaarsummaa keessatti qooda fudhatan warra Paakistaan waliin mari'achuun gara Raashiyaa deeman. Mariin Islaamaabaad akkaataa marii nagaa itti fufuun danda'amurratti kan xiyyeeffate jedhan.

    Waayee cufamuu Ulaa Hormuuz illee dubbatan. Nageenyi imala galaanarraa dhimma ijoo addunyaa akka ta'eefi Omaan dabalatee olloonni keenya dhimma waloo ulaa kanaarratti nu waliin hojjechuu qabu jedhe.

    Omaanii fi Iraan jidduu dhimmoonni dantaa waloo hedduun jiru kan jedhan Abbaas Araagchii ulaa Hormuuz irratti mariin dabalataa Omaanii fi Iraan jidduutti akka barbaachisu himan.

16. 27 Ebla 2026Israa'el waliigaltee dhukaasa dhaabuu cabsuun Libaanos keessatti namoota 14 ajjeeste

    Aanga'oonni Libaanos akka jedhanitti Israa'el osoo dhukaasa dhaabuurratti waliigalamee jiruu haleellaa raawwachuun namoota hedduu ajjeesteetti.

    Ministeerri Fayyaa Libaanos haleellaa Israa'el Dilbata kaleessaa raawwatteen daa'imman lamaa fi dubartoota lama dabalatee namoota 14 ajjeesuu akkasumas namoota 37 madeessuu ibse.

    Sana dura Humni Waraanaa Israa'el (IDF) gandoota kibba Libaanos hedduu keessaa jiraattonni akka ba'an akeekkachiisee ture.

    Jiraattonni hatattamaan akka ba'anii fi yoo hin ba'an ta'e ''jireenyasaaniirra balaan akka ga'u,'' ibse IDF.

    Waraanni Israa'el kun kutaalee kibba Libaanos keessatti iddoowwan dahannoo Hizboollaa adda baasuun haleellaa cimaa akka raawwate himeera.

    Hizboollaan iddoowwan kunneen irraa haleellaa diroonii raawwachuun loltuu isaa ganna 19 ajjeesuu fi ja'a maddeessuu ibse IDF.

    Kanaan alattis Hizboollaan dirooniiwwan sadi gara Israa'el dhukaasuu kan ibse IDF, garuu dirooniiwwan kunneen osoo daangaa hin ce'in qilleensarratti qolatamuu hime.

    Biyyoonni lameen- Israa'el fi Libaanos, waliigaltee dhukaasa dhaabuu Ebla 16 irra ga'amee fi ergasii torbee sadiin dheereffame sarbuun wal haleelaa jiru.

17. 27 Ebla 2026Ministiirri dhimma alaa Iraan Puutiin waliin mariyachuuf gara Mooskoo qajeelan

    Iraan Pirezidaantii Raashiyaa Vilaadmiir Puutiin waliin mariyachuuf qondaala Olaanaa gara Mooskotti ergite.

    Miidiyaaleen Iraan akka gabaasanitti, Ministiirri Dhimma Alaa Iraan Abbaas Araagchii Pirezidaant Vilaadmiir Puutiin waliin mariyachuuf gara Moosqoo qajeelaniiru.

    Gama biraan ammoo Pirezidaant Doonaald Tiraamp Iraan waraanni ji'a lama guute akka dhaabatu yoo barbaadde bilbiluufii akka dandeessu dubbachuusaa maddi oduu Rooyitars gabaase.

    USfi Iraan sambata darbe wal-arganii marii gaggeessu jedhamee eegamaa turus, Tiraamp jila marii akka hin deemne dhorkuu booda abdiin ture qabbanaa'era.

    Ministiirri dhimma alaa Iraan Abbaas Argaachii jalqaba Paakistaan erga deemanii booda gara Omaan deemanii ture; achiin booda gara Paakistaanitti deebi'uun Mooskotti qajeelan.

    Mariin biyyoota lamaan gidduutti gaggeeffamuuf ture danqamuu hordofee gatiin boba'aa addunyaa deebi'ee olka'eera.

    Tiraamp Iraan waliin mariyachuuf waanti isa sardu akka hin jirre ibsuun, Iraan mariyachuu yoo feete bilbiluufii akka dandeessu ibse.

    "Mariyachuu yoo barbaadan nuuf bilbiluu danda'u. Baay'ee salphaadha: boombii nikularaa qabaachuu hin danda'an, kanaan ala sababni wal-arginuuf hin jiru," jedhe Tiraamp.

    Iraan mirga yuraaniyeemii gabbisuu akka qabdu yeroo dheeraaf falmaa turte, US illee kana akka kabajjuuf barbaaddi.

18. 27 Ebla 2026Tiraamp dhukaasa Waayit Haawusitti mudateen ''hin yaaddofne'' jedhe

    Pirezidanti Doonaald Tiraamp dhukaasa sagantaa irbaataa Waayit Haawusitti qophaa'erratti mudateen ''yaadda'ee akka hin turre,'' ibseera.

    Sagntaa CBS waliin gaaffii fi deebii taasiseen ''hin yaaddofne. Jireenyi maal akka ta'e hubadheera. Addunyaa maraatte keessa jirra,'' jedhe.

    Miidiyaan US akka ibsetti namni dhukaasa bane dargaggeessa umrii waggaa 31 Kool Toomaas Alen jedhamuudha.

    Dargaggeessi kun miidhaa yeroo sana irra ga'een hospitaalatti yaalamaa kan jiru yoo ta'u, Wiixata har'aa mana murtiitti dhihaata.

    Abbaa Alangaa Waliigalaa US Tood Bilaanch shakkamaan kun qondaalota olaanoo US irratti xiyyeeffachuu ibse.

    Garuu kaayyoon haleellaa kanaa maal akka ta'e qoratamaa jira jedhe.

    Sagantaa irbaataa gaazexeessitoota Waayit Haawusiif qophaa'e sanarra Tiraamp fi Pirezidantii Itti Aanaa JD Vaansi dabalatee aanga'oota olaanoo hedduutu turan.

    Wayita dhukaasi banametti Pirezidanti Tiraamp bakka sanaa gara iddoo biraatti saffisaan dabarfamaa ture.

    Sana booda Tiraamp wayita rippoortarootatti dubbatu ''hojiin akkana balaa qabu hin jiru,'' jedhe.

    Waayit Haawus ibsa baaseen Tiraamp erga haleellaa sana jalaa baraaramee booda ''miira sodaa tokko malee'' mul'ate jedhe.

    Namni sagantaa irbaataa gazexeessitoota Waayit Haawus irratti dhukaasa bane eenyu?

19. 27 Ebla 2026Kilabi Galaataasaaray 'daanyota' kubbaa miilaa jinniitu isaan keessa jira jechuun himate

    Kilabni Turkii Galataasaaray abbootii murtii kubbaa miilaa "jinniitu isaan keessa jira jechuun fuula X irratti komii qabu dhiyeesse.

    Tapha kaleessa, Dilbata, kilaba masaanuusaa ta'e Feenaarbachee waliin gaggeessen 3-0 dhaan injifatus, boqonnaa dura adabbiin penaaliitii lama naaf hin kennamin hafe jechuun abbootii murtii dorgommicha taphachiisan himate.

    Boqonnaa dura Galatasaaraay 1-0 dhaan dursaa turus, balleessaa taphattoota isaarratti si'a lama raawwatame jedheen rukuttaan penaaliitii akka maluuf ibsuun, dogoggora daanyotaan dhabuu ibse.

    Boqonnaa dura kilabichi ergaa fuula X isaarratti maxxanseen: "Abbootiin murtii kun penaaliitii nu dhorkatanis, 1- 0 dhaan dursaa jira. [Daanyonni] waan gochaa jirtan agartaniitti, karoorri keessan maal akka ta'e [beekna], jinniitu isin keessa jira," jechuun abootii murtii taphichaarratti himannaa dhiyeesse.

    Taphataan lammii Naayijeeriyaa Viktoor Osiimheen galchii jalqabaa Galatasaarayiif yoo lakkoofsisu Baaris Yilmaz fi Lukaas Toreeraa galchii dabalataa lakkoofsisuun Galatasaaraay 3-0 dhaan Feenaasbaachee injifate.

    Haa ta'u garuu kilabichi "jinniitu keessa jira" jedhee abootii murtii taphicha himachuun alatti, Federeeshinii Kubbaa Miilaa Turkii waliin hidhata qabu adda kutuu beeksise.

20. 27 Ebla 2026Ministirri Ittisaa Maalii hidhattootaan ajjeefaman

    Hidhattoonni Jihaadistoota ofiin jedhan erga magaalaa guddoo Maalii, Baamaakoo, weeraranii booda Ministira Ittisaa Saadiyoo Kaamaaraa manasaanii handaara magaalattiitti argamu keessatti ajjeesan.

    Miidiyaan biyyattii qondaalli kun erga hidhattoota waliin walitti dhukaasaa turanii booda madoo isaan mudaterraa dandamachuu dadhabuun lubbuunsaanii darbe.

    Haleellaa kanaan yoo xiqqaate miseensonni maatii Kaamaaraa biroo sadi ajjeefamaniiru.

    Akka gabaasa kanaatti hoogganaan humna waraanaa (juntaa) biyyattii Jeneraal Asimi Goyitaa haleellaa manasaaniirratti qiyyaafate booda iddoo biraatti dabarfamaniiru.

    Taatee kana dura hidhattoonni kunneen kutaa kaaba biyyattiittis haleellaa raawwachaa turan.

    Hidhattoonni Raashiyaa humni waraanaa Maalii qacare haleellaa hidhattoota kunneeniin bakka Kidaal jedhamu gadhiisanii baqatan.

    Maaliin waggootaaf hidhattoota gareewwan al-Qaa'idaa fi IS jedhamaniin hidhata cimaa qabaniin weeraramtee jirti.

    Haleellaa hidhattoota kunneeniin manni Kaamaaraa barbadaa'eera. Masjiidi naannawa sana jirus haleelamuun amantoonni hedduun ajjeefamaniiru.

    Maaliin yeroo ammaa hogganaa waraana biyyattii Jeneraal Asimi Goyita jedhamaniin bulti.

    Qondaalli waraanaa kun bara 2020 wayita fonqolcha mootummaan aangoo qabatu tasgabbii fi nagaa mirkaneessuu akkasumas garee hidhattootaa dhabamsiisuuf waadaa galee ture.

    Haata'u hidhattoonni kunneen sochiisaanii daranuu babal'isuun kutaalee kaabaa fi baha biyyattii to'atanii jiru.